ពេលយើងមានចេញរោគសញ្ញាអាលែកហ្ស៊ី យើងពិតជាត្រូវប្រើថ្នាំដើម្បីបន្ថយរោគសញ្ញានោះវិញ។ យ៉ាងណា ពេលយើងរងការរំខានញឹកញាប់ពេកពីការប្រែប្រួលអាកាសធាតុ និងសារធាតុផ្សេងៗនៅជុំវិញខ្លួន ដែលនាំឲ្យយើងកើតមានរោគសញ្ញាអាលែកហ្ស៊ី នោះជាពេលយើងគួរគិតដល់របបអាហារដែរហើយ។
របបអាហារពិតណាស់មិនអាចព្យាបាលអាលែកហ្ស៊ីបានទេ តែរបបអាហារត្រឹមត្រូវអាចជួយបន្ថយរោគសញ្ញាអាលែកហ្ស៊ីបាន។ បន្លែ និងផ្លែឈើមានសារធាតុចិញ្ចឹមច្រើនយ៉ាង អាចជួយឲ្យរាងកាយយើងមានសុខភាពល្អ និងក៏ប្រហែលជាអាចជួយការពារយើងបានពីបញ្ហាអាលែកហ្ស៊ីដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. ខ្ទឹមបារាំង
ខ្ទឹមបារាំង ម្រេច និងពពួកផ្លែបឺរី មានផ្ទុកសារធាតុម្យ៉ាងឈ្មោះថាQuercetin។ អ្នកជំនាញវេជ្ជសាស្រ្តលើកឡើងថាសារធាតុ Quercetin គឺជាសារធាតុគីមីរុក្ខជាតិ អាចជួយកាត់បន្ថយប្រតិកម្មហ៊ីស្តាមីន។ ហ៊ីស្តាមីន គឺជាផ្នែកមួយនៃការឆ្លើយតបទៅនឹងប្រតិកម្មអាលែកហ្ស៊ី។
២. ខាត់ណាខៀវ
ខាត់ណាខៀវត្រូវគេដឹងថាជាអាហារល្អបំផុតមួយចំពោះសុខភាព និងសម្បូរដោយវីតាមីនC ជួយសម្អាតការរាំងស្ទះនៅប្រហោងឆ្អឹងច្រមុះ។ ការសិក្សារកឃើញថា ការទទួលបានវីតាមីន C ប្រហែល៥០០មិល្លីក្រាមប្រចាំថ្ងៃអាចជួយសម្រួលដល់រោគសញ្ញាអាលែកហ្ស៊ី។ខាត់ណាខៀវប្រហែល៩០ក្រាម មានផ្ទុកវីតាមីនC ប្រហែល៨០មិល្លីក្រាម។
៣. ខ្ញី
រោគសញ្ញាដែលរំខានបំផុតកើតចេញពីអាលែកហ្ស៊ី គឺការរលាកជាលិកា ដូចជាហើម រមាស់ច្រមុះ ភ្នែក និងបំពង់ក។ ខ្ញី អាចជួយកាត់បន្ថយរោគសញ្ញាទាំងនេះបាន។
ជាច្រើនរយឆ្នាំមកហើយ ដែលមនុស្សយើងបានប្រើប្រាស់ខ្ញីជាឱសថធម្មជាតិសម្រាប់ព្យាបាលបញ្ហាសុខភាពដូចជាចង្អោរ និងឈឺសន្លាក់ជាដើម។ ខ្ញី មានផ្ទុកសារធាតុប្រឆាំងអុកស៊ីតកម្ម និងប្រឆាំងការរលាក។ មកដល់ពេលនេះ អ្នកជំនាញបានរកឃើញទៀតថា ខ្ញីក៏មានប្រយោជន៍ក្នុងការប្រឆាំងនឹងអាលែកហ្ស៊ីតាមរដូវកាល។ ខ្ញីត្រូវអ្នកជំនាញជឿថាមានសមត្ថភាពទប់ស្កាត់ការផលិតប្រូតេអ៊ីនរលាកនៅក្នុងឈាម ដែលអាចនាំឲ្យកាត់បន្ថយរោគសញ្ញាអាលែកហ្ស៊ី។
៤. រមៀត
រមៀតត្រូវគេស្គាល់ជាទូទៅថា ជាឃ្លាំងស្តុកសារធាតុប្រឆាំងនឹងការរលាក។ សារធាតុផ្សំនៅក្នុងរមៀតមានទំនាក់ទំនងនឹងការកាត់បន្ថយរោគសញ្ញានៃជំងឺដែលបង្កឲ្យមានការរលាក និងអាចជួយកាត់បន្ថយអាការៈហើម និងផលរំខានផ្សេងៗពីបញ្ហាអាលែកហ្ស៊ីផង។ ការសិក្សាមួយធ្វើឡើងលើសត្វកណ្ដុររកឃើញថា រមៀតអាចជួយកាត់បន្ថយការឆ្លើយតបទៅនឹងសារធាតុបង្កអាលែកហ្ស៊ី។
៥. ម្នាស់
ម្នាស់មានផ្ទុកអង់ហ្ស៊ីមមួយហៅថា bromelain។ តាមការសិក្សា អង់ស៊ីមប្រភេទនេះ អាចជួយកាត់បន្ថយផលរំខានពីជំងឺអាលែកហ្ស៊ី ដូចជាជំងឺហឺត ព្រោះថាបញ្ហាអាលែកហ្ស៊ី ក៏អាចនាំឲ្យកើតជំងឺហឺតដែរ។
៦. ទឹកឃ្មុំក្នុងតំបន់
ទឹកឃ្មុំក្នុងតំបន់សំដៅដល់ទឹកឃ្មុំដែលយកពីឃ្មុំនៅក្នុងតំបន់ដែលយើងកំពុងរស់នៅ។ ការសិក្សារកឃើញថា បើសិនជាយើងបានញ៉ាំទឹកឃ្មុំនោះមុនពេលរដូវបង្កអាលែកហ្ស៊ីចូលមកដល់ រាងកាយយើងអាចនឹងស៊ាំទៅនឹងលម្អងផ្កា ចេញពីតំបន់ដែលយើងរស់នៅដែរ។ សម្រាប់អ្នកមានបញ្ហាអាលែកហ្ស៊ីតាមរដូវកាល គឺអាចបង្កឡើងដោយលម្អងផ្កាឈើនៅក្នុងតំបន់យើងរស់នៅនេះឯង ហើយទឹកឃ្មុំក្នុងតំបន់ក៏មានផ្ទុកលម្អងផ្កាឈើនេះដូចគ្នា។ ពេលយើងបានញ៉ាំទឹកឃ្មុំមុនរដូវកាលផ្កាឈើចូលមកដល់ នោះរាងកាយនឹងធន់ទៅនឹងលម្អងផ្កាទាំងនោះ អាចជួយបន្ថយរោគសញ្ញាអាលែកហ្ស៊ីនោះដែរ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
