រាជនីលក់អនឡាញចិន ត្រូវបានផាកពិន័យ ២១០លានដុល្លារ ព្រោះគេចមិនបង់ពន្ធ​

ចិន៖ យោងតាមអាជ្ញាធរចិនបានឱ្យដឹងថា អ្នកមានឥទ្ធិពលលើអ៊ីនធឺណិតដ៏ល្បីរបស់ចិនម្នាក់ ត្រូវបានពិន័យជាប្រាក់ចំនួន ២១០ លានដុល្លារសម្រាប់ការគេចមិនបង់ពន្ធជូនរដ្ឋ។

នារីម្នាក់ឈ្មោះ Huang Wei ត្រូវបានគេស្គាល់ថាជា Viya គឺជាតារាលក់ផលិតផលអនឡាញ ដែលមានអ្នក Follower រាប់លាននាក់។ នាងបានប្រើវេទិការបស់នាងដើម្បីលក់ផលិតផលជាច្រើនប្រភេទ។Viya គឺជាតារាដ៏ធំបំផុតមួយនៅលើទីផ្សារសម្លៀកបំពាក់ឌីជីថលរបស់ Alibaba Taobao ដែលជាកន្លែងដែលអ្នកមានឥទ្ធិពលព្យាយាមលក់របស់របរទៅឱ្យអ្នកទស្សនា នៅលើការផ្សាយបន្តផ្ទាល់ នេះបើយោងតាមកាសែត ​​Bloomberg ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោងតាមសារព័ត៌មាន Daily Mail បានឱ្យដឹងថា នារីវ័យ៣៦ ឆ្នាំរូបនេះ មានអ្នក Follower ជាង ៨០លាននាក់នៅលើកម្មវិធី Taobao និង ១៨ លាននាក់នៅលើ Weibo ដែលជាវេទិការ microblogging ។គួរបញ្ជាក់ផងដែរថា នេះ​ជា​ការ​ផាក​ពិន័យ​ការ​គេច​ពន្ធ​លើក​ទី​ពីរ​ដែល​បាន​ប៉ះ​ពាល់​លើ​អ្នក​ផ្សាយ​បន្ត​ផ្ទាល់​ពាណិជ្ជកម្ម​តាម​អ៊ីនធឺណិត​ចាប់​តាំង​ពី​ខែ​វិច្ឆិកា កន្លងមក។

កាលពីថ្ងៃចន្ទនេះ រដ្ឋបាលពន្ធដាររបស់ចិន នៅក្នុងសេចក្តីថ្លែងការណ៍មួយនៅលើគេហទំព័ររបស់ខ្លួនបាននិយាយថា Viya បានគេចវេសពីការបង់ពន្ធតិចជាង ៧០៣ លានយន់ (១១០ លានដុល្លារអាមេរិក) ។

បើតាមសេចក្តីសេចក្តីថ្លែងការណ៍ដដែល បានឱ្យដឹងថា នារីលក់ផលិតផល Viya រូបនេះ ត្រូវបានចោទប្រកាន់ពីបទគេចពន្ធពីឆ្នាំ ២០១៩ដល់ឆ្នាំ ២០២០ ដោយលាក់បាំងប្រាក់ចំណូលផ្ទាល់ខ្លួន និងប្រកាសមិនពិតពីប្រភពចំណូលមួយចំនួន។

នៅក្នុងសារបង្ហោះនៅលើគណនី Weibo របស់នាង Viya បាននិយាយថានាងពិតជា "សុំទោសជាខ្លាំង" ។ នារីលក់ផលិតផលអនឡាញរូបនេះ បានបន្តទៀត​ថា៖ «ខ្ញុំសូម​ទទួល​យក​យ៉ាង​ហ្មត់ចត់​ចំពោះ​ការ​ដាក់​ទណ្ឌកម្ម​ដែល​ធ្វើ​ឡើង​ដោយ​អាជ្ញាធរ​ពន្ធដារ»។

យោងតាមកាសែត ​​AFP ពេលនេះគណនីរបស់ Viya បានបាត់ពីវេទិកាអនឡាញធំៗកាលពីថ្ងៃអង្គារ ដោយទំព័រផ្សាយផ្ទាល់របស់នាងនៅលើគេហទំព័រទិញទំនិញ Taobao មិនអាចចូលដំណើរការបានឡើយ៕

ប្រភព៖ Wion News