នាយករដ្ឋមន្ត្រីអង់គ្លេស Boris Johnson ប្រឈមនឹងការចុះចេញពីតំណែង ក្រោយជប់លៀង អំឡុងពេលបិទខ្ទប់ទីក្រុង

អង់គ្លេស៖ នាយករដ្ឋមន្រ្តីអង់គ្លេស លោក Boris Johnson កំពុងតែប្រឈមមុខនឹងការអំពាវនាវឱ្យចុះចេញពីតំណែង - សូម្បីតែពីក្នុងបក្សរបស់លោកក៏ដោយ - ក្នុងអំឡុងពេលមានរឿងអាស្រូវជុំវិញព្រឹត្តិការណ៍ដែលលោកបានធ្វើពិធីជប់លៀង ស្របពេលដែលប្រទេសអង់គ្លេស កំពុងដាក់ចេញនូវវិធានការបិទខ្ទប់ ដើម្បីទប់ស្កាត់កូវីដ១៩។

កាលពីថ្ងៃអង្គារ លោក​ Boris Johnson បានថ្លែងប្រាប់សារព័ត៍មាន Sky News ដោយ បានធ្វើឱ្យស្ថានការណ៍កាន់តែក្តៅគគុក ដោយលើកឡើងថា លោកមិនដឹងខ្លួនថាភាគីនានាប្រឆាំងនឹងវិធានការណ៍គម្លាតសង្គម ដែលរដ្ឋាភិបាលលោក បានព្រាងនោះទេ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោក​បាន​ថ្លែង​ថា​៖ «​គ្មាន​នរណា​ប្រាប់​ខ្ញុំ ហើយ​ក៏​គ្មាន​អ្នក​ណា​និយាយ​ថា​ នេះ​ជា​អ្វី​ដែល​ខុស​នឹង​ច្បាប់​ដែរ​។ អតីតទីប្រឹក្សាកំពូលរបស់ Johnson លោក Dominic Cummings បាននិយាយថា លោកបានព្រមាន Johnson នៅខែឧសភា ឆ្នាំ២០២០ ប្រឆាំងនឹងការជប់លៀងនៅសួនច្បារខាងក្រោយផ្ទះ លេខ 10 Downing St.។

ប៉ុន្តែ នៅលើទូរទស្សន៍ Sky News នាយករដ្ឋមន្ត្រីរូបនេះ បាននិយាយថា លោកពិតជា "សោកស្តាយយ៉ាងខ្លាំង" ចំពោះអ្វីដែលបានកើតឡើងហើយបានធ្វើការសុំទោសចំពោះទង្វើរនេះ ។ ទន្ទឹមនោះ កាលពីសប្តាហ៍មុន មេដឹកនាំគណបក្សប្រឆាំងលោក Keir Starmer បានអំពាវនាវឱ្យលោក Johnson លាលែងពីដំណែង ហើយនៅក្នុងសប្តាហ៍នេះ ការអំពាវនាវនេះ ក៏ត្រូវបានចូលរួមដោយសមាជិកមួយចំនួននៃគណបក្សផ្ទាល់របស់នាយករដ្ឋមន្ត្រី Boris Johnsonបើទោះបីជាមិនទាន់គ្រប់គ្រាន់ដើម្បីជំរុញឱ្យមានផ្លាស់ប្តូរក្បាលម៉ាស៊ីនដឹកនាំក៏ដោយ៕