ទីបំផុត តុលាការ សម្រេចផ្តន្ទាទោសម្តាយ ពេជ្រ សូលីកា ដាក់ពន្ធនាគារ ក្នុងសំណុំរឿងឃាតកម្ម រយៈពេល....

រាជធានីភ្នំពេញ៖ ចៅក្រមសាលាដំបូងរាជធានីភ្នំពេញ ប្រកាសសាលក្រមសម្រេចផ្ដន្ទាទោសដាក់ពន្ធនាគារកំណត់ ១២ឆ្នាំ​ ចំពោះសំណុំរឿងឃាតកម្មលើស្ត្រីវ័យ៥០ឆ្នាំម្នាក់ ដែលឃាតករ គឺជាម្ដាយបង្កើតរបស់តារាចម្រៀងកញ្ញា ពេជ្រ សូលីកា ពីបទឃាតកម្មតាមមាត្រា ១៩៩នៃក្រមព្រហ្មទណ្ឌ ។ សាលក្រមនេះ ត្រូវបានប្រកាសកាលពីល្ងាចថ្ងៃទី២៥ ខែសីហា ឆ្នាំ២០២១ ដោយលោកស្រីចៅក្រម យិច ឈាណាវី ។

សូមរំលឹកផងដែរថា ករណីឃាតកម្មនេះ បានកើតឡើងកាលពី ថ្ងៃទី១២ ខែមករា ឆ្នាំ២០២០ នៅក្នុង VILLATOWN ផ្លូវលេខV16A ផ្ទះលេខL45A ក្នុងភូមិទួលរកាក្រុម១០ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ វេលាម៉ោង៣រសៀល។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជនជាប់ចោទដែលត្រូវតុលាការផ្ដន្ទាទោស មានឈ្មោះ ស៊ិន ស្រីនាង ភេទស្រី អាយុ៤៥ឆ្នាំ ជនជាតិខ្មែរគ្មានមុខបរពិតប្រាកដ។ មុនពេលចាប់ខ្លួន ស្នាក់នៅផ្ទះលេខ L42A ផ្លូវលេខV16A (បុរីវីឡាថោន) ភូមិទួលរកា សង្កាត់ ចាក់អង្រែក្រោម ខណ្ឌមានជ័យ ដែលជាម្តាយរបស់តារាចម្រៀង ពេជ្រ សូលីកា។

ជនសង្ស័យ បានសារភាពរៀបរាប់ថា ខ្លួនបានយកខ្នើយមកខ្ទប់មុខជនរងគ្រោះ នៅពេលជនរងគ្រោះមកដល់ផ្ទះក្នុងស្ថានភាពស្រវឹង ហើយទន់ដៃទន់ជើង ។ បន្ទាប់ពីសម្លាប់ជនរងគ្រោះហើយ ខ្លួនបានដោះយកគ្រឿងអលង្ការមួយចំនួនពីជនរងគ្រោះ។​ នេះបើតាមការសារភាពនៅក្នុងសវនាការកាលពីថ្ងៃទី១១ ខែសីហា ឆ្នាំ២០២០។

សពស្ត្រីរងគ្រោះមានឈ្មោះ សុខ លី ភេទស្រី អាយុ៤៨ឆ្នាំ មុខរបរចងការប្រាក់ និងរាប់លុយ ស្នាក់នៅសង្កាត់ផ្សារដេប៉ូ១ ខណ្ឌទួលគោក ។ តាមប្រភពព័ត៌មានពីសាច់ញាតិជនរងគ្រោះ កន្លងមក បានបញ្ជាក់ឲ្យដឹងថា ជនរងគ្រោះជាភេទទីបី ស្រីស្រទ្បាញ់ស្រី និងមានរបរជាអ្នកចងការប្រាក់។ ជនរងគ្រោះ ធ្លាប់មានទំនាក់ទំនង ជាមួយនឹងស្ត្រីសង្ស័យខាងលើ ជាយូរមកហើយ ដោយលួចទាក់ទងគ្នាស្ងាត់ៗ លាក់មិនឲ្យគ្រួសារដឹង។

ចំពោះមូលហេតុដែលសម្លាប់ជនរងគ្រោះដោយសារតែភ្លើងប្រច័ន្ទ និងទំនាស់ពាក្យសំដីរឿងទារលុយចងការប្រាក់ចំនួន១៥ ០០០ដុល្លារមកវិញ៕

ប្រភព៖ KT