ញ៉ាំទឹកដោះពពែ គួរដឹងពីគុណសម្បត្តិ ៣យ៉ាងនេះ!

ពពែជាសត្វមួយប្រភេទដែលមនុស្សយើងចិញ្ចឹមយកទឹកដោះដំបូងគេមួយ ហើយមានការសិក្សាជាច្រើនបានចេញផ្សាយទាក់ទងនឹងផលប្រយោជន៍របស់ទឹកដោះពពែចំពោះសុខភាពជាងមួយសតវត្សមកហើយដែរ។

ការសិក្សាជាច្រើនបានបង្ហាញថាក្នុងទឹកដោះពពែមានសារធាតុប្រឆាំងការរលាក ហើយអ្វីដែលសំខាន់ជាងនេះទៅទៀតនោះគឺទឹកដោះពពែ ត្រូវគេរកឃើញថាមានលទ្ធភាពបង្កជាអាលែកហ្ស៊ីទាបជាងទឹកដោះគោ។ ជាមួយនេះដែរទឹកដោះពពែក៏ងាយរំលាយ និងងាយឲ្យរាងកាយស្រួបយកសារធាតុចិញ្ចឹម។ ដោយសារតែហេតុផលទាំងនេះហើយ បានជាទឹកដោះពពែ ត្រូវបានគេនិយមប្រើកាន់តែច្រើនលើពិភពលោក។ យ៉ាងណា មិនមែនមានន័យថាទឹកដោះពពែសុទ្ធតែពេញនិយមជាងទឹកដោះគោនៅគ្រប់កាលៈទេសៈនោះទេ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

១. មិនសូវបង្កអាលែកហ្ស៊ី

បើធៀបនឹងទឹកដោះគោ ទឹកដោះពពែត្រូវគេរកឃើញថាមានលទ្ធភាពបង្កឲ្យអ្នកញ៉ាំមានបញ្ហាអាលែកហ្ស៊ីទាបជាងទឹកដោះគោ។ ការណ៍នេះ កើតឡើងដោយសារតែប្រូតេអ៊ីន alphaS1-casein នៅក្នុងទឹកដោះពពែមានកម្រិតទាបជាងទឹកដោះគោ។ ដូចនេះ ហើយបានជាអ្នកដែលមានប្រតិកម្មអាលែកហ្ស៊ី ឬមិនស៊ាំនឹងទឹកដោះគោ អាចញ៉ាំទឹកដោះពពែជំនួសបាន។

២. ងាយស្រួលរំលាយ

ហេតុអ្វីបានជាគេនិយាយថាទឹកដោះពពែងាយស្រួលរំលាយជាងទឹកដោះគោ? មកដល់ចំណុចនេះ យើងត្រូវងាកទៅនិយាយពីប្រូតេអ៊ីន alphaS1-casein នេះជាថ្មីម្ដងទៀត។ នៅក្នុងទឹកដោះពពែប្រូអ៊ីនalphaS1-casein មានសភាពទន់ជាង ប្រូតេអ៊ីន alphaS1-casein ក្នុងទឹកដោះគោ ដែលជាហេតុនាំឲ្យទឹកដោះពពែងាយស្រួលរំលាយជាង។ ហេតុដូចនេះហើយ បានជាម៉ាក់ៗខ្លះត្រូវបានណែនាំឲ្យផ្លាស់ប្ដូរពីទឹកដោះគោម្សៅ មកឲ្យកូនបៅទឹកដោះពពែម្សៅវិញ ពេលកូនជួបបញ្ហាមិនស៊ាំនឹងទឹកដោះគោ ឬអាលែកហ្ស៊ី។

យ៉ាងណាគ្នាយើងក៏គួរដឹងដែរថា ក្នុងទឹកដោះពពែមានជាតិខ្លាញ់ប្រហែល ៣,៨ភាគរយ ខណៈក្នុងទឹកដោះគោមានត្រឹមតែ ១ភាគរយ។ ហេតុនេះហើយ ទឹកដោះពពែមិនមែនជាជម្រើសរបស់អ្នកចង់សម្រកទម្ងន់នោះទេ។ ដូចគ្នាដែរ សម្រាប់ស្រ្តីមានផ្ទៃពោះវិញ គួរដឹងដែរថាក្នុងទឹកដោះពពែ ក៏មានអាស៊ីដហ្វូលិក វីតាមីនB6 និង B12 ទាប ដែលសារធាតុទាំងនេះសុទ្ធតែចាំបាច់សម្រាប់ការលូតលាស់របស់កូនក្នុងផ្ទៃ។

៣. រាងកាយងាយស្រួលស្រូបយកសារធាតុចិញ្ចឹម

ដោយសារតែទឹកដោះពពែងាយស្រួលរំលាយនេះហើយ ដែលជាហេតុនាំឲ្យរាងកាយងាយស្រួលស្រូបយកសារធាតុចិញ្ចឹមពីទឹកដោះពពែ។ ជាទូទៅ ការសិក្សាជាច្រើនបានបង្ហាញភស្តុតាងថារាងកាយយើង អាចស្រូបយកជាតិដែក និងកាល់ស្យូម ពីទឹកដោះពពែបានល្អប្រសើរជាងពីទឹកដោះគោ។ ដូចគ្នាដែរ ការសិក្សាមួយធ្វើឡើង រយៈពេល ១៨ឆ្នាំ បានរកឃើញថា ទឹកដោះពពែ ក៏ទំនងជាមានលទ្ធភាពក្នុងការដោះស្រាយបញ្ហាស្លេកស្លាំងដោយសារខ្វះជាតិដែកផងដែរ។

ទោះជាបែបនេះក្ដី ក៏គេមិនអាចវាយតម្លៃបានទាំងស្រុងថាទឹកដោះពពែល្អជាងទឹកដោះគោនៅគ្រប់កាលៈទេសៈនោះដែរ។ អ្វីដែលគេដឹងថាល្អជាងទឹកដោះគោ នៅត្រង់ថាអ្នកមានបញ្ហាមិនស៊ាំនឹងទឹកដោះគោ ឬអាលែកហ្ស៊ីនឹងទឹកដោះគោ អាចញ៉ាំទឹកដោះពពែបាន ហើយទឹកដោះពពែក៏អាចផ្ដល់កាល់ស្យូមដល់ឆ្អឹងបានល្អផងដែរ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អត្ថបទផ្ដល់សិទ្ធិដោយ Hello Krupet

អាហារ

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

SPONSORED CONTENT

ញ៉ាំទឹក​ដោះពពែ គួរ​ដឹងពីគុណសម្បត្តិ ៣យ៉ាងនេះ​!

១. មិន​សូវ​បង្ក​អាលែកហ្ស៊ី​

២. ងាយ​ស្រួល​រំលាយ​

៣. រាងកាយ​ងាយ​ស្រួល​ស្រូប​យក​សារធាតុ​ចិញ្ចឹម​

In Case You Missed It

ញ៉ាំទឹកដោះពពែ គួរដឹងពីគុណសម្បត្តិ ៣យ៉ាងនេះ!

១. មិនសូវបង្កអាលែកហ្ស៊ី

២. ងាយស្រួលរំលាយ

៣. រាងកាយងាយស្រួលស្រូបយកសារធាតុចិញ្ចឹម