ការសិក្សាថ្មីរកឃើញថា ត្រីបាឡែនបានវិវឌ្ឍន៍ចេញពីសត្វក្តាន់តូចៗ ដែលដើរលើផែនដីកាលពី៥០លានឆ្នាំមុន

បរទេស៖ ថនិកសត្វធំបំផុតនៅលើផែនដី មានជាប់ខ្សែស្រឡាយពីសត្វជើងបួនតូចមួយ ដូចជាសត្វក្តាន់ ដែលរស់នៅលើគោកកាលពី50លានឆ្នាំមុន។ លោក Hans Thewissen សាស្រ្តាចារ្យនៅ Northeast Ohio Medical University បានរកឃើញថាសត្វសមុទ្រចាប់ពីត្រីដូហ្វីនរហូតដល់ត្រីបាឡែន គឺវិវឌ្ឍន៍មកពី Indohyus ដែលជាសត្វដែលមានរាងដូចក្តាន់តូចមួយ ដែលធ្លាប់រស់នៅលើទឹកដីឥណ្ឌានិងប៉ាគីស្ថានបច្ចុប្បន្ន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោក Thewissen បានសិក្សាអំពីការវិវឌ្ឍន៍របស់ត្រីបាឡែនអស់រយៈពេលជាច្រើនឆ្នាំ ហើយនៅក្នុងសៀវភៅរបស់គាត់ដែលមានចំណងជើងថា The Walking Whales: From Land to Water in Eight Million Years គាត់បាននិយាយអំពីការរកឃើញដែលបង្ហាញពីកំណត់ត្រាផូស៊ីលដំបូងនៃត្រីបាឡែន។

ផូស៊ីលដំបូងបំផុតនៃសត្វនេះ ត្រូវបានគេរកឃើញក្នុងថ្មដែលត្រូវបានប្រមូលនៅតំបន់ Kalakot នៃ Jammu និង Kashmir ដោយអ្នកភូគព្ភសាស្ត្រឥណ្ឌាឈ្មោះ A Ranga Rao។ លោក Rao បានរកឃើញធ្មេញនិងផ្នែកខ្លះនៃឆ្អឹងថ្គាមនៅទសវត្សឆ្នាំ1960និង1970 ប៉ុន្តែនៅពេលដែលគាត់បានចែកឋានទៅ ភរិយារបស់គាត់គឺវេជ្ជបណ្ឌិត Friedlinde Obergfell បានឲ្យថ្មទាំងនេះទៅ លោក Thewissen ដើម្បីសិក្សា។

ការសិក្សាបន្ថែមទៀតលើវាបានបង្ហាញថា ផូស៊ីលទាំងនោះគឺជារបស់សត្វដែលមានអាយុកាល47លានឆ្នាំដែលមានរាងកាយនិងកន្ទុយ។ ការស្រាវជ្រាវរបស់គាត់បានរកឃើញថា ពួកវាបានស៊ីរុក្ខជាតិដុះលើដី ហើយពួកវាមានឆ្អឹងក្រាស់ដោយសារតែចំណាយពេលច្រើននៅក្នុងទឹក។ សត្វដំរីទឹកត្រូវបានគេជឿថា ជាខ្សែស្រឡាយដែលនៅរស់ ជិតស្និទ្ធបំផុតនៃត្រីបាឡែនដែលរស់នៅលើដី ដែលឆ្អឹងក្រាស់ៗរបស់ពួកវាគឺជួយក្នុងការដើរនៅបាតបឹង និងទន្លេ។

លោក Thewissen បានប្រាប់ទស្សនាវដ្តី Discover ថាពួកសត្វទាំងនោះបានអង្គុយនៅក្នុងទឹកហើយរង់ចាំចាប់សត្វជាអាហារ ដែលនេះគឺស្រដៀងនឹងក្រពើដែរ។

កាលពីមុនគេជឿថា ត្រីបាឡែនវិវត្តចេញពីសត្វស៊ីសាច់ជាអាហារ ដែលផ្លាស់ប្តូរទៅរស់នៅក្នុងទឹកដើម្បីស្វែងរកចំណីជាត្រីវិញ។

លោក Thewissen ពិពណ៌នាអំពីបុព្វបុរសនៃត្រីបាឡែនដំបូងថាស្រដៀងទៅនឹងសត្វតោសមុទ្រ ដែលបានលេចចេញកាលពី42លានទៅ48លានឆ្នាំមុន ។ បន្ទាប់មកក៏លេចចេញនូវត្រីបាឡែនដែលមានធ្មេញ (toothed whales) កាលពីប្រហែល7លានឆ្នាំក្រោយ ដែលពួកវាមាននៅក្នុងមហាសមុទ្រនាពេលបច្ចុប្បន្ននេះ៕

• វិទ្យាសាស្រ្ត
• ជីវិត
• ធម្មជាតិ
• វីដេអូ