ជារឿងចៃដន្យឬយ៉ាងណា គូស្នេហ៍ប៉ុន្មានគូនេះ បែកបាក់គ្នា ដោយសារតែ ការជូនពររបស់់ Zhang Ziyi ?

ចិន៖​ ការពិភាក្សាដ៏រស់រវើកមួយ នៅលើបណ្ដាញសង្គម Weibo ដែលបានលើកឡើង ពីការជូនពរ របស់ តារាស្រី Zhang Ziyi បានទាក់ទាញការចាប់អារម្មណ៍យ៉ាងខ្លាំង ជាពិសេស ពួកគេថែមទាំង​បាន ​រាយ​ឈ្មោះ​គូស្នេហ៍​ល្បី​ៗ​ដែល​ធ្លាប់​ទទួលបានការជូន​ពរជ័យ​ពីនាង ដែលនៅ​ទី​បំផុត ​ទំនាក់ទំនងគូស្នេហ៍តារាប្រុសស្រីទាំងនោះ ​បាន​បែកបាក់គ្នា។ 

នៅក្នុងនោះដែរ មានគូស្វាមីភរិយា និងគូស្នេហ៍ ដូចជា៖ 

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

១. Song Hye Kyo និង Song Joong Ki

នៅពេលដែល Song Hye Kyo និង Song Joong Ki បានប្រកាស ភ្ជាប់ពាក្យ ក៏មានមិត្តរួមការងារ និងមិត្តរួមសិល្បៈជាច្រើនបានអបអរសាទរដល់ពួកគេ រួមទាំង Zhang Ziyi ផងដែរ ហើយតារា​សម្ដែង​ចិនរូបនេះ ​ថែម​ទាំង​បានហោះ​ទៅ​កូរ៉េ​ ដើម្បី​ចូល​រួម​ពិធី​មង្គល​ការ​របស់​តារា​ប្រុសស្រីពីរ​ដួងនេះទៀត។ តែទោះជាយ៉ាងណា ជីវិតអាពាហ៍ពិពាហ៍​របស់​តារាប្រុសស្រីល្បីទាំងពីរ ​មាន​រយៈពេល​ត្រឹមតែ ​២ ​ឆ្នាំ​ប៉ុណ្ណោះ មុន​ពេល​ដែល ​ពួក​គេបាន​ប្រកាស​លែងលះ​គ្នា​ ក្នុង​ឆ្នាំ​២០១៩ ។

២. Nicholas Tse និង Cecilia Cheung

កាលពីមុនមក តារាស្រី Cecilia Cheung និង អតីតស្វាមី លោក Nicholas Tse ធ្លាប់មានជីវិតដ៏សុខសាន្តជាមួយគ្នា ជំនះរាល់សំលេងរំខាន និងឧបសគ្គជាច្រើន តែ នៅពេល តារាស្រី Zhang Ziyi បាន​និយាយ​ពី​ទំនាក់ទំនង​របស់​តារា​ទាំង​ពីរ​ និងបាន​សរសើរ​ថា ​ជា​ស្នេហា​គ្មានការ​ស្ដាយ​ក្រោយនោះ ចុងក្រោយទំនាក់ទំនងមួយនេះ ក៏មិនមានរយៈពេលយូរ ដោយ ពួកគេទាំងពីរ បានលែងលះគ្នា បន្ទាប់ពីរៀបការបាន ៦ ឆ្នាំ។

៣.​ Zhang Liangying និង Michael Feng

នៅពេលដែល តារាចម្រៀងស្រី Zhang Liangying បានប្រកាសរៀបការ ជាមួយនឹងមិត្តប្រុសលោក Michael Feng នៅលើ Weibo តារាស្រី Zhang Ziyi គឺជា មនុស្សដំបូងគេ ដែលបានចូលមកអបអរសាទរបាន​សរសេរ​ជូនពរថា​ «​ផ្តល់​អ្វី​ៗ​ដោយ​ក្ដី​ស្រឡាញ់​»​ ចំពោះអតីតគូស្វាមីភរិយាមួយនេះ។ តែ ពីរឆ្នាំក្រោយមក Zhang Liangying និង Michael Feng ក៏បានលែងលះគ្នា។

៤. Dong Xuan និង Gao Yunxiang

អាចនិយាយបានថា តារាស្រី Dong Xuan មានភាពស្និទ្ធស្នាលជាមួយ Zhang Ziyi ទោះបីជា អ្នកទាំងពីរ កម្រនឹងបង្ហាញខ្លួន នៅក្នុងរង្វង់តែមួយក៏ដោយ។ ហើយនៅពេលដែល Dong Xuan ប្រកាសរៀបការ Zhang Ziyi ក៏បានបង្ហោះពាក្យ «ស្លាប» នៅលើ Weibo ដើម្បីជូនពរ គូស្នេហ៍តារាមួយនេះ ឱ្យរស់នៅជាមួយគ្នាពេញមួយជីវិត។ តែ ៨ ឆ្នាំក្រោយមក ដោយសាររឿងអាស្រូវរបស់ Gao Yunxiang ប្តីប្រពន្ធមួយគូនេះ ក៏បានលែងលះគ្នា។

៥. Jing Tian និង Zhang Jike

មានពេលមួយ ដែល តារាស្រី Jing Tian បើកបង្ហាញរឿងស្នេហា នៅលើបណ្តាញសង្គម តារាស្រី Zhang Ziyi បានសរសើរថា «ផ្អែមល្ហែមណាស់» ។ តែ ត្រឹម​តែ​មួយ​ឆ្នាំ​ ក្រោយ​ពី​មាន​ទំនាក់​ទំនង​ស្នេហាមួយនេះ តារាស្រី Jing Tian និង​កីឡាករ​ប្រុស លោក Zhang Jike ​ក៏បាន​បែក​គ្នា​ដែរ។

យ៉ាងណាមិញ ចំពោះការជូនពររបស់ Zhang Ziyi ចំពោះអតីតគូស្នេហ៍មួយចំនួន ដែលបានឈានដល់ផ្លូវបញ្ចប់ ហាក់ធ្វើឲ្យអ្នក​គាំទ្ររបស់នាង  មិន​ពេញ​ចិត្ត​នោះទេ ព្រោះនេះចាត់ទុកជា​ការ​ចោទ​ប្រកាន់​ទៅលើ​តារា​ស្រី​រូប​នេះ ហើយ ពួកគេ​គិត​ថា ​វា​ពិតជាមិនសមរម្យ ចាត់​ពាក្យ​អាក្រក់​ នៅក្នុងបំណងល្អ របស់ Zhang Ziyi ៕ 

ប្រភព៖ Ngoisao.net

សូមទស្សនារូបភាពខាងក្រោម៖ 

• តារាចិន