អ្នកជំនាញឥណ្ឌា យកទឹកទន្លេមកពិនិត្យសំណាក រកឃើញ មានវីរុសកូវីដ ក្រោយសពអ្នកឆ្លងកូវីដអណ្តែតក្នុងទន្លេ

ឥណ្ឌា៖ វីរុសកូវីដ១៩ ត្រូវបានគេរកឃើញនៅក្នុងសំណាកទឹកដែលយកចេញពីទន្លេ Sabarmati ក្នុង Ahmedabad។ ហើយ វីរុសនេះ ត្រូវបានគេរកឃើញ នៅក្នុងសំណាកដែលយកចេញពីបឹងKankria និង Chandola ផងដែរ។

សំណាកពីទឹកទន្លេ Sabarmati និងបឹង Chandola និង Kankria ត្រូវបានប្រមូលយកមកពិសោធន៍ ដោយអ្នកស្រាវជ្រាវនៃវិទ្យាស្ថានIIT និងសាលាវិទ្យាសាស្ត្របរិស្ថាននៃសាកលវិទ្យាល័យGandhinagar និង Jawaharlal Nehru។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោងតាមសាស្រ្តាចារ្យ Manish Kumar នៃនាយកដ្ឋានវិទ្យាសាស្ត្រផែនដីនៅវិទ្យាស្ថាន IIT បាននិយាយថា វត្តមានរបស់វីរុសកូវីដ១៩ នៅក្នុងបឹងនិងទន្លេ អាចនាំឱ្យមានស្ថានភាពគ្រោះថ្នាក់ថែមទៀត។

លោកសាស្រ្តាចារ្យ Kumar បន្ថែមទៀតថា ពួកគេបានប្រមូលសំណាកទឹកម្តង ជារៀងរាល់សប្តាហ៍នៅចន្លោះថ្ងៃទី ៣ ខែកញ្ញាដល់ថ្ងៃទី ២៩ ខែធ្នូឆ្នាំ ២០១៩ ខណៈពេលដែលសំណាកចំនួន ៦៩៤ ត្រូវបានប្រមូលពីទន្លេ Sabarmati ចំនួន ៥៤៩ ត្រូវបានយកចេញពីបឹង Chandola និង ៤០២ ពីបឹង Kankria ។

ជាមួយគ្នានេះដែរ អ្នកស្រាវជ្រាវ ចង់ឱ្យមានការធ្វើតេស្តស្រដៀងគ្នានេះនៅទូទាំងប្រទេសឥណ្ឌាតែម្តង។ ដោយ អ្នកជំនាញទាំងនេះ បាននិយាយថាវីរុសកូវីដ១៩ នេះអាចរស់នៅក្នុងទឹកបានយូរ។

គួររំលឹកផងដែរថា កាលពីពេលថ្មីៗនេះ សាកសពរបស់អ្នកឆ្លងរោគ Covid-19 ត្រូវបានគេប្រទះឃើញអណ្តែតនៅក្នុងទន្លេ Ganga ក្នុងរដ្ឋ Uttar Pradesh និងរដ្ឋ Bihar ។ របាយការណ៍ក្នុងតំបន់បានអះអាងថាមានសាកសពជាង ១០០ ត្រូវបានគេបោះចោលចូលក្នុងទឹកទន្លេ៕

ប្រភព៖ India Today