ផ្ទុះកូវីដ លើ​ពិរុទ្ធជន​ជាប់​ក្នុង​ពន្ធនាគារ រួម​ទាំង​មន្ត្រី​អនុរក្ស​ ​ជាង​៣០០​នាក់

ខេត្តស្ទឹងត្រែង៖ រក​ឃើញ​មាន​វិជ្ជមាន​កូ​វី​ដ​១៩​ លើពិរុទ្ធជន ដែលជាប់​ឃុំឃាំង​ក្នុង​ពន្ធនាគារ​ខេត្តស្ទឹងត្រែង រួម​ទាំង​មន្ត្រី​អនុរក្ស​ពន្ធនាគារ​ប្រមាណ​ជា​ជាង​៣០០​នាក់ បាន​និង​កំពុង​ឆ្លង​ជំងឺ​កូ​វី​ដ​១៩ ក្រោយ​ពី​ការ​ធ្វើតេស្ត​ចាប់​យក​លើ​ឧបករណ៍ «​រ៉ាប់​ពី​តេស្ត​»។

បើតាមប្រភពពីអនុប្រធាន​មន្ទីរ​សុខាភិបាល លោក ទ​ន វុ​ទ្ធី បាន​បញ្ជាក់​ប្រាប់​កោះសន្តិភាព​នា​វេលា​ថ្ងៃត្រង់​ទី​៩ ខែធ្នូ ឆ្នាំ​២០២១​នេះ​ថា តាម​ការ​ចាប់​យក​ដំបូង អាច​រាប់​បាន​ពី​លទ្ធផល​សរុប គឺ​ចំនួន​៣០៨​នាក់ ក្នុង​នោះ​ពិរុទ្ធជន​មាន​ចំនួន​៣០០​នាក់ និង​មន្ត្រី​អនុរក្ស​ពន្ធនាគារ​ចំនួន​៨​នាក់​។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាមួយគ្នានេះ ​អនុប្រធាន​មន្ទីរ​សុខាភិបាលរូបនេះ បានបញ្ជាក់ថា ការ​រក​ឃើញ​សញ្ញា​នៃ​ជំងឺ​កូ​វី​ដ​១៩ តាម​រយៈ​ឧបករណ៍ «​រ៉ាប់​ពី​តេស្ត​» រក​ឃើញ​វិជ្ជមាន ហើយ​ទោះ​ពិនិត្យ​ម៉ាស៊ីន ភី​ស៊ី​អ ក៏​មាន​ដែរ​។ ហើយបច្ចុប្បន្ន​មន្ទីរ​សុខាភិបាល កំពុង​ពិភាក្សា​ជាមួយ​ថ្នាក់​ក្រសួង ក៏​ដូច​ជា​អាជ្ញាធរ​ខេត្ត លើ​ការ​ព្យាបាល ពីព្រោះ​ពួក​គាត់​ជា​ពិរុទ្ធជន ដូច្នេះ​ថ្នាក់​ក្រសួង និង​ខេត្ត កំពុង​រក​វិធី​ដើម្បី​ដោះស្រាយ​លើ​បញ្ហា​នេះ ។

លោក​បញ្ជាក់បន្ត​ថា អ្នក​ដែល​ពិនិត្យ​ឃើញ​វិជ្ជមាន​ខាងលើ ប្រហែលជា​អាច​ត្រូវ​ព្យាបាល​នៅ​នឹង​កន្លែង ដោយ​មាន​ក្រុម​គ្រូពេទ្យ​ចុះ​មើល​ជាប់ លើកលែងតែ​ធ្ងន់ធ្ងរ តែបើ​តាម​ការ​ពិនិត្យ​ពួក​គាត់​មាន​សុខ​ភាពរឹងមាំ​ទាំងអស់​។

ជុំវិញករណីផ្ទុះឆ្លងកូវីដ១៩ ទៅដល់៣០០នាក់នេះ គេមិនទាន់ដឹងពីប្រភពនៃអ្នកចម្លងនៅឡើយទេ តែយ៉ាងណា ការឆ្លងនេះ ត្រូវបានគេសង្ស័យថា ឆ្លងមកពីក្រុមគ្រួសារពិរុទ្ធជនទាំងនោះ នៅពេលដែលពួកគេចុះមកសួរសុខទុក្ខ ដែលករណីឆ្លងពីម្នាក់ទៅម្នាក់ រហូតទៅខ្ទង់រយបែបនេះ៕