ធុងសំរាម ច្នៃចេញជារូបរាងក្អម និងអង្រុត ត្រូវបានដាក់តាមសាលារៀនក្នុងក្រុងភ្នំពេញ

ភ្នំពេញ៖ នាពេលថ្មីៗនេះ ក្រសួងបរិស្ថានបរិស្ថាន បានបង្ហាញពីការគាំទ្រ ការច្នៃប្រឌិត ធុងសំរាម ជារូបរាងក្អម និងអង្រុត ក្នុងគោលបំណងបង្ហាញអំពីអត្តសញ្ញាណរបស់ខ្មែរ។

ដោយឡែក ក្រសួងបរិស្ថាន បានគាំទ្រដល់គម្រោងបំពាក់ធុងសំរាមតាមសាលារៀន ស្ថិតក្នុងរាជធានីភ្នំពេញ តាមរយៈសហភាពសហព័ន្ធយុវជនកម្ពុជា រាជធានីភ្នំពេញ ដើម្បីលើកកម្ពស់ការចូលរួមពង្រឹងចំណេះដឹងអនាម័យបរិស្ថានតាមសាលារៀន សោភ័ណភាពស្អាត និងសុខភាពសិក្សា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

នាព្រឹក ថ្ងៃទី៨ ខែវិច្ឆិកា ឆ្នាំ២០២១ លោក សន ប៊ុនមាន អនុប្រធានលេខាធិការដ្ឋាន រួមជាមួយសមាជិកមួយចំនួនបានចូលរួមជាមួយតំណាងក្រសួងបរិស្ថាន បានប្រគល់ធុងសំរាមដល់សាលារៀននៅក្នុងខណ្ឌចំការមន ចំនួន ១០ទីតាំង និងខណ្ឌបឹងកេងកង ចំនួន ៥ទីតាំង ជាជំហានទី១ ដោយមានការចូលរួមពីតំណាងគណៈអភិបាលខណ្ឌចំការមន-ខណ្ឌបឹងកេងកង តំណាងការិយាល័យអប់រំខណ្ឌ គណៈគ្រប់គ្រងសាលា នាយកសាលា និងយុវជនមួយចំនួន។

យ៉ាងណាមិញ ធុងសំរាម បានច្នៃប្រឌិតឡើងជារូបរាងក្អម និងអង្រុត មានគោលបំណងបង្ហាញអំពីអត្តសញ្ញាណរបស់ខ្មែរ និងចូលរួមថែរក្សានូវកេរ្តិ៍ទុកឱ្យក្មេងជំនាន់ក្រោយ ជាពិសេស បណ្តុះស្មារតីឱ្យប្អូនៗសិស្សានុសិស្ស ដែលជាទំពាំងស្នងឬស្សី មានផ្នត់គំនិតក្នុងការទុកដាក់សំរាមឱ្យបានត្រឹមត្រូវ ការយល់ដឹងពីអនាម័យបរិស្ថាន និងការចូលរួមលេីកកម្ពស់សោភណ្ឌភាពស្អាតតាមសាលារៀនផងដែរ៕

សូមចូលទស្សនារូបភាពខាងក្រោម៖