កង់បីអគ្គិសនី​ Onion បានបង្ហាញរូបរាងរបស់ខ្លួនជាផ្លូវការ នៅលើទីផ្សារកម្ពុជាហើយ

ភ្នំពេញ៖ ក្រុមហ៊ុន Onion Mobility Co., Ltd បានបង្ហាញរូបរាងកង់បីរបស់ខ្លួនជាផ្លូវការ កាលពីថ្ងៃទី២៥ ខែមីនា​ ឆ្នាំ២០២១នេះ​ បន្ទាប់ពីការដាក់សាកល្បងជាសាធារណៈ ទទួលបានជោគជ័យ នៅទីក្រុងភ្នំពេញ កាលពីដើមខែមីនា កន្លងមកនេះ។

ឆ្លងកាត់ការតំឡើង និងសាកល្បងដ៏ជោគជ័យ ក្នុងរយៈពេល​១០ថ្ងៃកន្លងទៅ កង់បីអគ្គិសនី ONiON នឹងចាប់ផ្ដើមបង្ហាញទីតាំងបង្ហាញ (ONiON Showroom) និងសា្ថនីយ៍សាកអាគុយ (ONiON Station) របស់ខ្លួន ជាបន្ដបន្ទាប់ទៀតតាមការគ្រោងទុក។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោក ជីម ប៉ូលី ប្រធាន​គ្រប់គ្រង​ទូទៅ​ក្រុមហ៊ុន MVL TADA (Cambodia) Co., Ltd  និយាយថា លទ្ធផលនៃ ការដាក់សាកល្បង  បានផ្ដល់ភាពរួចរាល់ជាស្រេចសម្រាប់ទីផ្សារកម្ពុជា ជាមួយនឹងផលិតផលដែលមានមានគុណភាពខ្ពស់ និងភាពច្នៃប្រឌិត។

ក្រុមហ៊ុន  Onion Mobility Co., Ltd​ ជាបុត្រសម្ព័ន្ធ​មួយ​ជាមួយនឹងក្រុមហ៊ុន​បុត្រសម្ព័ន្ធ MVL TADA (Cambodia) Co., Ltd ដែលជាក្រុមហ៊ុនផ្ដល់សេវាកម្ម​កក់​យានជំនិះ​ធ្វើ​ដំណើរ​នៅ​កម្ពុជា តាមរយៈកម្មវិធីទូរស័ព្ទ  (TADA App)។​ ក្រុមហ៊ុនបុត្រសម្ព័ន្ធទាំងពីរ គឺនៅក្រោមក្រុមហ៊ុន MVLLABS Pte Ltd (MVL)​ ដែលមានទីតាំង​នៅ​ប្រទេស​សឹង្ហបុរី។​ ចំណែកឯ កង់បីអគ្គិសនី ONiON ត្រូវបានរចនារូបរាង និងបញ្ចេញគំនិតឡើង ​ (Develop) នៅប្រទេសកូរ៉េ។

លោក  Kay Woo ជានាយកប្រតិបត្ដិ របស់ក្រុមហ៊ុន ​Onion Mobility Co., Ltd បានបង្ហាញឆន្ទៈរបស់ខ្លួនថា នេះជា​ការនាំយកមកនូវ ភាពពេញនិយមក្នុងការប្រើប្រាស់ កង់បីអគ្គិសនីនៅក្នុងប្រទេសកម្ពុជា តាមរយៈការផលិតយានជំនិះ ដែលមានសេវាកម្មប្រកួតប្រជែង ភ្ជាប់ជាមួយ​មធ្យោបាយកក់ការធ្វើដំណើរ TADA។ ក្នុងពេលជាមួយគ្នានោះផងដែរ យើងក៏បង្កើតឲ្យមាន​ប្រព័ន្ធអេកូឡូស៊ីមួយ ដែលអាចជួយផ្នែកសេដ្ឋកិច្ច ដល់អ្នកបើកកង់បីផងដែរ។

លោក ជីម ប៉ូលី ប្រធាន​គ្រប់គ្រង​ទូទៅ​ក្រុមហ៊ុន MVL TADA (Cambodia) Co., Ltd​ បាននិយាយថា៖

កង់បីអគ្គិសនីដំបូងគេនេះ បានទាក់ទាញចំណាប់អារម្មណ៍សាធារណៈ ជាពិសេសគឺ អ្នកបើកបរកង់បីនៅក្នុងប្រទេសកម្ពុជាយ៉ាងខ្លាំង ដោយសារកង់បីនេះ ជាកង់បីដំបូងដែលប្រើប្រាស់អគ្គិសនី ជួយកាត់បន្ថយការចំណាយរបស់អ្នកបើក ផ្ដោតលើគុណភាពយូរអង្វែង មានរូបរាងទំនើប មានសម្លេងស្ងាត់​ និងកាត់បន្ថយការបំពុលបរិស្ថានផងដែរ។

កង់បីអគ្គិសនី ONiON ត្រូវបានតម្លើងនៅក្នុងខេត្ដកណ្ដាល មានទីតាំងស្ថិតនៅក្នុងតំបន់សេដ្ឋកិច្ចពិសេស សុវណ្ណភូមិ ដោយមានទុនវិនិយោគប្រមាណ ២០លានដុល្លារអាមេរិក និងអាចបង្កើតការងារបានចំនួន ៣៨០កន្លែង។

កង់បីប្រើថាមពលអគ្គិសនីនេះ មានសមត្ថភាពអាចជិះបាន​១១០ គីឡូម៉ែត្រ រាល់ពេលសាកអាគុយម្ដង ស្មើរនឹងតម្លៃ 0.02$ ក្នុងមួយគីឡូម៉ែត្រ​​ ឬ  60$ ក្នុងមួយខែ។ 

សម្រាប់ព័ត៌មានបន្ថែម​ សូមទៅកាន់គេហទំព័រផ្លូវការរបស់ ៖http://onionev.com