កម្ពុជា អនុញាតិការធ្វើដំណើរ ចំពោះជនជាតិឥណ្ឌា និងជនបរទេសទាំងអស់ ដែលមកពីឥណ្ឌា មកកម្ពុជា

រាជធានីភ្នំពេញ៖ នៅថ្ងៃទី០៦ ខែសីហា ឆ្នាំ២០២១នេះ ក្រសួងសុខាភិបាល ប្រកាសលុបចោលសេចក្តីប្រកាសព័ត៍មានចុះថ្ងៃទី២៧ ខែមេសា ឆ្នាំ២០២១នេះ ស្តីពីការហាមឃាត់ការធ្វើដំណើរចូលមកប្រទេសកម្ពុជា ចំពោះជនជាតិឥណ្ឌា និងជនជាតិបរទេសទាំងអស់ ដែលធ្វើដំណើរមកពីប្រទេសឥណ្ឌា ឬប្រទេសណាក៏ដោយដែលឆ្លងកាត់ប្រទេសឥណ្ឌា។

ក្នុងនោះ យោងតាមចំណារឯកភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយបានលុបចោលការហាមឃាត់ការធ្វើដំណើរចូលមកប្រទេសកម្ពុជាចំពោះជនជាតិឥណ្ឌា និងជនជាតិបរទេសទាំងអស់ ដែលធ្វើដំណើរមកប្រទេសឥណ្ឌា ឬឆ្លងកាត់ប្រទេសឥណ្ឌាឬ មានប្រវត្តិធ្វើដំណើរទៅប្រទេសឥណ្ឌា រយៈពេល៣សប្តាហ៍ មុនចូលមកប្រទេសកម្ពុជា តាមផ្លូវអាកាស ឬផ្លូវគោក។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

សូមជម្រាបថា ការសម្រេចលុបចោលការហាមឃាត់ការធ្វើដំណើររបស់ប្រមុខរាជរដ្ឋាភិបាលកម្ពុជា ធ្វើឡើង ក្រោយពីមើលឃើញសភាពធូរស្រាលនៃការរីករាលជំងឺកូវីដ១៩​ នៅសាធារណរដ្ឋឥណ្ឌា។

ជាមួយគ្នានេះ សេចក្តីប្រកាសនេះ នឹងត្រូវចូលជាធរមាន ចាប់ពីម៉ោង២៣៖៥៩ ថ្ងៃទី០៦ (០០៖០១ ថ្ងៃទី០៧) ខែសីហា ឆ្នាំ២០២១ តទៅ៕