បុរសម្នាក់ ត្រូវជាប់គុក២ជាតិ ព្រោះប្រើពស់វែក ឲ្យចឹកប្រពន្ធខ្លួនឯង

ឥណ្ឌា៖ បុរសជនជាតិឥណ្ឌាដែលប្រើប្រាស់ពស់វែក ដើម្បីធ្វើឃាតប្រពន្ធរបស់ខ្លួន ត្រូវបានផ្តន្ទាទោសដាក់ពន្ធនាគារ គុណនឹងពីរដែលតុលាការ បានហៅករណីថា ជាករណីកម្របំផុតពុំធ្លាប់មាន។

តាមប្រភពព័ត៌មាន បុរសខាងលើឈ្មោះថា Sooraj Kumar  អាយុ២៨ឆ្នាំ បានប្រលែងពស់វែកប្រភេទ Russel ទៅលើប្រពន្ធរបស់លោកឈ្មោះ Uthra ដែលធ្វើឱ្យនាងធ្លាក់ខ្លួនព្យាបាលនៅមន្ទីរពេទ្យរយៈពេលជិត ២​ខែ។ នេះបើតាមការបញ្ជាក់ឱ្យដឹងពីចៅក្រម។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ខណៈដែលនាងបានជាសះស្បើយធូរស្រាលស្នាក់នៅផ្ទះម្តាយរបស់នាង បុរសជាប្តី បានយកពស់វែកពីគ្រូចាប់ពស់ ហើយបោះពស់នោះដាក់ប្រពន្ធ ដែលកំពុងតែដេកលង់លក់។ ពស់នោះបានចឹកប្រពន្ធស្លាប់តែម្តង កាលពីខែឧសភា ឆ្នាំ២០២០។

ជាមួយគ្នានោះ​ Kumar ត្រូវបានចាប់ខ្លួនពីផ្ទះរបស់លោក កាលពីឆ្នាំមុន បន្ទាប់ពីឪពុកម្តាយរបស់ Uthra កើតការសង្ស័យលើរូបគេ ហើយចោទថា បុរសជាប្តីរូបនេះ មានបំណងចង់ក្តោបក្តាប់ទ្រព្យសម្បត្តិរបស់ប្រពន្ធ ពេលនាងស្លាប់ទៅ។

ដោយ កាលពីថ្ងៃច័ន្ទ តុលាការ នៅក្នុងស្រុក Kollam ខេត្ត Kerala បានចោទប្រកាន់ Kumar ពីបទមនុស្សឃាត ដោយប្រើប្រាស់សត្វពស់វែក Russell សម្លាប់ប្រពន្ធខ្លួនឯង។ ក្នុងនោះ​ កាលពីថ្ងៃពុធ ចៅក្រម M Manoj  បានផ្តន្ទាទោសដាក់គុក បុរសខាងលើ មួយជីវិត ពីរដងជាប់គ្នា ប៉ុន្តែមិនដាក់ទោសប្រហារជីវិត ដោយសារតែគិតពីអាយុ និងឱកាសកែប្រែខ្លួនរបស់បុរសខាងលើ។

តែយ៉ាងណា Kumar បានបដិសេធថា មិនបានប្រព្រឹត្តិនេះនោះទេ តែប៉ូលីស ថាក្នុងប្រវត្តិនៃការខលលើទូរស័ព្ទរបស់លោក បានខលទៅគ្រូពស់ និង​ បានមើលវីដេអូពស់ នៅលើអ៊ីនធឺណែតទៀតផង មុនពេលឃាតកម្មកើតឡើង ណាមួយ kumar ស្ថិតនៅក្នុងបន្ទប់ជាមួយប្រពន្ធរបស់ខ្លួន បន្ទាប់ពីនាងត្រូវពស់ចឹក៕

ប្រភព៖ Aljazeera