វត្តមានខ្លាឃ្មុំធំបង្ហាញខ្លួនក្នុងតំបន់ការពារធម្មជាតិកម្ពុជា ថតជាប់ដោយដោយម៉ាសុីនថតស្វ័យប្រវត្តិ

ភ្នំពេញ៖ នាពេលថ្មីៗនេះ ក្រសួងបរិស្ថានបានបង្ហាញពីរូបភាពវត្តមានសត្វខ្លាឃ្មុំធំបង្ហាញខ្លួនក្នុងតំបន់ការពារធម្មជាតិកម្ពុជា និងមានការថតជាប់ដោយម៉ាស៊ីនថតស្វ័យប្រវត្តិផងដែរ។

ដោយឡែក ចំពោះខ្លាឃ្មុំធំមួយនេះគឺមាន (ឈ្មោះអង់គ្លេស៖ Asiatic Black Bear ឈ្មោះវិទ្យាសាស្រ្ត៖ Ursus thibetanus) ត្រូវបានថតកាលពីពេលថ្មីៗកន្លងទៅនេះ ដោយម៉ាស៊ីនថតស្វ័យប្រវត្តិនៅក្នុងតំបន់ការពារធម្មជាតិក្នុងភូមិសាស្ត្រខេត្តពោធិ៍សាត់ បាត់ដំបងនិងកោះកុង

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ខ្លាឃ្មុំធំ ជាប្រភេទខ្លាឃ្មុំមានមាឌធំជាងគេ ក្នុងចំណោមខ្លាឃ្មុំទាំងអស់ ដងខ្លួនគ្របដណ្តប់ដោយរោមក្រាស់វែងៗពណ៌ត្នោត និងមានឆ្នូតពណ៌លឿងខ្ចីរាងដូចអក្សរ (V) នៅខាងក្រោមក។

ជាទូទៅ សត្វប្រភេទនេះជាសត្វរស់នៅតែឯង និងរស់នៅជាគូរនៅរដូវបន្តពូជតែប៉ុណ្ណោះ ហើយចូលចិត្តរស់នៅតាមតំបន់ខ្ពង់រាប តំបន់ព្រៃពាក់កណ្តាលស្រោង និងវាលស្មៅក្រាស់ៗ។ ចំណីរបស់ខ្លាឃ្មុំធំមានដូចជា ឃ្មុំ ព្រួត ឫសឈើ សត្វល្អិត រុក្ខជាតិ។

យ៉ាងណាមិញ ចំពោះរបាយណ៍សត្វខ្លាឃ្មុំធំមានវត្តមាននៅក្នុងព្រៃស្រោង ព្រៃពាក់កណ្តាលស្រោង នៅភូមិភាគនិរតី ខេត្តកោះកុង ខេត្តពោធិ៍សាត់ (ជួរភ្នំក្រវាញ) ជាដើម។

គួរបញ្ជាក់ដែរថា សត្វខ្លាឃ្មុំធំប្រភេទមួយនេះ កំពុងតែស្ថិតក្នុងក្រុមប្រភេទជិតផុតពូជ និងត្រូវបានចុះក្នុងបញ្ជីក្រហម IUCN (VU) ជាប្រភេទងាយរងគ្រោះថ្នាក់ជាសាកលផងដែរ៕

ប្រភព៖ ក្រសួងបរិស្ថាន

សូមចូលទស្សនារូបភាពខាងក្រោម៖