មិនធម្មតា! មកដឹងប្រវត្តិ​ លោក​ គង់​ វិសា​ល​ អ្នកផលិតនិងដឹកនាំកម្មវិធីទូរទស្សន៍ជាង២២ឆ្នាំ​ មានស្នាដៃដឹកនាំកម្មវិធីមិនក្រោម៥០០លើក

ភ្នំពេញ៖​ អ្នកផលិតកម្មវិធីទូរទស្សន៍ និងដឹកនាំកម្មវិធីសិល្បៈរបស់ទូរទស្សន៍បាយ័ន លោកគង់ វិសាល​ ដែលឈរជើងក្នុងវិថីសិល្បៈរយៈពេល២២ឆ្នាំមកហើយនោះ តែងតែយក គោលការណ៍ភាពស្មោះត្រង់ជាដើមទុន​ បើទោះជាលោកដឹងថាភាពស្មោះត្រង់មិនបានធ្វើឲ្យមានបានមែន ប៉ុន្ដែវាធ្វើឲ្យមនុស្សមានតម្លៃ ថ្លៃថ្នូរ ហើយគូបផ្សំសម្ថភាពដែលមានផងនោះ​  នឹងទទួលបានលទ្ធផលវិជ្ជមានជាមិនខាន។​ លោកធ្លាប់និយាយថា​ទោះពេលនេះលោកមិនមែនជាអ្នកមានទ្រព្យស្ដុកស្ដមមែនតែលោកសប្បាយចិត្តដែលធ្វើការងារជាមួយអ្នកសិល្បៈ លោកមានទំនុកចិត្តព្រោះតែលោកតែងតែងយកភាពស្មោះត្រង់មកអនុវត្តន៍ រួមទាំងការដាក់គោលដៅឲ្យបានច្បាស់ផងនោះលោកជឿជាក់ថានឹងរក្សារបាននូវគុណតម្លៃ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

បើរម្លឹកទៅឆ្នាំ១៩៩៩​ ការងារដំបូង​របស់លោក​ គង់ វិសាល ធ្វើជាជំនួយការរបស់អ្នកដឹកនាំ កម្មវិធីនៅប៉ុស្ដិ៍លេខ៣ ហើយនៅឆ្នាំ២០០១ លោកបានក្លាយទៅជាអ្នកសម្របសម្រួល កម្មវិធីធំៗ ជាបន្តរបន្ទាប់​ ។ ក្រោយ ពីបាន រៀនវគ្គបណ្ដុះបណ្ដាលផលិតកម្មវិធីជាច្រើនលើកនៅក្នុងប្រទេសជានិងនៅក្រៅប្រទេសជិតខាងរួចមក លោកគង់ វិ សាល ចាត់ទុកបទពិសោធន៍នៅលើផ្លូវដ៏វែងឆ្ងាយក្នុងវិសយ័សិល្បៈរបស់លោកជាមេរៀនមួយដ៏គាប់ប្រសើរ និង ជាដើមទុនមួយមិនអាចខ្វះបាន ដែលបានត្រួសត្រាយជីវិតលោក ឲ្យដើរមកដល់ចំណុចមួយនេះ ។ 

លោកធ្លាប់បានប្រាប់ថាលោកទទួលបានចំណេះដឹងច្រើនពីការផលិតកម្មវិធីនិងជ្រុងនៃសិល្បៈដោយសារតែមានការបណ្ដុះបណ្ដាលបង្ហាញផ្លូវពីសំណាក់លោកហ្វៃ សំអាង ជាអ្នកដឹកនាំ កម្មវិធីនៅប៉ុស្ដិ៍ លេខ ៣។  ហើយលោកថាបើគេស្ដីឲ្យ ថាឲ្យវាជាមេរៀនធ្វើឲ្យលោករឹងមាំ ធ្វើឲ្យលោកចេះ អត់ធ្មត់ ចេះឈឺចាប់ និងអាចពង្រឹង សម្ថភាព របស់ខ្លួនឲ្យកាន់តែខ្លាំង ទាំងនោះគឺត្រូវតែតាំងចិត្តធ្វើឲ្យបាន ។ ហើយរឿងដែលសំខាន់មួយទៀតដែលលោកត្រូវតែដាក់គោលដៅក្នុងជីវិតឲ្យ បានច្បាស់ លាស់ថាត្រូវដើរទៅផ្លូវណា ? 

លោក​ គង់​ វិសាល​  បានឲ្យដឹងបន្ថែមថា​ កាលពីដំបូងធ្វើជាកូនចៅគេតែលោកតែងមានក្តីស្រម៉ៃ និង ដាក់ បេសកម្មខ្លួនឯងថា នៅថ្ងៃណាមួយលោកត្រូវតែជាអ្នកដឹកនាំគេវិញម្តង។

នៅចុងឆ្នាំ២០០៥ គេឃើញថា​ លោកគង់ វិសាល បានផ្លាស់ចូលមកទូរទស្សន៍ បាយ័ន ហើយរយៈ ពេល ១៦ ឆ្នាំកន្លងមកនេះលោកកាន់តែបង្ហាញស្នាដៃ សិល្បៈលេចត្រដែត ទាំង កម្មវិធី ជាតិ និងអន្ដរជាតិ (ទិញFranchise)នៅស្ថានីយ៍ទូរទស្សន៍ដ៏ល្បីមួយនេះ បើទោះជាប្រៀបធៀបជាមួយអ្នកដឹកនាំសិល្បៈល្បីៗមួយចំនួនក៏ពិតមែន​  តែលោក​ វិសាល មានវ័យក្មេងជាងគេ ហើយបានបន្តរដើរលើវិថីនេះ យ៉ាងជោគជ័យ​ និង បានស្ថិតនៅលើវិថីនេះយូរជាងគេ រហូតមកដល់បច្ចុប្បន្ន ។ 

បើតាមការបង្ហើបពីអ្នកស្និតស្នាល លោក វិសាល បានឲ្យដឹងថារយៈពេល២២ឆ្នាំ​ លោក​បានក្លាយ ទៅជាអ្នកដឹកនាំផលិតកម្មវិធីសិល្បៈ និង រៀបចំការប្រគុំតន្ត្រីច្រើនជាងគេ បទពិសោធន៍របស់លោកធ្លាប់រៀបចំមិនក្រោម ៥០០លើករួចមកហើយ ទាំងលក្ខណៈជាតិ និងអន្ដជាតិ ទើបធ្វើឲ្យអ្នកសិល្បករមានទំនុកចិត្ត និងចាត់ទុកលោកជាមេដឹកនាំម្នាក់ពោរពេញដោយការទទួលខុសត្រូវខ្ពស់ ព្រោះលោកធ្វើការប្រើមនោសញ្ចេតនាជ្រាលជ្រៅ យោគយល់អនុគ្រោះ និងមិនប្រកាន់ពីតួនាទីឡើយព្រមទាំងបានជួយជ្រុមជ្រែងតារាចម្រៀងនិងពិធីករ មួយចំនួនឲ្យមានភាពល្បីល្បាញមានកេរ្តិ៍ឈ្មោះ រហូតមក ដល់បច្ចុប្បន្នផងដែរ ។​ ហើយលោក​ វិសាល​ ក៏ត្រូវបានមហាជនមើល ឃើញថាជាអ្នកដឹកនាំម្នាក់ ដែលលេងខ្លួនស្លៀកពាក់ សង្ហារគ្រប់ពេលមិនចាញ់តារាល្បីៗឡើយ។ថ្មីៗនេះដែរគេឃើញ លោក វិសាល លេចមុខក្នុងកម្មវិ ផ្សាយផ្ទាល់ធំៗរបស់ស្ថានីយ៍ទូរស្សន៍បាយ័ន ស្របពេលដែលជីវិតការងារ នាអតីតកាល គេដឹងថាលោកក៍ធ្លាប់ដឹកនាំ និងរៀបចំកម្មវិធីប្រកួតFreshie ជាច្រើនរដូវកាលផងដែរ។

លោកគង់ វិសាល ប្រកាន់និយមន័យថា​ ភាពស្មោះត្រង់,សេចក្តីព្យាយាម រក្សារគុណតម្លៃ ,បទពិសោធន៍ ការងារជាច្រើនឆ្នាំក៏ជាគន្លឹះល្អនាំអោយយើងក្លាយជាមនុស្សជោគជ័យទៅថ្ងៃខាងមុខពិតប្រាកដណាស់ ស៊ូដើរយឺតតែដាច់ខាតយើងមិនត្រូវថយក្រោយ”៕