អាជ្ញាធរ ចុះរុះរើបិទភោជនីយដ្ឋាន៣ទីតាំង ដែលផ្គើននឹងបម្រាមរបស់រាជរដ្ឋាភិបាល

រាជធានីភ្នំពេញ៖​ រដ្ឋបាលខណ្ឌពោធិ៍សែនជ័យ នៅរសៀលថ្ងៃទី០៣ ខែសីហា ឆ្នាំ២០២១នេះ ដោយមានការបញ្ជាផ្ទាល់ពី លោក ហែម ដារិទ្ធ អភិបាលនៃគណៈអភិបាលខណ្ឌពោធិ៍ជ័យ លោក ប៉ាង លីដា អភិបាលរងខណ្ឌ និងលោក យិន​ គា នាយករដ្ឋបាលខណ្ឌ បានដឹកនាំកម្លាំងចម្រុះគណៈបញ្ជាការខណ្ឌ ចុះបិទទីតាំង KTV ចំនួន ៣ ទីតាំង ដោយបានដកហូតសម្ភាៈនិងរុះរើស្លាកយីហោជញ្ជាំងបិទបាំង ដែលល្មើសនឹងបទបញ្ជារបស់រាជរដ្ឋាភិបាល ក្នុងការដាក់ចេញវិធានការទប់ស្កាត់នៃការរាលដាលនៃជំងឺកូវីដ១៩ ជាពិសេស មេរោគបំប្លែងថ្មី ដែលតា។

ជាមួយគ្នានេះ ទីតាំងបី ដែលត្រូវបានកម្លាំងចម្រុះគណៈបញ្ជាការខណ្ឌ ចុះបិទនោះមានដូចជា៖

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

១. ភោជនីយដ្ឋាន ពិភពតារារះ

២.ភោជនីយដ្ឋាន រស្មី ពន្លឺពេជ្រ

៣. ភោជនីយដ្ឋានបុប្ផារាជធានីភ្នំពេញ

សូមជម្រាបថា ទីតាំងភោជនីយដ្ឋានទាំងនេះ សុទ្ធតែស្ថិតតាមបណ្តោយផ្លូវ២០០៤ ក្នុងភូមិត្រពាំងល្វា២​ សង្កាត់កាកាបទី១ ខណ្ឌពោធិ៍សែនជ័យ។

គួររំលឹកផងដែរថា កាលពីថ្ងៃទី២៩ ខែកក្កដា​ ឆ្នាំ២០២១កន្លងទៅនេះ រដ្ឋបាលរាជធានីភ្នំពេញ បានដាក់ចេញនូវវិធានការរដ្ឋបាល នៅក្នុងភូមិសាស្ត្ររាជធានីភ្នំពេញ សម្រាប់រយៈពេល ១៤ថ្ងៃ ដោយចាប់ពីថ្ងៃទី ២៣៖៥៩ នាទី នាថ្ងៃទី២៩ រហូតដល់ថ្ងៃទី១២ ខែសីហា ឆ្នាំ២០២១នេះ ដើម្បីប្រយុទ្ធ និងទប់ស្កាត់ការឆ្លងការរាលនៃជំងឺកូវីដ១៩។

ក្នុងនោះ បើតាមសេចក្តីសម្រេច ក្នុងអំឡុងពេលនៃការដាក់ចែញវិធានការរដ្ឋបាល ត្រូវបានផ្អាកជាបណ្តោះអាសន្នចំពោះសកម្មភាពការងារមុខរបរ ឬអាជីវករ ដែលមានហានិភ័យខ្ពស់នៃការឆ្លងរាលដាលនៃជំងឺកូវីដ១៩ ដូចជា៖

• សាលារៀន រួមទាំងសាលាបណ្តុះបណ្តាលវិជ្ជារដ្ឋ និងឯកជន ប៉ុន្តែអាចធ្វើការបណ្តុះបណ្តាលតាមប្រព័ន្ធអនឡាញ

• អាជីវកម្មក្លឹបកម្សាន្តគ្រប់ប្រភេទ ជាអាទិ៍ ខារ៉ាអូខេ រង្គសាល ឌីស្កូតែក បៀហ្គាឌិន និងកាស៊ីណូ

• រមណីយដ្ឋាន សារមន្ទីរ សួនកុមារ និងសួនកម្សាន្តនានា

• អាជីវកម្មម៉ាស្សា សូណា និងស្ទីមគ្រប់ប្រភេទ

• ហាងលក់និងសេពគ្រឿងស្រវឹងគ្រប់ប្រភេទ

• រោងភាពយន្ត រោងសម្តែងសិល្បៈ ក្លឹបហាត់ប្រាណ និងមជ្ឈមណ្ឌលកីឡាគ្រប់ប្រភេទ៕