បើអ្នកធ្លាប់ចូលហូបអាហារនៅហាងនេះ ហើយមានអាការមិនស្រួល ឬសង្ស័យ សូមរួសរាន់ទៅធ្វើតេស្តរកមេរោគកូវីដ១៩

ភ្នំពេញ៖ ​អនុគណៈកម្មការស្រាវជ្រាវជំងឺកូវីដ-១៩ នា​រសៀលថ្ងៃទី ២៩ ខែមីនា ឆ្នាំ ២០២១នេះ បានធ្វើការ​អំពាវនាវដល់ប្រជាពលរដ្ឋ ដែលធ្លាប់បានហូបអាហារនៅហាង Pepper Lunch សាខាផ្សារទំនើប អ៊ីអន ១ ជាន់ទី២, អគារលេខ ១៣២, ផ្លូវសុធារស សូមប្រញាប់ទៅធ្វើតេស្តរកមេរោគកូវីដ១៩ ប្រសិនបើអ្នកមានរោគសញ្ញាដូចជា គ្រុនក្ដៅ ក្អក កណ្ដាស់ ឈឺបំពង់ក ដកដង្ហើមខ្លីៗ ឬសង្ស័យ ដោយហេតុថា កាលពីថ្ងៃទី ២១ ខែមីនា ឆ្នាំ២០២១ វេលាម៉ោង ១៩ៈ២០នាទី ធ្លាប់មានអ្នកវិជ្ជមានកូវីដ១៩ បានទៅហូបអាហារនៅទីនោះ។ ​ដោយឡែក សម្រាប់អ្នកដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ។

សូមបញ្ជាក់ដែរថា ទីតាំងដែលបងប្អូនអាចទៅធ្វើតេស្ដរកជំងឺកូវីដ-១៩ បាន មាននៅវិទ្យាល័យ​បាក់ទូក​ វិទ្យាល័យ​បឹង​ត្របែក​ មណ្ឌលសុខភាពចាក់អង្រែក្រោម មន្ទីរ​ពេទ្យខ្មែរ-សូវៀត​ សាលាបឋមសិក្សាសុភមង្គល និងមន្ទីរពេទ្យបង្អែកនៅតាមបណ្តាខេត្តនានា​។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ប្រភព៖ អនុគណៈកម្មការស្រាវជ្រាវជំងឺកូវីដ១៩