កន្លះឆ្នាំហើយ ដែលកម្ពុជា នៅមិនទាន់អាចយកប្រេង ៣០ម៉ឺនបារ៉ែល មកវិញបាន

ភ្នំពេញ៖ នាពេលកន្លងមកនេះ កម្ពុជាបានបន្តដាក់ឯកសារបន្ថែមជាបន្តបន្ទាប់ ជុំវិញករណីបណ្ដឹងទាមទារប្រេងឆៅប្រមាណជា៣០​ម៉ឺន​បារ៉ែល ត្រលប់មកវិញ ពីប្រទេសឥណ្ឌូណេស៊ី។ អាជ្ញាធរឥណ្ឌូណេស៊ី បានឃាត់មនុស្សជិត២០នាក់ និងនាវា MT Strovolos បានលួចដឹកប្រេងឆៅរបស់កម្ពុជាចេញពីសមុទ្រ កាលពីថ្ងៃទី១៩មិថុនា ឆ្នាំ២០២១។

ប៉ុន្តែគិតមកទល់ពេលនេះ រយៈពេលប្រមាណជា៦ខែហើយ ការប្តឹងទាមទារយកប្រេងរបស់កម្ពុជាមកវិញនេះ គឺមិនបានសម្រេចឡើយ ខណៈក្រុមមេធាវីកំពុងដោះស្រាយរឿងក្តីនេះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោងតាមប្រសាសន៍លោក ជៀប សួរ អគ្គនាយកនៃអគ្គនាយកដ្ឋានប្រេងកាត ក្រសួងរ៉ែ និងថាមពល បានបានបញ្ជាក់នៅថ្ងៃទី២១ធ្នូនេះដូចខាងក្រោម៖

ដោយបានបន្ថែមយ៉ាងខ្លីថា បច្ចុប្បន្នក្រុមមេធាវីកំពុងធ្វើការងារនេះ ជាមួយភាគីពាក់ព័ន្ធមិនទាន់ចប់។

ពាក់ព័ន្ធនឹងរយៈពេលក្នុងការទាមទារយកប្រេងឆៅរបស់កម្ពុជាមកវិញនេះ លោក ជៀប សួរ ​ដែលជាអគ្គនាយកនៃអគ្គនាយកដ្ឋានប្រេងកាត ក្រសួងរ៉ែ និងថាមពល គឺមិនអាចកំណត់បានឡើយ ដោយលោកបានបញ្ជាក់ថាមិនអាចប៉ាន់ស្មានដឹងទេ ព្រោះវាពាក់ព័ន្ធផ្នែកច្បាប់។

យ៉ាងណាមិញ សូមរម្លឹកថា នាវឹក MT Strovolos បានលួចដឹកប្រេងឆៅរបស់កម្ពុជាចេញពីសមុទ្រ កាលពីថ្ងៃទី១៩មិថុនា ឆ្នាំ២០២១ រហូតដល់ថ្ងៃទី២៥សីហា អាជ្ញាធរប្រទេសឥណ្ឌូណេស៊ីផ្តល់ដំណឹងឱ្យកម្ពុជា ថា ខ្លួន​បាន​ចាប់​នាវា​ដឹក​ប្រេងឆៅជិត៣០ម៉ឺនបារ៉ែល និងប្រធាន​ក្រុម​នាវាដែលជា​ជនជាតិ​បង់​ក្លា​ដែ​ស និង​សមាជិក​នាវិកចំនួន១៨​នាក់ផ្សេងទៀត​។

គួរបញ្ជាក់ថា ក្រោយ​ពី​​កងទ័ពជើងទឹក​ឥណ្ឌូណេស៊ី​ រឹបអូស​បាននាវា​MT Strovolos ទៅតាមការស្នើសុំ​របស់អាជ្ញាធរ​កម្ពុជា។ ក្រុមហ៊ុន World Tankers Management ដែលជាគ្រប់គ្រងនាវា MT Strovolos នោះ បានចេញមុខបដិសេធលើការចោទប្រកាន់នេះភ្លាមៗថា នាវានេះ មិនបានលួចប្រេងពីកម្ពុជាឡើយ។ សេចក្តីថ្លែងការណ៍របស់ក្រុមហ៊ុនWorld Tankers Management នៅថ្ងៃទី២៧ សីហា បានបញ្ជាក់ថា នាវា MT Stro​vo​los ដែលនៅលើដែនទឹករបស់ឥណ្ឌូណេស៊ី ធ្វើឡើងក្រោមហេតុផលមនុស្សធម៌ និងធ្វើប្រតិបត្តិការតាមកិច្ចសន្យាតែប៉ុណ្ណោះ។ តែក្រសួងរ៉ែ និងថាមពល ចាត់ទុកការបកស្រាយរបស់ម្ចាស់នាវា MT Strovolos នេះ គឺផ្ទុយពីការពិត៕

ប្រភព៖ ថ្មីថ្មី

សូមចូលទស្សនារូបភាពខាងក្រោម៖