សាហាវមែន រយៈពេល២ខែ យុវជនវៀតណាម៤នាក់ លួចឆ្កែបាន ១,២០០ក្បាល ពេលនេះអស់លក្ខណ៍

វៀតណាម៖ យុវជនវៀតណាម ចំនួនបួននាក់នៅទីក្រុងហូជីមិញ ត្រូវបានចាប់ខ្លួន កាលពីថ្ងៃច័ន្ទ បន្ទាប់ពីពួកគេបានលួចឆ្កែជាង ១,២០០ក្បាល ក្នុងរយៈពេលពីរខែកន្លងមកនេះ។

យុវជនទាំងបួនរូបនេះ មានឈ្មោះដូចជា៖ Le Anh Hao, Nguyen Thanh Loc, Nguyen Tan Duy និង Nguyen Trong Nhan អាយុ ១៧-១៨ ឆ្នាំ ត្រូវបានប៉ូលីសទីក្រុងហូជីមិញ ចាប់ខ្លួន ហើយនឹងត្រូវកាត់ទោសពីបទល្មើសលួច។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

កាលពីថ្ងៃទី ០៣ ខែធ្នូ ដោយបំពាក់ដោយថ្នាំបាញ់ម្រេច និងឆក់ ក្រុមនេះ បាននាំគ្នាលួចយកឆ្កែ តាមបណ្តោយផ្លូវ Vo Thi Phai ក្នុងសង្កាត់ ១២ ជាកន្លែងដែលពួកគេបានសណ្តំ និងលួចឆ្កែមួយក្បាលនៅ ចំពោះមុខម្ចាស់តែម្តង។ ឧបទ្ទវហេតុ​នេះ​ ត្រូវ​បាន​ចាប់​បាន​ដោយ​កាមេរ៉ា​សុវត្ថិភាព​ ​ប្រើ​ពេល​តែ​ ៣០ វិនាទី​ប៉ុណ្ណោះ​។

ក្រោយ​ការ​ចាប់​ខ្លួន​ដោយ​ប៉ូលិស អ្នក​ទាំង​បួន​បាន​សារភាព​ថា​ខ្លួន​ ពិតជាបាន​លួច​ឆ្កែ​ ប្រហែល ១០ ក្បាល​ក្នុង​ថ្ងៃ​ដដែល​នោះ។យោងតាមមន្ត្រីនគរបាលម្នាក់បានបញ្ជាក់ថា ក្រុមយុវជនខាងលើ បានលួចឆ្កែ បានជាង ១,២០០ ក្បាលក្នុងរយៈពេល ២ ខែកន្លងមកនេះ។ ជាធម្មតា ក្រុមនេះនឹងដំណើរការដើរលួចឆ្កែ ចន្លោះពីម៉ោង ៤ ព្រឹកដល់ម៉ោង ៧ ព្រឹក ដោយលក់ឆ្កែដែលគេលួចទៅកន្លែងទិញ និងពិឃាតឆ្កែ ក្នុងសង្កាត់១២ ហូជីមិញ ប្រទេសវៀតណាម។ គិតមកទល់នេះ សមត្ថកិច្ចវៀតណាម នៅតែកំពុងធ្វើការស៊ើបអង្កេតបន្ត។

គួរបញ្ជាក់ផងដែរថា វៀតណាមបរិភោគឆ្កែ ​ប្រមាណ​ប្រាំ​លាន​ក្បាល​ក្នុង​មួយ​ឆ្នាំ ​ដែល​ជា​លេខ​ពីរ​ បន្ទាប់​ពី​ចិន ដែលបរិភោគ ២០​លាន​ក្បាល៕

ប្រភព៖  VN Express