ចុម នៅថៃពេលនេះ មានអ្នកបាត់បង់ជី.វិ.ត ព្រោះតែអូមីក្រុងហើយ

ថៃ៖ មន្ត្រីក្រសួងសុខាភិបាលសាធារណៈថៃ បាននិយាយកាលពីថ្ងៃអាទិត្យថា ប្រទេសថៃបានរាយការណ៍ពីការស្លាប់ដំបូងដោយសារមេរោគបំប្លែងថ្មីអូមីក្រុង។ការស្លាប់ស្ត្រី អាយុ ៨៦ឆ្នាំម្នាក់ មកពីខេត្ត Songkhla ភាគខាងត្បូងប្រទេសថៃ នេះបានកើតឡើងបន្ទាប់ពីប្រទេសនេះបានរកឃើញករណី Omicron លើកដំបូងរបស់ខ្លួនកាលពីខែមុន ដែលឈានដល់ការដាក់ធ្វើចត្តាឡីស័ក ចំពោះភ្ញៀវទេសចរណ៍មកពីក្រៅប្រទេស។

លោកវេជ្ជបណ្ឌិត Rungrueng Kitphati អ្នក​នាំពាក្យ​ក្រសួង​សុខាភិបាល បាន​ប្រាប់សារព័ត៍មាន​រ៉យទ័រ​ថា​៖ «ស្ត្រី​នោះ​ជា​អ្នក​ជំងឺ​វង្វេង​វង្វាន់​លើ​គ្រែ»។ លោកវេជ្ជបណ្ឌិត Rungrueng បានបន្តថា ការស្លាប់បែបនេះត្រូវបានរំពឹងទុករួចមកហើយ ខណៈដែលប្រទេសនេះ មកទល់ពេលនេះបានរាយការណ៍អំពីករណីឆ្លងវីរុសបំប្លែងថ្មីអូមីក្រុងជាង ១០,០០០ ករណី ដោយបន្ថែមថាប្រទេសថៃនឹងមិនត្រូវការវិធានការណ៍ទប់ស្កាត់បន្ថែមទៀតនោះទេ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ការិយាល័យសុខភាពសាធារណៈខេត្តនៅ Songkhla បាននិយាយថា ស្ត្រីរូបនេះរស់នៅក្នុងស្រុក Hat Yai ហើយត្រូវបានឆ្លងមេរោគអូមីក្រុងនេះពីចៅប្រុស បន្ទាប់ពីចៅប្រុសរបស់ស្ត្រីខាងលើ ត្រឡប់មកពីភូកេត។ តែយ៉ាងណា ស្ត្រីរូបនេះ បានទទួលវ៉ាក់សាំង Pfizer ចំនួនពីរលើក នៅមន្ទីរពេទ្យ Na Mom ក្នុងទីក្រុង Hat Yai ។

សូមជម្រាបថា រដ្ឋាភិបាលថៃ បានរាយការណ៍ពីការឆ្លងថ្មីចំនួន ៨,០៧៧ ករណីនិងការស្លាប់ចំនួន ៩នាក់កាលពីថ្ងៃអាទិត្យ ដោយធ្វើឱ្យចំនួនសរុបកើនឡើងដល់ជាង ២.៣លានករណី និងការស្លាប់ជិត ២២,០០០ នាក់ចាប់តាំងពីជំងឺរាតត្បាតបានចាប់ផ្តើមនៅឆ្នាំ ២០២០៕

ប្រភព៖ បាងកកប៉ុស្តិ៍