មិនស្រួលនោះទេ! យុវជនតៃវ៉ាន់រៀបរាប់ពីការការហ្វឹកហាត់ និងវិញ្ញាសាលំបាកៗ មុននឹងប្រឡងជាប់កងកុម្ម៉ង់ដូពិសេស

តៃវ៉ាន់៖ រឿងរ៉ាវពាក់ព័ន្ធនឹងការខិតខំតស៊ូនឹងការលំបាកដល់កម្រិតកំពូលនៃយុវជននៅដែលរស់នៅឯកោះតៃវ៉ាន់ ដែលចង់ប្រឡងចូលកងកុម្ម៉ង់ដូពិសេស គឺមិនជារឿងងាយស្រួលនោះទេ ដោយនៅក្នុងការប្រឡងនេះ បេក្ខជននិមួយៗត្រូវឆ្លងកាត់ការហ្វឹកហាត់ និងលត់ដំខ្លួននៅក្នុងស្ថានភាពពិបាកៗ ដើម្បីត្រៀមឆ្លងកាត់វិញ្ញាជាច្រើនដំណាក់កាល។

ដោយឡែក នៅក្នុងចំណោមនោះ យុវជនម្នាក់ឈ្មោះអ៊ូយូវៃ (Wu Yuwei) អាយុ២៦ឆ្នាំ បានខិតខំប្រមៀលខ្លួននៅលើផ្ទាំងថ្ម និងថ្មប៉ប្រះទឹក នៅក្នុងការហ្វឹកហាត់ដែលមានឈ្មោះថា «ផ្លូវទៅឋានសួគ៌» ដើម្បីបិទបញ្ចប់ការហ្វឹកហាត់រយៈពេលដប់សប្តាហ៍ ដ៏សែនលំបាកវេទនា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

បន្ទាប់មកទៀតនៅពេលបញ្ចប់វគ្គ «ផ្លូវទៅឋានសួគ៌» ឬការប្រមៀលនៅលើកម្រាលថ្មរដិបរដុបចម្ងាយមួយរយម៉ែត្រ មានន័យថាបេក្ខជនទាំងនេះអាចមានសិទ្ធិចូលបម្រើការនៅក្នុងកងទ័ពដែលមានជំនាញខាងជើងទឹក និងល្បាតដែនសមុទ្រ។ ក្រុមនេះគឺមិនខុសពីកងកម្លាំងកុម្ម៉ង់ដូអាមេរិកនោះទេ (Navy SEALs)។

ចំណែកនៅក្នុងចំណោមបេក្ខជន៣១នាក់ដែលចាប់ផ្ដើមវគ្គលត់ដំរយៈពេលដប់អាទិត្យ មានតែ១៥នាក់ប៉ុណ្ណោះអាចប្រឡងជាប់ដោយជោគជ័យ។ ក្នុងនោះ វគ្គដែលពិបាកជាងគេគឺអាទិត្យចុងក្រោយ ដែលគ្រូបង្វឹកចាត់ទុកថាជា «សប្ដាហ៍ឋាននរក» ព្រោះបេក្ខជនត្រូវលូនក្រាបនៅមូលដ្ឋានទ័ពជើងទឹកនៃកោះតៃវ៉ាន់។ លោកអ៊ូយូវៃប្រាប់ថាគ្រាន់តែចាប់ផ្ដើមបីថ្ងៃដំបូង ធ្វើឲ្យលោកមានអារម្មណ៍ថាលំបាកស្ទើរស្លាប់។

ប៉ុន្តែយូរៗទៅ រាងកាយរបស់យើងរាងស៊ំានឹងស្ថានភាពលំបាកខ្លាំង ដោយសារគោលដៅចម្បងគឺផ្ដោតសំខាន់លើការលត់ដំផ្នែកស្មារតី និងការតាំងចិត្តជារឿងសំខាន់បំផុត។ ប៉ាម៉ាក់របស់គាត់ក៏បានទៅចូលរួមអបអរសាទរកូនផងដែរ នៅពេលបញ្ចប់វគ្គ «ផ្លូវទៅឋានសួគ៌» ដោយជោគជ័យ។

ចំពោះការហ្វឹកហាត់នេះបេក្ខជនទាំងនេះគ្មានឱកាសបានគេងលក់ស្រួលនោះទេអស់រយៈពេលជាច្រើនថ្ងៃជាប់ៗគ្នា ព្រោះពួកគេត្រូវឈរទាំងយប់ទាំងថ្ងៃ និងហ្វឹកហាត់ពិបាកៗជាច្រើនទៀតនៅលើកម្រាលថ្មរដិបរដុប។ អ្នកខ្លះដើរទ្រេតទ្រោតទៅមុខទៅក្រោយ សឹងតែសន្លប់ម្ដងៗ ដោយសារការល្ហិតល្ហៃអស់កម្លាំងពេក។

បន្ទាប់ពីការហ្វឹកហាត់នៅអំឡុងពេលជាង៦ថ្ងៃ និង៥យប់ បេក្ខជនទាំងអស់ដែលចង់ប្រឡងចូលកងកុម្ម៉ង់ដូពិសេស ត្រូវជម្នះឲ្យបានគ្រប់ស្ថានភាពលំបាកទាំងអស់ មានតាំងពីធ្វើដំណើរផ្លូវឆ្ងាយ និងត្រាំនៅក្នុងទឹកជាច្រើនម៉ោង។

ក្រៅពីនេះពួកគេត្រូវចំណាយពេលមួយថ្ងៃៗទល់ៗល្ងាច ដើម្បីត្រាំទឹកសមុទ្រ ឬហ្វឹកហាត់ការហែលនៅក្នុងហាងទឹក, ហាត់អត់ដង្ហើមឲ្យបានយូរនៅក្នុងទឹក, ហាត់ហែលទឹកនៅក្នុងពេលប្រយុទ្ធ និងហាត់ជិះកប៉ាល់វាយឡើងគោកនៅលើឆ្នេរខ្សាច់។

បន្ថែមពីលើនេះទៀត ពេលខ្លះកំពុងគេងលក់ស្រួល មេបញ្ជាការផ្លុំកញ្ចែដាស់ពីដំណេក។ គោលបំណងនៃការហ្វឹកហាត់បែបនេះដើម្បីពង្រឹងស្មារតីកងទ័ពត្រូវតែសម្រេចបេសកកម្មឲ្យបាន ទោះបីជួបនឹងឧបសគ្គពិបាកដល់កម្រិតណាក៏ដោយ៕

ប្រភព៖ PNN

សូមចូលទស្សនារូបភាពខាងក្រោម៖