ស្រីៗបើចង់ស្លៀកពាក់ស្អាតៗ មិនឆ្គង គួរតែដឹងពីរបៀប Mix & Match សម្លៀកបំពាក់ទាំងនេះ

ការស្លៀកពាក់ជាកត្តាសំខាន់មួយ ដែលផ្តល់ភាពជឿជាក់ និងទំនុកចិត្តមួយកម្រិតដល់យើង។ ជាក់ស្តែង ការស្លៀកពាក់ដែលស្អាត សមរម្យ មើលទៅសមភ្នែក មិនចាំបាច់ទាល់តែយើងទិញខោអាវថ្មីៗ ដែលមានតម្លៃថ្លៃនោះទេ​ ប៉ុន្តែយើងអាចស្លៀកពាក់ដោយស្រស់ស្អាតបាន ដោយគ្រាន់តែដឹងនូវតិចនិចខ្លះៗ ពីការ Mix & Match សម្លៀកបំពាក់។

ខាងក្រោមនេះ ជាគន្លឹះៗមួយចំនួនដែលអាចជួយផ្តល់ជាគំនិតបន្តិចបន្តួចដល់លោកអ្នក ក្នុងការជ្រើសរើសសម្លៀកបំពាក់។ ចង់ដឹងថាមានគន្លឹះអ្វីខ្លះ តោះ! ទៅអានទាំងអស់គ្នា៖

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

១. ខោ ឬ អាវលាត ពាក់គូជាមួយ ខោ ឬ អាវ ក្រឡាឆ្នូតៗ

ចាប់ផ្តើមដំបូងដោយចំណុចងាយៗ ប្រសិនបើមិត្តនារីៗចង់ស្លៀកពាក់ខោ ឬ​អាវប្រភេទក្រឡា ឬឆ្នូត នោះគួរជ្រើសរើសខោ ឬអាវ ដែលពាក់គូជាមួយជាប្រភេទលាត ដោយមិនមានរូបរញ៉េរញ៉ៃ ព្រោះបើស្លៀកខោអាវ ដែលមានរូបរញ៉េរញ៉ៃ និងក្រឡាដូចគ្នាទាំងពីរ មើលទៅមិនស្រស់ស្អាតនោះទេ ហើយពេលខ្លះថែមទាំងឃើញយើងកាន់តែទាបជាងមុនទៀតក៏មាន។

២. កុំស្លៀកពាក់ខោអាវ ដែលមានពណ៌ច្រើនពេក

ពិតណាស់នារីៗភាគច្រើន ចូលចិត្តសម្លៀកបំពាក់ដែលមានពណ៌ ព្រោះការស្លៀកពាក់បែបនេះ ធ្វើឲ្យមនុស្សស្រីមើលទៅមានភាពស្រស់ស្រាយ។ ប៉ុន្តែការស្លៀកពាក់ខោអាវពណ៌ កត្តាដែលចាំបាច់បំផុតនោះគឺ យើងត្រូវដឹងការរើសពណ៌ដែលស៊ីគ្នា មិនប្រឆាំងគ្នាខ្លាំង និងចៀសវាងកុំឲ្យមានពណ៌ខុសៗគ្នាច្រើនពេកនៅលើដងខ្លួន។

៣. ពាក់អាវយឺត ជាមួយអាវក្រៅ

ខោខាប៊យ អាវយឺត ជាស្ទាយ៍សាមញ្ញៗ ហើយសង្កេតឃើញថាយុវវ័យភាគច្រើនចូលចិត្តការស្លៀកពាក់បែបនេះ ព្រោះត្រូវបានច្រើនកាលៈទេសៈ អាចស្លៀកទៅសាលា ទៅធ្វើការ ឬទៅញ៉ាំអីខាងក្រៅក៏បាន។ ប៉ុន្តែបើប្រិយមិត្តគិតថា​ ស្ទាយ៍សាមញ្ញពេក ចង់ឲ្យមើលទៅរាងលេចធ្លោជាងនេះ មិនពិបាកទេគ្រាន់តែពាក់អាវក្រៅបន្ថែមរួចជាស្រេច ត្រឹមតែស្អាតជាងមុនទេ ថែមទាំងអាចការពារកម្តៅថ្ងៃទៀត។

៤. ស្លៀករ៉ូប ជាមួយអាវខាប៊យពីក្រៅ

សម្រាប់មិត្តនារីៗ ដែលចូលចិត្តការស្លៀកពាក់ងាយៗ​ ប៉ុន្តែស្រស់ស្អាត និងមើលទៅមានStyle ទាន់សម័យនោះ ​ គួរតែសាកល្បងស្លៀករ៉ូបខ្លីៗ ឬអាវវែងជាមួយខោខ្លី ដោយពាក់អាវខាប៊យថែមពីក្រៅ។ អូ! បើពាក់ជាមួយស្បែកជើងប៉ាត់តាទៀត រឹតតែស្អាតតែម្តង។​ សម្រាប់អ្នកចូលចិត្តថតរូប​ មិនគួររំលងស្ទាយ៍នេះទេ។

៥. ស្លៀករ៉ូប ឬ ឈុតងាយៗ 

នេះជាជម្រើសដែលងាយបំផុត បើនារីៗគិតថាខ្លួនមិនសូវប៉ិនប្រសព្វក្នុងការ Mix & Match សម្លៀកបំពាក់នោះ គួរតែជ្រើសរើស រ៉ូប ឬ ឈុតស្រាប់តែម្តង (Jump Suit)។ វិធីនេះងាយៗ​ ស្រស់ស្អាត ​ហើយមិនបាច់បារម្ភថាមើលទៅឆ្គងទៀត។   

៦. បន្ថែមភាពទាក់ទាញ ជាមួយគ្រឿងអលង្កា និងប្រដាប់ប្រដាផ្សេងៗ

តាមពិតទៅមិនមែនតែការស្លៀកពាក់ទេ សូម្បីតែគ្រឿងអលង្កា មួក ខ្សែក្រវ៉ាត់ វ៉ែនតា ឬប្រដាប់ប្រដាផ្សេងៗ ក៏ជួយឲ្យការតុបតែងខ្លួនរបស់មិត្តៗនារីយើងកាន់តែស្រស់ស្អាតផងដែរ។ 

​ចំណុចទាំង៦ដែលបានលើកឡើងខាងលើនេះ គ្រាន់តែតិចនិចបន្តិចបន្តួចប៉ុណ្ណោះ ប៉ុន្តែសង្ឃឹមថាវាអាចផ្តល់ជាប្រយោជន៍ខ្លះដល់មិត្តៗអ្នកអាន ។ ជាមួយគ្នានេះ ក៏ចង់លើកទឹកចិត្ត ជា​ពិសេសចំពោះនារីៗ មិនថាអ្នកមានរូបរាងបែបណានោះទេ អ្នកនៅតែអាចស្លៀកសម្លៀកពាក់ដែលខ្លួនស្រលាញ់ពេញចិត្ត ដោយគ្រាន់តែយើងដឹងពីកាលៈទេសៈ និងទីកន្លែងឲ្យបានត្រឹមត្រូវតែប៉ុណ្ណោះ៕​