សម្រស់គឺជារឿងដ៏សំខាន់មួយចំពោះស្រីៗយើង។ ប៉ុន្តែប្រសិនបើស្បែកមុខរបស់មានបញ្ហាផ្សេងៗដូចជាមុន ស្នាមអាចម៍រុយ ឬស្នាមជាំផ្សេងៗ វានឹងធ្វើឲ្យយើងគ្មានទំនុកចិត្តលើខ្លួនឯង តានតឹង និងមិនហ៊ានសូម្បីតែសម្លឹងមើលកញ្ចក់។ ពិតណាស់ មុនគឺជាបញ្ហាស្បែកទូទៅដែលគ្នាស្រីៗភាគច្រើនតែងតែជួបប្រទះ។ យ៉ាងណាមិញ ដើម្បីកម្ចាត់មុនប្រកបដោយប្រសិទ្ធភាព គ្នាយើងគប្បីយល់ដឹងពីមូលហេតុបង្កឲ្យបានច្បាស់លាស់ និងវិធីថែទាំនៅពេលឡើងមុន។
មូលហេតុចម្បងធ្វើឲ្យឡើងមុន
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស- ការផលិតជាតិខ្លាញ់ច្រើនលើសលប់
- ការឆ្លងបាក់តេរី
- ការរលាកស្បែក
- របបអាហារជាក់លាក់
- បញ្ហាអ័រម៉ូន
យើងអាចកម្ចាត់មុននៅផ្ទះដោយខ្លួនឯងតាមវិធីណាខ្លះ?
ស្រីៗយើងអាចសាកល្បងតិចនិកថែទាំតាមបែបធម្មជាតិ ដើម្បីកម្ចាត់មុននៅផ្ទះដោយខ្លួនឯង ប៉ុន្តែយើងគប្បីលាបរូបមន្តធម្មជាតិទាំងនេះសាកល្បងនៅលើដៃជាមុនសិនដើម្បីដឹងថាវាមានប្រតិកម្មឬយ៉ាង និងមិនត្រូវធ្វើវាញឹកញាប់ពេកនោះទេ។
១. ម៉ាសខ្ទឹមស និងប្រទាលកន្ទុយក្រពើ
ប្រទាលកន្ទុយក្រពើមានគុណប្រយោជន៍ក្នុងការផ្ដល់សំណើមដល់ស្បែក ចំណែកឯខ្ទឹមសអាចប្រឆាំងនឹងការបង្ករោគបានយ៉ាងស័ក្ដិសិទ្ធិ។ ដូចនេះហើយ នៅពេលដែលយើងប្រើម៉ាសដែលផ្សំពីគ្រឿងផ្សំធម្មជាតិទាំង២មុខនេះ វានឹងធ្វើឲ្យមុនឆាប់ជាសះស្បើយ។
របៀបធ្វើ៖ បុកខ្ទឹមសដែលបកសំបករួចឲ្យម៉ត់ល្អ និងលាយសាច់ប្រទាលកន្ទុយក្រពើស្រស់ចំនួន១ស្លាបព្រាកាហ្វេ រួចកូរបញ្ចូលគ្នាឲ្យសព្វល្អ ទើបលាបវានៅលើកន្លែងដែលមានមុន។ ទុកចោលរយៈពេល២០នាទី បន្ទាប់មកលាងជម្រះជាមួយនឹងទឹកក្ដៅឧណ្ហៗជាការស្រេច។ ចូរធ្វើវាម្ដងក្នុងមួយថ្ងៃ រហូតដល់មុនស្រកចុះ។
២. សំបកចេក
សំបកចេកសម្បូរទៅដោយប៉ូតាស្យូម វីតាមីន និងសារធាតុរ៉ែ ដែលអាចជួយពង្រឹងរបាំងការពារស្បែក ក៏ដូចជាជួយបញ្ចៀសការបំផ្លាញ និងការកើតមុនផងដែរ។
របៀបធ្វើ៖ ចូរកាត់សំបកចេកទុំជាបំបែកតូចៗ ហើយត្រដុសថ្នមៗនៅលើផ្ទៃមុនដែលលាងសម្អាតរួច រយៈពេល១០នាទី។ ធ្វើបែបនេះ២ដងក្នុងមួយថ្ងៃ រយៈពេល២ទៅ៣ថ្ងៃ រហូតដល់បញ្ហាមុនបានធូរស្រាល។
៣. កញ្ចប់តែបៃតង
កញ្ចប់តែបៃតងអាចជួយគ្រប់គ្រងការផលិតខ្លាញ់ ប្រឆាំងនឹងការរលាក និងរារាំងការកកើតឡើងនៃបាក់តេរីដែលបង្កឲ្យកើតមុន។
របៀបធ្វើ៖ យកកញ្ចប់តែចំនួន២ជ្រលក់ទឹកបន្តិច ទើបដាក់ចូលទៅក្នុងទូរទឹកកក។ នៅពេលដែលកញ្ចប់តែត្រជាក់ យើងអាចយកវាមកបិទនៅលើមុន និងទុកចោលរយៈពេល១០នាទី។ ចុងក្រោយ ទើបលាងសម្អាតចេញជាមួយនឹងទឹកត្រជាក់ជាការស្រេច។
៤. ម្សៅសូដា
ជាក់ស្ដែង ម្សៅសូដាជាប្រភពនៃសារធាតុប្រឆាំងនឹងអុកស៊ីតកម្មដ៏ល្អឯក ដែលអាចជួយកម្ចាត់សំណល់ខ្លាញ់ បន្ថយការរលាក ក៏ដូចជាធ្វើឲ្យកម្រិតpHរបស់យើងមានតុល្យភាព។
របៀបធ្វើ៖ ត្រដុសល្បាយម្សៅសូដាជាមួយនឹងទឹកដោយផ្ទាល់នៅលើមុន និងទុកចោលរយៈពេល១០នាទី។ លាងសម្អាតចេញ ក៏ដូចជាបន្តធ្វើវា២ថ្ងៃម្ដង រហូតដល់បញ្ហាមុនបានធូរស្បើយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
