អាជ្ញាធរបិទខ្ទប់ផ្សារចក្រី ក្រោយមានការពាក់ព័ន្ធការឆ្លងកូវីដ១៩ ច្រើន

បន្ទាយមានជ័យ៖ នៅថ្ងៃទី២៤ ខែសីហា ឆ្នាំ២០២១នេះ​ រដ្ឋបាលខេត្តបន្ទាយមានជ័យ បានសម្រេចបិទខ្ទប់ផ្សារចក្រី ដែលស្ថិតនៅភូមិចក្រី ឃុំជប់វារី ស្រុកព្រះនេត្រព្រះ ដែលជាទីតាំងមានការពាក់ព័ន្ធ នឹងការឆ្លងរាលដាលនៃជំងឺកូវីដ១៩​ ក្នុងព្រឹត្តិការណ៍សហគមន៍ ២០ កុម្ភៈ។

ការបិទខ្ទប់ផ្សារចក្រីនេះ នឹងធ្វើឡើងរយៈពេលមួយសប្តាហ៍ ក្រោយពីអាជ្ញាធរខេត្តបន្ទាយមានជ័យ បានរកឃើញមានពាក់ព័ន្ធជាមួយអ្នកវិជ្ជមានកូវីដ១៩ ។ គួរបញ្ជាក់ផងដែរថា ការបិទខ្ទប់ផ្សារខាងលើ នឹងត្រូវប្រព្រឹត្តិ គិតចាប់ពីថ្ងៃទី២៤ ខែសីហា ដល់ថ្ងៃទី៣០​ ខែសីហា ឆ្នាំ២០២១ ដើម្បីធានាប្រសិទ្ធភាពនៃគ្រប់គ្រងការឆ្លងរាលដាលនៃជំងឺកូវីដ១៩ ក្នុងព្រឹត្តិការណ៍២០ កុម្ភៈ នៅក្នុងភូមិសាស្ត្រដែលត្រូវបិទខ្ទប់ និងទប់ស្កាត់ជំងឺនេះ មិន​ឱ្យឆ្លងរាលដាលទៅកាន់តំបន់ផ្សេងទៀត។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

សូមជម្រាបថា គិតត្រឹមថ្ងៃទី២៣ ខែសីហា ឆ្នាំ២០២១នេះ រដ្ឋបាលខេត្តបន្ទាយមានជ័យ បន្តរកឃើញករណីវិជ្ជមានកូវីដ១៩ ថ្មីចំនួន ១៩៩ នាក់ និងមានជាអ្នកសះស្បើយចំនួន ១០៥ នាក់៕