តិចនិក៧យ៉ាង អ្នកជំងឺទឹកនោមផ្អែមគួរធ្វើ ដើម្បីសុខភាព!

ទឹកនោមផ្អែមជាជំងឺត្រូវការការយកចិត្តទុកដាក់និងថែទាំឲ្យបានដិតដល់ ហើយអ្នកជំងឺត្រូវយកចិត្តទុកដាក់អនុវត្តវិធានការថែទាំងដែលគ្រូពេទ្យបានណែនាំឲ្យបានខ្ជាប់ខ្ជួន។ ការថែទាំ និងគ្រប់គ្រងជំងឺទឹកនោមផ្អែមបានល្អធ្វើឲ្យអ្នកជំងឺចៀសវាងបានច្រើនពីផលវិបាកធ្ងន់ធ្ងរដែលអាចគំរាមកំហែងដល់អាយុជីវិត។

ខាងក្រោមនេះជាតិចនិកមួយចំនួនអ្នកមានជំងឺទឹកនោមផ្អែមគួរអនុវត្ត៖

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

១. តាំងចិត្តខ្ពស់គ្រប់គ្រងជំងឺទឹកនោមផ្អែម

អ្នកជំងឺទឹកនោមផ្អែម កុំគិតថាខ្លួនឯកោ នៅមានមនុស្សជាច្រើនទៀតអាចចាំជួយលើកទឹកចិត្ត និងគាំទ្រយើងដែរ ដូចជាសាច់ញាតិ សហគមន៍ ពិសេសគឺគ្រូពេទ្យជំនាញតែម្ដង។ យើងក៏អាចចាប់ផ្ដើមស្វែងយល់ពីចំណេះដឹងមូលដ្ឋានទាក់ទងនឹងជំងឺទឹកនោមផ្អែម ដើម្បីយើងអាចគ្រប់គ្រងជំងឺនេះ បានកាន់តែល្អ។

ការញ៉ាំអាហារសុខភាព មានតុល្យភាព ហាត់ប្រាណជាប្រចាំ និងរក្សាទម្ងន់ខ្លួនឲ្យបានល្អ តាមការណែនាំ សុទ្ធតែជារឿងសំខាន់ និងមានប្រយោជន៍ដល់ការគ្រប់គ្រងជំងឺទឹកនោមផ្អែម។ ដូចគ្នាដែរ ការតាមដានកម្រិតជាតិស្ករក្នុងឈាម និងគ្រប់គ្រងកម្រិតជាតិស្ករតាមការណែនាំរបស់គ្រូពេទ្យ គឺជារឿងចាំបាច់ និងកុំភ្លេចប្រើប្រាស់ថ្នាំ ដែលគ្រូពេទ្យផ្ដល់ឲ្យ ឲ្យបានត្រឹមត្រូវ។

២. កុំជក់បារី

គ្នាយើងដែលមិនជក់បារី គឺជារឿងល្អសម្រាប់សុខភាព ប៉ុន្តែបើយើងមានទម្លាប់ជក់បារី ហើយដឹងថាខ្លួនមានជំងឺទឹកនោមផ្អែម គួរតែបញ្ឈប់ការជក់បារី។ ការជក់បារី ធ្វើឲ្យអ្នកជំងឺទឹកនោមផ្អែមប្រភេទ២ ប្រឈមកាន់តែខ្ពស់ នូវផលវិបាកផ្សេងៗ។ ការជក់បារីអាចនាំឲ្យ៖

កាត់បន្ថយលំហូរឈាមទៅកាន់ជើង និងប្រអប់ជើង ដែលអាចនាំឲ្យមានការឆ្លងរោគ ដំបៅ និងអាចនាំឲ្យមានការកាត់ជើងក៏មាន។
ជំងឺបេះដូង និងជំងឺសរសៃឈាមខួរក្បាល
ជំងឺភ្នែក អាចនាំឲ្យពិការភ្នែក
ខូចប្រព័ន្ធប្រសាទ និងតម្រងនោម
អាចឆាប់ស្លាប់

សូមប្រឹក្សាជាមួយគ្រូពេទ្យ ដើម្បីបានដំណោះស្រាយ ឬវិធីផ្ដាច់បារី ប្រកបដោយប្រសិទ្ធភាព។

៣. គ្រប់គ្រងសម្ពាធឈាម និងកូលេស្តេរ៉ូលឲ្យបានល្អ

អ្នកជំងឺទឹកនោមផ្អែម ការឡើងសម្ពាធឈាមខ្ពស់អាចធ្វើឲ្យខូចសរសៃឈាម។ ដូចគ្នាដែរ ការឡើងកូលេស្តេរ៉ូលខ្ពស់ ក៏ជាកង្វល់មួយដែរ អាចធ្វើឲ្យខូចសរសៃឈាម ហើយបើយើងមានជំងឺទឹកនោមផ្អែម ការខូចខាតនេះនឹងកាន់តែអាក្រក់ និងលឿនថែមទៀត។

ពេលដែលបញ្ហាសុខភាពទាំងពីរនេះកើតឡើងជាមួយគ្នា អាចធ្វើឲ្យអ្នកជំងឺទឹកនោមផ្អែមជួបបញ្ហាគាំងបេះដូង បញ្ហាសរសៃឈាមខួរក្បាល និងបញ្ហាដែលគំរាមកំហែងដល់អាយុជីវិតផ្សេងទៀត។

ញ៉ាំអាហារល្អចំពោះសុខភាព កាត់បន្ថយអាហារមានជាតិខ្លាញ់ ហាត់ប្រាណឲ្យបានទៀងទាត់ អាចជួយឲ្យយើងគ្រប់គ្រងសម្ពាធឈាម និងកូលេស្តេរ៉ូលបាន។ ក្នុងករណីខ្លះ គ្រូពេទ្យអាចចេញវេជ្ជបញ្ជាឲ្យយើងប្រើថ្នាំពេទ្យខ្លះដែរ បើចាំបាច់។

៤. ពិនិត្យរាងកាយ និងភ្នែកឲ្យបានទៀងទាត់

បន្ថែមលើការពិនិត្យតាមដានស្ថានភាពជំងឺទឹកនោមផ្អែមពីពីរទៅបួនដងក្នុងមួយឆ្នាំ អ្នកជំងឺទឹកនោមផ្អែម ក៏គួរពិនិត្យសុខភាពរាងកាយ និងភ្នែករាល់ឆ្នាំផងដែរ។

ការពិនិត្យសុខភាពរាងកាយ គ្រូពេទ្យនឹងសួរនាំពីអាហារដែលយើងញ៉ាំ កម្រិតសកម្មភាពរាងកាយដែលយើងបានធ្វើ និងរកមើលពីផលវិបាកអាចកើតមានដូចជាសញ្ញាខូចតម្រងនោម ខូចប្រព័ន្ធប្រសាទ និងជំងឺបេះដូងជាដើម។

សម្រាប់គ្រូពេទ្យភ្នែកវិញ អាចនឹងពិនិត្យរកមើលសញ្ញាខូចខាតស្រទាប់រ៉េទីន ភ្នែកឡើងបាយ និងទឹកដក់ក្នុងបាតភ្នែកជាដើម។

៥. ថែទាំសុខភាពធ្មេញ

អ្នកមានជំងឺទឹកនោមផ្អែមអាចប្រឈមនឹងបញ្ហាឆ្លងរោគនៅអញ្ចាញធ្មេញ។ អ្នកជំងឺត្រូវដុសធ្មេញយ៉ាងតិចពីរដងក្នុងមួយថ្ងៃជាមួយថ្នាំដុសធ្មេញមានជាតិ fluoride ប្រើអំបោះទាក់កាកសំណល់អាហារចេញពីធ្មេញរាល់ថ្ងៃ និងជួបពេទ្យធ្មេញយ៉ាងតិចពីរដងក្នុងមួយឆ្នាំ។ បើយើងសង្កេតឃើញថាមានឈាមអញ្ចាញធ្មេញ ឬអញ្ចាញធ្មេញឡើងក្រហម ឬហើម សូមទៅជួបគ្រូពេទ្យធ្មេញ។

៦. ប្រុងប្រយ័ត្នចំពោះការផឹកគ្រឿងស្រវឹង

គ្រឿងស្រវឹងអាចធ្វើឲ្យយើងឡើង ឬចុះជាតិស្ករក្នុងឈាម អាស្រ័យលើបរិមាណដែលយើងបានផឹក និងថាយើងបានញ៉ាំអាហារខ្លះៗពេលផឹកគ្រឿងស្រវឹងដែរឬអត់។ បើយើងសម្រេចចិត្តថាផឹកគ្រឿងស្រវឹង ត្រូវផឹកក្នុងកម្រិតតិចតួច មានន័យថាមិនត្រូវលើសពីមួយកែវ ឬមួយកំប៉ុងក្នុងមួយថ្ងៃសម្រាប់មនុស្សស្រី និងមនុស្សប្រុសមានវ័យចាស់ជាង៦៥ឆ្នាំ ហើយយ៉ាងច្រើនបានពីកែវ ឬពីរកំប៉ុង ក្នុងមួយថ្ងៃសម្រាប់មនុស្សប្រុសមានអាយុ៦៥ឆ្នាំ ឬតិចជាងនេះ។

ត្រូវចាំថាការផឹកគ្រឿងស្រវឹងអាចធ្វើឲ្យកម្រិតជាតិស្ករក្នុងឈាមថយចុះនៅពេលបន្ទាប់ ពិសេសសម្រាប់អ្នកចាក់អាំងស៊ុយលីន។ គួរពិភាក្សាជាមួយគ្រូពេទ្យ ពីកម្រិតគ្រឿងស្រវឹងដែលយើងអាចផឹកបាន។

៧. គ្រប់គ្រងស្ត្រេស

បើសិនជាយើងកើតស្រ្តេស វាអាចនាំឲ្យយើងធ្វេសប្រហែលលើការគ្រប់គ្រងជំងឺទឹកនោមផ្អែមប្រចាំថ្ងៃ។ អ្នកជំងឺទឹកនោមផ្អែម ត្រូវរៀនគ្រប់គ្រងស្ត្រេស និងរកពេលសម្រាកឲ្យបានត្រឹមត្រូវ គេងឲ្យបានគ្រប់គ្រាន់ ដើម្បីសុខភាព។

ក្រៅពីអ្វីរៀបរាប់ខាងលើ យើងត្រូវគិតវិជ្ជមានចំពោះខ្លួនឯងជានិច្ច ជំងឺទឹកនោមផ្អែមយើងអាចគ្រប់គ្រងបាន ហើយជំងឺទឹកនោមផ្អែមមិនអាចបញ្ឈប់យើងពីការចូលរួមក្នុងសកម្មភាពសង្គម ឬការងារ និងមានសុខភាពល្អ បាននោះទេ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អត្ថបទផ្ដល់សិទ្ធិដោយ Hello Krupet

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

SPONSORED CONTENT

តិចនិក៧យ៉ាង អ្នកជំងឺទឹកនោមផ្អែមគួរធ្វើ ដើម្បីសុខភាព!

​១. តាំង​ចិត្ត​ខ្ពស់​គ្រប់​គ្រង​ជំងឺ​ទឹកនោម​ផ្អែម​

២. កុំ​ជក់​បារី​

៣. គ្រប់​គ្រង​សម្ពាធ​ឈាម និង​កូលេស្តេរ៉ូល​ឲ្យ​បាន​ល្អ

៤. ពិនិត្យ​រាង​កាយ និង​ភ្នែក​ឲ្យ​បាន​ទៀងទាត់

៥. ថែទាំ​សុខ​ភាព​ធ្មេញ​

៦. ប្រុង​ប្រយ័ត្ន​ចំពោះ​ការ​ផឹក​គ្រឿង​ស្រវឹង​

៧. គ្រប់​គ្រង​ស្ត្រេស​

In Case You Missed It