រាជធានីភ្នំពេញ៖ ព្រះសង្ឃ៣អង្គ និង លោកតាអាចារ្យម្នាក់ ត្រូវបានក្រុមគ្រូពេទ្យចុះទៅនិមន្តដល់វត្តសំបូរមាស ទាំងយប់ ថ្ងៃទី២៨ ខែមីនា ឆ្នាំ២០២១ ឡើងឡានពេទ្យ ដើម្បីធ្វើចត្តាឡីស័ក ក្រោយពីព្រះសង្ឃទាំង៣អង្គ បានចូលរួមសូត្រមន្តនៅក្នុងពិធីបុណ្យសព បុរសចំណាស់ម្នាក់មានវិជ្ជមានកូវីដ១៩ ដែលបានទទួលមរណភាព កាលពីថ្ងៃទី២៧ ខែមីនា កន្លងទៅនេះ ស្ថិតនៅចំណុចផ្ទះល្វែង តាមបណ្តោយផ្លូវ៨១ ក្នុងបុរីសូនី ក្នុងសង្កាត់ស្ទឹងមានជ័យ៣ ខណ្ឌមានជ័យ។
![](https://s9.kh1.co/b1/b154ffc55dc0a7cb9c41b1c879b03bf6ad74253e.jpg)
បើតាមការឱ្យដឹងពីលោក តុន តូនី នាយប៉ុស្តិ៍រដ្ឋបាលនគរបាលខណ្ឌដង្កោ បានបញ្ជាក់ថា នៅថ្ងៃទី២៩ ខែមីនា ឆ្នាំ២០២១នេះ ថា ក្នុងពិធីបុណ្យសពនេះ ក៏មានតាអាចារ្យវត្តសំបូរមាសម្នាក់ផងដែរដែលបានចូលរួម ហើយត្រូវបានក្រុមគ្រូឱ្យធ្វើចត្តាឡីស័កផងដែរ តាំងពីដឹងលទ្ធផលថា សព្វជនរងគ្រោះ មានវិជ្ជមានកូវីដ១៩ ព្រោះតាអាចារ្យមានការប៉ះពាល់ផ្ទាល់ជាមួយសពអ្នកជំងឺកូវីដ។
លោកនាយប៉ុស្តិ៍រដ្ឋបាលនគរបាលខណ្ឌដង្កោ បានបន្តទៀតថា ព្រះសង្ឃទាំង៣អង្គ ក្រោយពីដឹងថា បុរសដែលស្លាប់ មានវិជ្ជមានកូវីដ ព្រះសង្ឃទាំង៣ អង្គ មិនបាននិមន្តនៅទីណាឡើយ ក្រៅពីគង់នៅក្នុងកុដ ហើយក៏មិនបានប៉ះពាល់ជាមួយព្រះសង្ឃផ្សេងទៀតឡើយ ចាប់ពីពេលដែលត្រឡប់ពីសូត្រមន្តនៅក្នុងពិធីបុណ្យសពរួច។ រហូតដល់យប់ថ្ងៃទី២៨ ខែមីនា រថយន្តសាម៉ុយរបស់ក្រុមគ្រូពេទ្យ បានទៅនិមន្តដល់វត្តសំបូរមាស ដើម្បីនិមន្តអញ្ជើញព្រះតេជគុណទាំង៣អង្គ ទៅធ្វើចត្តាឡីស័ក នៅសណ្ឋាគារ The Great Dukes ស្ថិតនៅសង្កាត់ទំនប់ទឹក ខណ្ឌបឹងកេងកង។
![](https://s9.kh1.co/e0/e0901044a865d9b6f2916a5cccf15328ef4e0ac9.jpg)
ដោយឡែក ផ្ទះបុណ្យសពរបស់បុរសចំណាស់វ័យ៧៨ឆ្នាំម្នាក់ ដែលបានស្លាប់ព្រោះកូវីដ១៩ ត្រូវបានហ៊ុំព័ទ្ធខ្សែជុំវិញ នឹងមានកងកម្លាំងការពារសន្តិសុខ នៅតំបន់នោះផងដែរ ។ ក្នុងនោះ សមាជិក ក្រុមគ្រួសារសាច់ញាតិ ដែលបានចូលរួមនៅក្នុងពិធីបុណ្យចំនួន១៨នាក់ មានស្រី៨នាក់ ត្រូវតម្រូវអោយធ្វើចត្តាឡីស័ក នៅក្នុងផ្ទះខាងលើ ដើម្បីរងចាំធ្វើតេស្តសំណាក រកមេរោគកូវីដ-១៩ ផងដែរ។
![](https://s9.kh1.co/99/99e51117487b6573a599d137ac7dd99b910fdcd0.jpg)
នៅថ្ងៃទី២៧ ខែមីនា ឆ្នាំ២០២១ បុរសចំណាស់ខាងលើ ក៏បានស្លាប់ ទាំងដែលលទ្ធផលធ្វើតេស្តសំណាកមិនទាន់ចេញ ។ បន្ទាប់ពីស្លាប់ភ្លាមៗ បងប្អូនសាច់ញាតិ បានរៀបចំ រោងធ្វើបុណ្យ លក្ខណៈទ្រង់ទ្រាយតូច ប៉ុន្តែត្រូវបានក្រុមអាជ្ញាធរមូលដ្ឋាន ចុះធ្វើការឃាត់តែម្តង មិនតម្រូវអោយមានការប្រមូលផ្តុំឡើយ ។ លុះដល់វេលាយប់ឡើង លទ្ធផលសំណាកចេញមកបង្ហាញថា គាត់មានវិជ្ជមានកូវីដ១៩ ក៏ត្រូវក្រុមគ្រូពេទ្យ ចុះទៅដឹកសព ចេញពីផ្ទះរបស់គាត់តែម្តង៕
ប្រភព៖ Koh Santepheap
![](https://s9.kh1.co/b7/b7b665f2336ed4f13af1486debc3ad0a1127dcb8.jpg)
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]