បុរសជឿនលឿន! សុំ​លុយ​ម្ដាយ យកទៅ​សងបំណុល​គេ មិនបាន ដុត​ផ្ទះចោល​ខ្ទេច​

ខេត្តកណ្តាល៖ ពិតជាខ្លោចចិត្តរកពាក្យអ្វីមកថ្លែងគ្មាន ដោយបុរស​ម្នាក់ សុំ​លុយ​ពី​ម្ដាយ យកទៅ​សងបំណុល​គេ តែ សុំមិនបាន បានសម្រចចិត្តដុត​ផ្ទះ​ចោល​ខ្ទេច។

សូមជម្រាបថា ចំពោះហេតុការណ៍ដុតផ្ទះនេះ ខាងលើកើតឡើង កាលពី​វេលា​ម៉ោង ១២​និង​១៥​នាទី ថ្ងៃទី​២០ ខែសីហា នៅ​ភូមិ​តា​ដោល​ទី​១ ឃុំ​អំពៅព្រៃ ស្រុក​កណ្ដាលស្ទឹង ខេត្តកណ្តាល។ 

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

​ជនរងគ្រោះ ឈ្មោះ យុន ផាត ភេទ​ស្រី អាយុ​៦៨​ឆ្នាំ មាន​ទីលំនៅ​ភូមិ​តា​ដោល​ទី​១ ឃុំ​អំពៅព្រៃ ស្រុក កណ្តាលស្ទឹង ខេត្តកណ្ដាល មុខរបរ​កសិករ ​ត្រូវជាម្តាយរបស់បុរសខាងលើ។ រីឯ​ជនសង្ស័យ ឈ្មោះ សេន ម៉ៅ ភេទ​ប្រុស អាយុ​៣២​ឆ្នាំ មានមុខរបរ​មិន​ពិតប្រាកដ មានទី​លំនៅ ភូមិ​តា​ដោល​ទី​១ ជាមួយគ្នា​។​

​សាក្សី​នៅក្បែរ​កន្លែងកើតហេតុ បានអោយដឹងថា នៅ​ថ្ងៃទី​២០ ខែសីហា ឆ្នាំ​២០២១ មុនពេល​កើតហេតុ ជនសង្ស័យ ឈ្មោះ សេន ម៉ៅ បាន​សុំ​លុយ​ពី​ម្ដាយបង្កើត​របស់ខ្លួន ដើម្បី​យកលុយ ទៅ​សងបំណុល​គេ ប៉ុន្តែ​ម្ដាយ​មិន​ឲ្យ កូនប្រុស​ខឹង ហើយ​បែរជាគំរាម ម្ដាយ​ ​ដុត​ផ្ទះ​ចោល។ លុះថ្ងៃទី​២១ ខែសីហា​ឆ្នាំ ២០២១ ដោយ​ឃើញ​ម្តាយ មិន​នៅផ្ទះ ដោយរូបគាត់​ទៅធ្វើ​ស្រែចម្ការ​ ជនសង្ស័យ ក៏បានឆ្លៀតឱកាស​ឡើងទៅ​លើផ្ទះ ប្រមូល​ខោអាវ ក្រណាត់ មុង​ភួយ ពូក ដា​ក់គ នៅ​មាត់ទ្វារ រួច​ដាក់​គន្លឹះទ្វារ ខាងក្នុង​ជាប់ ដុត​ផ្ទះ បណ្ដាលឱ្យ​ឆេះ ខូចខាត​ទាំងស្រុង​។ បន្ទាប់ពីធ្វើសកម្មភាព​ដុត​ផ្ទះ​រួច ជនសង្ស័យខាងលើ ក៏បាន​ដាក់មេផាយរត់​គេចខ្លួនបាត់ស្រមោល​ភ្លាមតែម្តង។​

​រហូតដល់​ព្រឹក​ថ្ងៃទី​២២ ខែសីហា ឆ្នាំ​២០២១ វេលា​ម៉ោង ០៧​និង​៣០​នាទី ជនសង្ស័យខាងលើ ត្រូវបានកម្លាំង​ប៉ុស្តិ៍ នគរបាល រដ្ឋបាល​ឃុំ​អំពៅព្រៃ ចាប់ខ្លួនបាន រួចបញ្ជូន​មកកាន់ អធិការដ្ឋាន នគរបាល ស្រុក​កណ្តាលស្ទឹង ដើម្បី​កសាង​សំណុំរឿងអនុវត្តទៅតាមផ្លូវច្បាប់៕