អាជ្ញាធរ សម្រេចបិទជាបណ្តោះអាសន្ន ផ្សារដើមស្រល់ ស្ថិតនៅភូមិ២ ខណ្ឌជ្រោយចង្វារ ដើម្បីទប់ស្កាត់ជំងឺកូវីដ១៩

រាជធានីភ្នំពេញ៖​ អាជ្ញាធរខណ្ឌជ្រោយចង្វារ សម្រេចផ្អាកជាបណ្តោះអាសន្នផ្សារដើមស្រល់ ដែលមានទីតាំងស្ថិតនៅភូមិ២ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ នៅថ្ងៃទី០៧ ខែកក្កដា ឆ្នាំ២០២១។

យោងតាមសេចក្តីសម្រេច ត្រង់ប្រការ ១ បានបញ្ជាក់ថា ត្រូវផ្អាកដំណើរការជាបណ្តោះអាសន្នផ្សារដើមស្រល់ ដែលមានទីតាំងស្ថិតនៅក្នុងភូមិ២ សង្កាត់ជ្រោយចង្វារ ខណ្ឌជ្រោយចង្វារ ក្នុងរាជធានីភ្នំពេញ សម្រាប់រយៈពេល ១៤ ថ្ងៃ ដោយគិតចាប់ថ្ងៃទី០៧ ខែកក្កដា រហូតដល់ថ្ងៃទី២០ ខែកក្កដា ឆ្នាំ២០២១ ដោយសារតែមានករណីវិជ្ជមានកូវីដ១៩ កើតឡើងថ្មី ក្នុងចំណោមអាជីវករដែលកំពុងធ្វើអាជីវកម្មនៅក្នុងផ្សារ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ត្រង់ប្រការ២ នៃសេចក្តីសម្រេច បានឱ្យដឹងថា​ សន្តិសុខ បុគ្គលិក កម្មករ អាជីវករ អតិថិជន និង អ្នកពាក់ព័ន្ធ ត្រូវចូលរួមសហការជាមួយអាជ្ញាធរមូលដ្ឋាន មន្ត្រីជំនាញ និង មន្ត្រីសុខាភិបាល ដើម្បីទៅយកសំណាកវិភាគរកមេរោគកូវីដ១៩ នៅវិទ្យាល័យបាក់ទូក និង មជ្ឈមណ្ឌលម៉ូឌែន៥ និង​ត្រូវធ្វើចត្តាឡីស័កឱ្យបានត្រឹមត្រូវ តាមណែនាំរបស់ក្រសួងសុខាភិបាល។ គណៈកម្មការផ្សារដើមស្រល់ ត្រូវចូលរួមសហការជាមួយអាជ្ញាធរមូលដ្ឋាន មន្ត្រីជំនាញ មន្ត្រីសុខាភិបាល ដើម្បីស្រាវជ្រាវ និងកំណត់អ្នកប៉ះពាល់ផ្សេងៗទៀត ព្រមទាំងចូលរួមសហការអនុវត្តរាល់វិធានការរដ្ឋបាល និង​វិធានការសុខាភិបាល៕