មិនឱ្យចាញ់ចិន! វៀតណាម គ្រោងស្រាវជ្រាវបង្កើតប្រពន្ធ 6G​ ក្នុងឆ្នាំ២០២២នេះ

វៀតណាម៖ យោងតាម រដ្ឋមន្ត្រីក្រសួងព័ត៌មាន និងទំនាក់ទំនង លោក Nguyen Manh Hung មានប្រសាសន៍ថា ប្រទេសវៀតណាម នឹងចាប់ផ្តើមស្រាវជ្រាវប្រព័ន្ធបច្ចេកវិទ្យា 6G នៅឆ្នាំ ២០២២នេះ។ នេះបើតាមការចុះផ្សាយរបស់កាសែត VN Express។

ថ្លែងសុន្ទរកថានៅក្នុងសន្និសីទត្រួតពិនិត្យទូរគមនាគមន៍ ឆ្នាំ២០២១កាលពីចុងសប្តាហ៍មុន លោក Hung បាននិយាយថា៖​ «ឧស្សាហកម្មទូរគមនាគមន៍របស់វៀតណាមគួរតែ ស្ថិតក្នុងក្រុមកំពូលទាក់ទងនឹងការដាក់ពង្រាយ 5G និងការអភិវឌ្ឍន៍បណ្តាញ 6G នៅលើពិភពលោក» ។រដ្ឋមន្ត្រីក្រសួងព័ត៌មាន និងទំនាក់ទំនងរូបនេះ បានបន្តថា៖ វៀតណាមនឹងធ្វើការស្រាវជ្រាវ 6G នៅឆ្នាំនេះ រួមជាមួយនឹងការដាក់ពង្រាយបណ្តាញ 5G នៅទូទាំងប្រទេស។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោងតាមនាយកដ្ឋានទូរគមនាគមន៍របស់ក្រសួង បាន​ឱ្យដឹងថា គណៈកម្មាធិការដឹកនាំសម្រាប់ការអភិវឌ្ឍន៍ការស្រាវជ្រាវ 6G ត្រូវបានបង្កើតឡើង។ វៀតណាម​ជា​ប្រទេស​មួយ​ក្នុង​ចំណោម​ប្រទេស​ទាំង​ដប់​ដំបូង​គេ​របស់​ពិភពលោក​ដែល​បង្កើត​គណៈកម្មាធិការ​នេះផងដែរ។

ក្នុងនោះ លោក Hung ក៏បានកំណត់គោលដៅនៃប្រេកង់ 6G ដែលត្រូវបានផ្តល់អាជ្ញាប័ណ្ណត្រឹមឆ្នាំ ២០២៨មុនពេលបន្តទៅការផ្សព្វផ្សាយពាណិជ្ជកម្មរបស់ខ្លួន។លោកបានបន្ថែមថា ក្រុមហ៊ុនវៀតណាមគួរតែកំណត់គោលដៅស្រាវជ្រាវ និងផលិតឧបករណ៍ 5G និង 6G ប្រកបដោយជោគជ័យ ឧបករណ៍បញ្ជូន និងឧបករណ៍ស្ថានីយ៍។

សូមបញ្ជាក់ផងដែរថា បច្ចេកវិទ្យា 6G គឺជាជំហានបន្ទាប់ពី 5G ដែលកំពុងត្រូវបានស្រាវជ្រាវ នៅក្នុងប្រទេសមួយចំនួន រួមទាំងសហរដ្ឋអាមេរិក និងប្រទេសចិនផងដែរ។តាមទ្រឹស្តី 6G អាចឈានដល់ល្បឿនមួយតេរ៉ាប៊ីតក្នុងមួយវិនាទី៕