វិធីថែទាំស្បែកពេលមករដូវ ជួយឲ្យស្រស់ថ្លាបែបធម្មជាតិ!

រាងកាយស្រីៗយើងតែងតែប្រឈមនឹងការប្រែប្រួលជានិច្ច ពីព្រោះកម្រិតអ័រម៉ូនឡើងចុះ ចំណង់អាហារ និងសូម្បីតែស្បែករបស់យើងក៏មានការប្រែប្រួលពេញមួយខែផងដែរ។ ហេតុនេះហើយ ទម្លាប់ថែទាំស្បែកក៏ចាំបាច់ត្រូវកែតម្រូវតាមនោះដែរ ជាពិសេស គឺនៅអំឡុងពេលមករដូវតែម្ដង។

គន្លឹះថែទាំស្បែកទាំង៦ អំឡុងពេលមករដូវ ដើម្បីទទួលបានស្បែកភ្លឺថ្លា៖

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

១. កម្ចាត់បញ្ហាមុនអំឡុងពេលមករដូវ

ទោះបីជាបញ្ហាមុនកើតឡើងដោយសារតែការផលិតជាតិខ្លាញ់ក៏ពិតមែន ប៉ុន្តែពេលខ្លះ វាក៏អាចកើតឡើងដោយសារតែការប៉ះពាល់ទៅនឹងបាក់តេរីខាងក្រៅដូចគ្នា។ ហេតុនេះហើយ ចូរលាងសម្អាតមុខ២ដងក្នុងមួយថ្ងៃ ជាមួយនឹងទឹកក្ដៅឧណ្ហៗ និងហ្វូមលាងមុខដែលផ្សំពីSalicylic Acidស្រាល ដើម្បីកម្ចាត់ពពួកបាក់តេរី។ ជាមួយគ្នានេះដែរ ស្រីៗយើងគប្បីថែទាំបន្ថែមរយៈពេល១សប្ដាហ៍ មុនពេលមករដូវទើបជាការប្រសើរ ព្រមទាំងជូតមុខជាមួយនឹងក្រដាសជូតមាត់២ដងក្នុងមួយថ្ងៃ ដើម្បីកម្ចាត់ជាតិខ្លាញ់ដែលលើស។

២. ម៉ាស្សាស្បែកមុខដោយអ្នកជំនាញ

ដើម្បីទទួលបានស្បែកដែលគ្មានមុន អំឡុងពេលមករដូវ ចូរធ្វើការម៉ាស្សាមុខក្នុងរយៈពេល១០ ទៅ១២ថ្ងៃ មុនពេលមករដូវ។ ពិតណាស់ ស្បែករបស់យើងមានសភាពល្អបំផុតនៅមុនពេលមករដូវ ពីព្រោះរន្ធញើសធំជាងមុន ការសម្អាតមានភាពងាយស្រួល ហើយការបំផ្លាញស្បែកក៏មានកម្រិតតិចតួចបំផុតដែរ។

៣. ជៀសវាងប្រើប្រាស់គ្រឿងសម្អាង

ជាមួយគ្នានេះដែរ ចូរកាត់បន្ថយការប្រើប្រាស់គ្រឿងសម្អាង និងទុកឲ្យស្បែកបានសម្រាកមួយរយៈ។ ស្រីៗយើងគប្បីលាបក្រែមទឹកដោះគោ និងរមៀត សំបកផ្លែឈើ និងម៉ាសធ្វើដោយខ្លួនឯង ដើម្បីឲ្យស្បែកស្រស់ថ្លាតាមបែបធម្មជាតិ។ ទឹកដោះគោជូរ ស៊ុត ល្ហុង ផ្លែប៊ឺរ ក៏ជាគ្រឿងផ្សំធម្មជាតិ ដែលអាចជួយឲ្យស្បែកភ្លឺថ្លា។

៤. ផ្ដល់ជាតិទឹកដល់ស្បែក

ស្បែករបស់យើងតែងតែស្ងួត អំឡុងពេលមករដូវ។ ដូច្នេះហើយ ការប្រើទឹកឃ្មុំមិនត្រឹមតែអាចកាត់បន្ថយមុននោះទេ ថែមទាំងផ្ដល់សំណើមដល់ស្បែក និងជួយឲ្យស្បែកភ្លឺថ្លាថែមទៀតផង។ គ្នាយើងក៏អាចបិទម៉ាសធម្មជាតិ ដូចជាត្រសក់ និងប្រទាលកន្ទុយក្រពើ ព្រមទាំងប្រើទឹកជូតមុខក្រោយលាងសម្អាតមុខរួច។ បន្ថែមពីនេះ នៅអំឡុងពេលមករដូវ យើងគប្បីប្រើប្រាស់ក្រែមផ្ដល់សំណើមដែលគ្មានជាតិប្រេង និងញ៉ាំទឹកឲ្យបានច្រើន ដើម្បីបញ្ចៀសបញ្ហាកង្វះជាតិទឹកនៃស្បែក។

៥. របបអាហារសម្រាប់ការថែទាំស្បែក

អាហារដែលសម្បូរទៅដោយអាស៊ីដខ្លាញ់អូមេហ្គា៣ វីតាមីនE និងសារធាតុប្រឆាំងនឹងអុកស៊ីតកម្មមានគុណប្រយោជន៍ដ៏អស្ចារ្យដល់ស្បែក ដោយជួយកាត់បន្ថយការរលាក ធ្វើឲ្យស្បែកទន់ល្មើយ មានសំណើម ជំរុញឈាមរត់ និងជួយពន្យារភាពចាស់នៃស្បែក។ ហេតុនេះហើយ ស្រីៗយើងគប្បីបញ្ចូលរបបអាហារដោយមាន សាច់ត្រី ប្រេងបន្លែ គ្រាប់ធញ្ញជាតិ និងពពួកផ្លែប៊ឺរីជាដើម។

៦. ហាត់ប្រាណ និងសម្រាកឲ្យបានគ្រប់គ្រាន់

ការហាត់ប្រាណមិនត្រឹមតែជួយសម្រកទម្ងន់ប៉ុណ្ណោះទេ ក៏ជួយឲ្យស្បែកកាន់តែភ្លឺថ្លាក្រោយមករដូវរួច ព្រមទាំងកាត់បន្ថយការឈឺចាប់អំឡុងពេលមករដូវ។ ញើសនឹងបណ្ដេញធូលី ក៏ដូចជាជាតិពុលចេញពីស្បែក ប៉ុន្តែគ្នាយើងចាំបាច់ត្រូវលាងសម្អាតមុខឲ្យបានស្អាតក្រោយហាត់ប្រាណរួច។ ទន្ទឹមនឹងនេះដែរ ការសម្រាកឲ្យបានគ្រប់គ្រាន់ក៏អាចជួយកាត់បន្ថយបញ្ហាស្រ្តេស ពីព្រោះស្ត្រេសអាចបង្កើនការផលិតជាតិខ្លាញ់ ដែលជាមូលហេតុនៃការកើតមុន។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អត្ថបទផ្ដល់សិទ្ធិដោយ Hello Krupet

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

SPONSORED CONTENT

វិធី​ថែទាំ​ស្បែកពេល​មក​រដូវ​ ជួយ​ឲ្យ​ស្រស់​ថ្លា​បែប​ធម្មជាតិ​​​​​​​​​​​​​​​​​​​​​​​​​​!

១. កម្ចាត់​បញ្ហា​មុន​អំឡុង​ពេល​មក​រដូវ​

២. ម៉ាស្សា​ស្បែក​មុខ​ដោយ​អ្នក​ជំនាញ

​៣. ជៀសវាង​ប្រើប្រាស់​គ្រឿង​សម្អាង​

៤. ផ្ដល់​ជាតិ​ទឹក​ដល់​ស្បែក​

៥. របប​អាហារ​សម្រាប់​ការ​ថែទាំ​ស្បែក​

៦. ហាត់​ប្រាណ​ និង​សម្រាក​ឲ្យ​បាន​គ្រប់គ្រាន់​

In Case You Missed It