អគ្គនាយកពន្ធដារទស្សនកិច្ចក្រុមហ៊ុនបង់ពន្ធច្រើនជាងគេបំផុតនៅកម្ពុជា HEINEKEN ដាក់ឲ្យដំណើរការឧបករណ៍វាស់ចំណូលពន្ធដំបូងក្នុងប្រទេស!

ភ្នំពេញ៖ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានធ្វើទស្សនកិច្ចមកកាន់ក្រុមហ៊ុន HEINEKEN Cambodia ដែលជាក្រុមហ៊ុនផលិតស្រាបៀរឈានមុខគេមួយក្នុងប្រទេសកម្ពុជា ដើម្បីចាប់ផ្តើមដាក់ឲ្យដំណើការឧបករណ៍វាស់ចំណុះស្រាបៀរបស់រោងចក្រផលិតស្រាបៀរមួយនេះ ដែលជាឧបករណ៏វាស់ចំណុះស្រាបៀរទីមួយនៅកម្ពុជា និងដើម្បីប្រគល់ប័ណ្ណសរសើរផ្លូវការពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីទទួលស្គាល់ក្រុមហ៊ុនថាជាអ្នកបង់ពន្ធច្រើនជាងគេបំផុតនៅកម្ពុជា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ឯកឧត្តម គង់ វិបុល បានធ្វើទស្សនកិច្ចមកកាន់រោងចក្រផលិតស្រាបៀរដ៏ទំនើបរបស់ក្រុមហ៊ុន HEINEKEN Cambodia នៅថ្ងៃពុធ ទី១០ ខែវិច្ឆិកានេះ នៅជាយរាជធានីភ្នំពេញ ដើម្បីដាក់សម្ពោធការដំឡើងឧបករណ៍វាស់ចំណុះ (Flowmeter) នៅរោងចក្រផលិតស្រាបៀរ។ ក្នុងអំឡុងពេលទស្សនកិច្ចរយៈពេលមួយម៉ោងនេះ ឯកឧត្តមបានដាក់អោយដំណើរការឧបករណ៍វាស់ចំណុះស្រាបៀររបស់ក្រុមហ៊ុន HEINEKEN Cambodia ដែលជាឧបករណ៍វាស់ចំណុះដំបូងក្នុងប្រទេស ដែលត្រូវបានដំឡើងនៅទីតាំងផលិតស្រាបៀរ និងភេសជ្ជៈដែលគ្មានជាតិសុរា។

ឧបករណ៏វាស់ចំណុះ គឺជាឧបករណ៍មួយដែលវាស់វែងបរិមាណ ឬអត្រាចំណុះវត្ថុរាវរបស់ក្រុមហ៊ុន HEINEKEN Cambodia នេះ វត្ថុរាវនេះ គឺជាស្រាបៀរ។ អគ្គនាយកដ្ឋានពន្ធដារនាពេលថ្មីៗនេះបានតម្រូវឱ្យក្រុមហ៊ុនផលិតស្រាបៀរ និងភេសជ្ជៈដែលគ្មានជាតិសុរាទាំងអស់នៅទូទាំងព្រះរាជាណាចក្រកម្ពុជា ដំឡើង ឧបករណ៍វាស់ចំណុះនេះ ដើម្បីតាមដានផលិតកម្មស្រាបៀររបស់ក្រុមហ៊ុនផលិតស្រាបៀរ និងភេសជ្ជៈក្នុងគោលបំណងពង្រឹងការប្រមូលពន្ធ។

បន្ទាប់ពីបានពិនិត្យឧបករណ៍វាស់ចំណុះរបស់ក្រុមហ៊ុន HEINEKEN Cambodia និងស្តាប់ក្រុមអ្នកជំនាញរបស់ក្រុមហ៊ុន។ ឯកឧត្តម គង់ វិបុល បានថ្លែងថា៖

«ខ្ញុំសូមកោតសរសើរដល់ក្រុមហ៊ុន HEINEKEN Cambodia សម្រាប់ការធ្វើជាគំរូក្នុងការអនុលោមតាមតម្រូវការរបស់អគ្គនាយកដ្ឋានពន្ធដារក្នុងការដំឡើងឧបករណ៍ដ៏សមស្របនេះ។ តាមរយៈការដំឡើងនេះ ក្រុមហ៊ុន HEINEKEN Cambodia កំពុងធ្វើជាគំរូសម្រាប់ក្រុមហ៊ុនផ្សេងទៀត ដូចដែលយើងបានរំពឹងថានឹងទទួលបានពីក្រុមហ៊ុនដែលបង់ពន្ធច្រើនជាងគេមួយនេះ»។

ប្រសាសន៍របស់ឯកឧត្តម គង់ វិបុល

ក្នុងអំឡុងដំណើរទស្សនកិច្ចនេះ ឯកឧត្តមក៏បានប្រគល់ប័ណ្ណសរសើរដែលមានបោះត្រាដោយសម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។

ឯកឧត្តម គង់ វិបុល និង លោក Chung Wah Samson Wong

ក្នុងការប្រគល់ជូនប័ណ្ណសរសើរនេះ ឯកឧត្តម គង់ វិបុល បានបន្ថែមថា៖

«រាជរដ្ឋាភិបាលកម្ពុជាសូមអរគុណដល់ក្រុមហ៊ុន HEINEKEN Cambodia ចំពោះការចូលរួមចំណែករបស់ក្រុមហ៊ុនដល់ការអភិវឌ្ឍសេដ្ឋកិច្ច និងសង្គមរបស់កម្ពុជាតាមរយៈការបង់ពន្ធ។ នៅក្នុងពេលស្ទុះងើបឡើងវិញក្រោយកូវីដ ព្រះរាជាណាចក្រកម្ពុជាត្រូវការក្រុមហ៊ុន និងសាជីវកម្មកាន់តែច្រើនថែមទៀតដើម្បីធ្វើការងាររបស់ពួកគេក្នុងការជួយដល់សង្គមជាតិ»។

ប្រសាសន៍របស់ឯកឧត្តម គង់ វិបុល

នៅក្នុងការស្វាគមន៍ឯកឧត្តម គង់ វិបុល លោក Chung Wah Samson Wong អគ្គនាយកគ្រប់គ្រងរបស់ក្រុមហ៊ុន HEINEKEN Cambodia បានមានប្រសាសន៍ថា៖

«វាជារឿងធម្មតាទៅហើយដែលក្រុមហ៊ុន HEINEKEN Cambodia ព្យាយាមអនុលោមតាមច្បាប់របស់ព្រះរាជាណាចក្រកម្ពុជា។ យើងគាំទ្រដល់កិច្ចប្រឹងប្រែងរបស់រាជរដ្ឋាភិបាលកម្ពុជាក្នុងការពង្រឹងតម្លាភាព និងការប្រមូលប្រាក់ចំណូលពន្ធប្រកបដោយប្រសិទ្ធភាព។ យើងក៏មានកិត្តិយសផងដែរដែលត្រូវបានទទួលស្គាល់ដោយសម្តេចនាយករដ្ឋមន្ត្រីថាជាអ្នកបង់ពន្ធធំទី១ នៅក្នុងប្រទេស។ ការចូលរួមចំណែករបស់យើងចំពោះពន្ធគឺគ្រាន់តែជាមធ្យោបាយមួយប៉ុណ្ណោះក្នុងចំណោមមធ្យោបាយជាច្រើនដែលក្រុមហ៊ុន HEINEKEN Cambodia ជួយដល់ការអភិវឌ្ឍរបស់ប្រទេស»។

ប្រសាសន៍របស់លោក Chung Wah Samson Wong

អំពីក្រុមហ៊ុន HEINEKEN Cambodia

មានវត្តមានក្នុងប្រទេសកម្ពុជាស្ថិតក្រោមឈ្មោះ CBL ចាប់តាំងពីឆ្នាំ១៩៩៤មក ក្រុមហ៊ុន HEINEKEN Cambodia បានវិនិយោគទឹកប្រាក់ជាង ២៣០លានដុល្លារអាមេរិកទៅលើរោងចក្រដ៏ទំនើបរបស់ក្រុមហ៊ុនក្នុងរយៈពេល ៥ឆ្នាំចុងក្រោយនេះ។ ក្រុមហ៊ុនមានបុគ្គលិកជិត ៧០០នាក់ ព្រមទាំងផ្ដល់ការងារជូនប្រជាជនកម្ពុជា ១២ម៉ឺននាក់ដែលប្រកបការងារជាផ្នែកមួយនៃបណ្ដាញអាជីវកម្មរបស់ក្រុមហ៊ុន ពោលគឺរាប់ចាប់ពីកសិករដាំដុះស្រូវ រហូតដល់អាជីវករលក់ដូរភេសជ្ជៈនៅតាមហាងនានា។

បច្ចុប្បន្ន ក្រុមហ៊ុន HEINEKEN Cambodia ផលិតស្រាបៀរចំនួន ៥ម៉ាកក្នុងប្រទេសកម្ពុជា ដោយគោរពតាមបទដ្ឋានគុណភាពខ្ពស់បំផុត។ ផលិតចេញពីគ្រឿងផ្សំធម្មជាតិ ១០០% ពីរោងចក្រក្នុងស្រុក ផលិតផលស្រាបៀររបស់ក្រុមហ៊ុន HEINEKEN (Cambodia) នៅកម្ពុជារួមមានស្រាបៀរ Heineken ស្រាបៀរ ABC ស្រាបៀរ Tiger និង Tiger Crystal ស្រាបៀរ Anchor និង Anchor White និងស្រាបៀរ Gold Crown។

ក្នុងនាមជាក្រុមហ៊ុនផលិតស្រាបៀរឈានមុខគេមួយនៅកម្ពុជា ក្រុមហ៊ុន HEINEKEN Cambodia ប្តេជ្ញាចិត្តចំពោះ “ការអភិវឌ្ឍកម្ពុជាដ៏ល្អប្រសើរ” ហើយការអភិវឌ្ឍប្រកបដោយនិរន្តរភាពស្ថិតនៅក្នុងបេះដូងនៃអាជីវកម្មរបស់ក្រុមហ៊ុន៕

រូបភាព

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

SPONSORED CONTENT

In Case You Missed It