មន្ត្រីថ្នាក់ដឹកនាំ ចំណុះក្រសួងមហាផ្ទៃ​ជាង២០០០នាក់ បានឆ្លងជំងឺកូវីដ១៩ ក្នុងនោះ មានអ្នកស្លាប់២១នាក់

រាជធានីភ្នំពេញ៖ មកដល់ពេលនេះ មានថ្នាក់ដឹកនាំ និងមន្រ្តីចំណុះក្រសួងមហាផ្ទៃជាង២០០០នាក់ បានឆ្លងជំងឺកូវីដ១៩ និងស្លាប់ជាង២០នាក់។​ នេះបើតាមការបញ្ជាក់ពីលោក សេង យូអ៊ាន់ អគ្គនាយកដ្ឋានភស្តុភារ និងហិរញ្ញវត្ថុ។

លោក សេង យូអ៊ាន់ អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ បានបញ្ជាក់ថា មកដល់ពេលនេះមានថ្នាក់ដឹកនាំ និងមន្រ្តីចំណុះក្រសួងមហាផ្ទៃ ២.១៩៨នាក់ បានឆ្លងជំងឺកូវីដ១៩ ក្នុងនោះជាសះស្បើយ ១.៤៤១នាក់ កំពុងព្យាបាល ៧៣៦នាក់ និងស្លាប់ ២១នាក់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ការថ្លែងប្រាប់បែបនេះរបស់លោក សេង យូអ៊ាន់ ធ្វើឡើងនៅក្នុងឱកាស ចូលរួមកិច្ចប្រជុំតាមដានវឌ្ឍនភាពនៃការប្រយុទ្ធប្រឆាំងជំងឺកូវីដ-១៩ របស់ក្រសួងមហាផ្ទៃ តាមប្រព័ន្ធវីដេអូ Zoom កាលពីថ្ងៃទី២១ សីហា ក្រោមអធិបតីភាព សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ ។

ពាក់ព័ន្ធនឹងការចាក់វ៉ាក់សាំងវិញ លោកបានមានប្រសាសន៍ថា គិតត្រឹមថ្ងៃទី១៩ ខែសីហា ឆ្នាំ២០២១ ក្រសួងមហាផ្ទៃ បានទទួលវ៉ាក់សាំងពីក្រសួងសុខាភិបាល ចំនួន២០លើក ស្មើនឹង១០៧,៣២១ដូស និងទទួលបានសម្ភារៈបរិក្ខារមួយចំនួនទៀត។

លោកបានបន្ថែមថា ក្រសួងមហាផ្ទៃ ក៏បានទទួលឧបករណ៍តេស្តរហ័សផ្ដល់ដោយក្រសួងសុខាភិបាល និងទទួលបានពីជំនួយថ្នាក់ដឹកនាំក្រសួង និងសប្បុរសជនជាបន្តបន្ទាប់ ព្រមទាំងបានបញ្ជាទិញឧបករណ៍តេស្តរហ័សនេះបន្ថែមសម្រាប់ការប្រើប្រាស់ផងដែរ។

ជាមួយគ្នានេះដែរ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានផ្ដល់អនុសាសន៍ឱ្យមន្ត្រីទាំងអស់ បន្តការងារអប់រំផ្សព្វផ្សាយអំពីការអនុវត្តការណែនាំ និងវិធានការរបស់ក្រសួងសុខាភិបាល  និងត្រូវជំរុញការចាក់វ៉ាក់សាំងឱ្យបាន តាមគោលការណ៍ក្រសួងសុខាភិបាលផងដែរ៕