ដំណឹងល្អ! ឆ្នាំក្រោយនេះ វិស័យអចលនទ្រព្យ អាចនឹងមានកំណើនល្អវិញ

ភ្នំពេញ៖ នាពេលកន្លងមកនេះ រាជរដ្ឋាភិបាលកម្ពុជា បានប្រកាសបើកប្រទេសឡើងវិញគ្រប់វិស័យ ចំណែកជំងឺឆ្លងកូវីដ១៩ គឺហាក់បីដូចជាអន់ថយខ្លាំងប្រសិនជាយើងប្រៀបទៅ កាលពីប៉ុន្មានខែមុន ចំណុចមួយនេះ អ្នកជំនាញគឺបានគិតថា វិស័យអចលនទ្រព្យអាច នឹងមានកំណើនឡើងវិញ នៅ ឆ្នាំ២០២២ខាងមុខនេះ ។

ដោយឡែក យោងតាម លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នៅព្រឹកថ្ងៃទី១៦ ធ្នូ ឆ្នាំ២០២១នេះ បានមានប្រសាសន៍ប្រាប់ថា សម្រាប់ឆ្នាំ២០២២ ត្រូវបាន​គេមើលឃើញថា ​ការបើកប្រទេសត្រូវបានបើកទូលាយឡើងវិញ ជំរុញការធ្វើដំណើរក្នុងស្រុក​ឡើងវិញ ​ជាពិសេសនៅរាជធានីភ្នំពេញតែម្តង ​ខណៈវិនិយោគបរទេស អាចធ្វើដំណើរត្រង់​មក​កម្ពុជា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្រៅ ពីនេះលោកបន្ថែមថា បច្ចុប្បន្ន បើទោះជាបច្ចុប្បន្នការទិញលក់អចលនវត្ថុមានមានសកម្មយឺត ប៉ុន្តែតម្លៃមិនទាន់​រងផល​ប៉ះពាល់ខ្លាំងទេ។ ក្នុងនោះ តម្លៃដីឡូតិ៍ និងលំនៅ ដ្ឋានតម្លៃទាប និងមធ្យម ក៏មិនមានការ​ប្រែប្រួល​ខ្លាំងដែរ ​ដោយសារទីផ្សារនេះផ្ដោតលើប្រជាជនក្នុងស្រុកដែលកំពុងមានតម្រូវការខ្ពស់។

ចំណែក លោក ឌិន សុមេធារិទ្ធ ស្ថាបនិកភូមិផ្កាត្រកួន ​បានបញ្ជាក់ដែរថា នៅ​ ឆ្នាំខាងមុខនេះ លោកគ្រោងពង្រីកនូវគម្រោងរបស់លោកចំនួន ៣បន្ថែមទៀត ដូចជា​នៅ​ភូមិផ្កាត្រកួន គម្រោងបុរីក្នុងខេត្តព្រៃវែង ​និងគម្រោងសួនឧស្សាហកម្មនៅ ក្រវ៉ាត់ក្រុង៣ ដើម្បី​បំពេញ​តម្រូវតំរូវការ។

លោក បានបញ្ជាក់បន្ថែមទៀតថា ​កត្តាដែលនាំឲ្យលោកហ៊ានសម្រេចចិត្តក្នុងការអនុវត្តផែនការ​ដែល​គ្រោង​ទុកនេះ​ ដោយសារលោកជឿ និងទុកចិត្តលើថ្នាក់ដឹកនាំ ជាពិសេសសម្តេចនាយករដ្ឋ​មន្រ្តី​តេជោ ហ៊ុន សែន គោលនយោបាយសេដ្ឋកិច្ច ការបរទេសនិងភាពនឹងធឹងជាដើម។

យ៉ាងណាមិញ សេចក្តីថ្លែងនៅ ក្នុងសន្និសីទសារព័ត៌មាន កាលពីថ្ងៃទី១៤ ខែធ្នូ ឯកឧត្តម ផាន់ ផល្លា រដ្ឋលេខាធិការ​ក្រសួង​សេដ្ឋកិច្ច និងហិរញ្ញវត្ថុ​ លើកឡើងថា ​វិស័យអចលនទ្រព្យ បានក្លាយជាវីស័យជំរុញកំណើន​សេដ្ឋកិច្ច​មួយ ក្នុងឆ្នាំ២០២១ ​ក្នុងចំណោមវិស័យជំរុញកំណើនផ្សេងទៀត​ មានដូចជា​ វិស័យកាត់ដេរ វិស័យមិនមែនកាត់ដេរ​ និង​វិស័យកសិកម្ម​ ខណៈវិស័យសេវាកម្ម រំពឹងថា នឹងងើបឡើងវិញ៕

ប្រភព៖ BTV

សូមចូលទស្សនារូបភាពខាងក្រោម៖