រំជួលចិត្ត! ខួប២៧ឆ្នាំនៃគ្រោះរ.ញ្ជួ.យដីដ៏ធំនៅប្រទេសជប៉ុន ប្រជាជនជប៉ុននាំគ្នាធ្វើរឿងមួយនេះ

ជប៉ុន៖ ថ្ងៃទី១៧ មករា ឆ្នាំ១៩៩៥- ១៧ មករា ឆ្នាំ២០២២ គឺជាខួបទី២៧ឆ្នាំ នៃការចងចាំនៅក្នុងមហាព្រឹត្តិការណ៍គ្រោះរញ្ជួយដីដ៏ធំនៅទីក្រុងKobe ជាក្រុងមួយស្ថិតនៅក្នុងតំបន់កាតូប្រទេសជប៉ុន ដោយត្រូវបានគេប្រសិទ្ធនាមថាជាគ្រោះរញ្ជួយដីHanshin ដែលបានបំផ្លិចបំផ្លាញទីក្រុងកំពង់ផែភាគខាងលិចនៃ Kobe និងតំបន់ក្បែរនោះ រហូតបង្កជាការបាក់ផ្លូវ ស្ពាន និងខូចខាតសំណង់ជាច្រើនថែមទៀតផង។

យ៉ាងណាមិញ កាលពីម្សិលមិញនេះ ដើម្បីរំលឹកនៅព្រឹត្តិការណ៍ដែលស្ថិតនៅក្នុងការចងចាំមួយនេះ នៅសួនឧទ្យានមួយក្នុងសង្កាត់ Chuo នៃទីក្រុងKobe ប្រជាជនជប៉ុនជាច្រើនបាននាំគ្នាមកអុជគោមឬស្សី ហើយថ្វាយការអធិស្ឋានដោយស្ងៀមស្ងាត់នៅម៉ោង៥ និង៤៦ព្រឹក ដែលជាពេលវេលានៃការចងចាំសម្រាប់ព្រឹត្តិការណ៍គ្រោះរញ្ជួយដីកម្រិត ៧.៣ រិចទ័របានវាយប្រហារតំបន់នេះកាលពីខែមករា ១៧ ឆ្នាំ១៩៩៥ កន្លងទៅ និងជាការឧទ្ទិសបន់ស្រន់ដល់វិញ្ញាណក្ខន្ធអ្នកដែលបានស្លាប់បាត់បង់ជីវិតនៅក្នុងព្រឹត្តិការណ៍នោះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាប្រការដែរគួរឲ្យកត់សម្គាល់ រដ្ឋាភិបាលទីក្រុង Kobe បានរៀបចំពិធីរំលឹកវិញ្ញាណក្ខន្ធនោះ ដោយមានការចូលរួមពីសំណាក់លោក Sakuto Tashiro ជាតារាចម្រៀង និងអ្នកនិពន្ធបទចម្រៀងអាយុ ៣៧ឆ្នាំ ដោយបានអានពាក្យកាន់ទុក្ខក្នុងនាមជាតំណាងនៃគ្រួសារដែលបានស្លាប់បាត់បង់ជីវិតមួយរូបផងដែរ។

សូមបញ្ជាក់ផងដែរថា ជារឿយៗជប៉ុនតែងតែជួបប្រទះទៅនឹងគ្រោះរញ្ជួយដី ខ្យល់ព្យុះ និងរលកយក្សស៊ូណាមិ ប៉ុន្តែប្រទេសដីកោះដ៏រីកចម្រើនមួយនេះ តែងតែប្រឹងប្រែងជម្នះនូវរាល់ទាំងឧបសគ្គ រហូតទទួលបានការកោតសរសើរពីសំណាក់សហគមន៍អន្តរជាតិផងដែរ៕

ចង់ជ្រាបកាន់តែច្បាស់ សូមទស្សនារូបភាពខាងក្រោមនេះ៖

• រូបភាព