បន្ទាប់ពីវះ.កាត់​ឆ្អឹងខ្នង​ ម្ចាស់​មេដាយ​មាស​កីឡា​អាស៊ី សាលី អ៊ូ​មើ​ត ត្រូវ​សម្រាក ៣​ខែ

​​រាជធានីភ្នំពេញ៖ សាលី អ៊ូ​មើ​ត ដែលជា កីឡាករ​ម៉ូតូ​ទឹក​ជម្រើស​ជាតិ​កម្ពុជា និង​ជា​ម្ចាស់​មេដាយ​មាស​កីឡា​អាស៊ី បាន​ធ្វើ​ការវះកាត់​ឆ្អឹងខ្នង​ដោយ​ជោគជ័យ​ហើយនៅ​មន្ទីរពេទ្យ​មួយ​នា​ប្រទេស​ថៃ​កាលពី​ថ្ងៃ​ពុធ​ម្សិលមិញ ហើយ​ត្រូវ​សម្រាក​ព្យាបាល​រយៈពេល ៣​ខែទើប​អាច​ហ្វឹកហាត់ និង​ប្រកួត​វិញ​បាន។​ នេះបើតាមការបញ្ជាក់របស់សហព័ន្ធម៉ូតូទឹកកម្ពុជា។

​បើតាម សាលី អ៊ូ​មើ​ត បាន​បញ្ជាក់ថា ខ្លួន​ពិតជា​រីករាយដែល​ការវះកាត់​ទទួលបាន​ជោគជ័យ ដើម្បី​បន្ដ​ក្ដី​ស្រ​ម៉ៃ​របស់ខ្លួនក្នុងការ​ត្រៀមខ្លួន​ចូលរួម​ប្រកួត​កីឡា​ស៊ី​ហ្គេមលើក​ទី​៣២ ឆ្នាំ​២០២៣ នៅ​កម្ពុជា ដែល​ខ្លួន​មាន​មហិច្ឆតា​ចង់​ដណ្ដើម​មេដាយមាស​ជូន​ជាតិ មុននឹង​ខ្លួន​ចូលនិវត្តន៍​ពី​អាជីព​កីឡា​មួយ​នេះ។​ ​កីឡាករ​មាន​ដើមកំណើត​ពី​ខេត្ត​ត្បូងឃ្មុំ​ដដែល​បន្ដថា ការវះកាត់​នេះចំណាយ​ថវិកា​ប្រមាណ ១៥,០០០​ដុល្លារ ដោយ​មិន​រាប់បញ្ចូល​សេវាកម្ម​ផ្សេងៗ។ ប៉ុន្ដែ​ការចំណាយ​ទាំងអស់រ៉ាប់រង​ដោយ​ម្ចាស់​ក្លិប​របស់ខ្លួនគឺ​លោក Karl Heinrich Knauf ម្ចាស់​ក្លិប Flamingo Jet Ski Team នៅ​ប្រទេស​ថៃ។​

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

​អ៊ូ​មើ​ត បាន​ប្ដេជ្ញាចិត្ត​ថា បន្ទាប់ពី​ជាសះស្បើយ​ពីរ​បួស ខ្លួន​នឹង​ព្យាយាម​ហ្វឹកហាត់ និង​ពង្រឹងសមត្ថភាពដើម្បី​បន្ដ​ចូលរួម​ការប្រកួត​អន្ដរជាតិ​នានា និង​ដណ្ដើម​មេដាយ​ជូន​ជាតិ ពិសេស​ដំណើរ​ឆ្ពោះទៅ​ព្រឹត្តិការណ៍​ជា​ប្រវត្តិសាស្ដ្រ​នៅ​កម្ពុជា គឺ​ការប្រកួត​កីឡា​ស៊ី​ហ្គេមឆ្នាំ​២០២៣ តែម្ដង។​ ​គួរ​ដឹងថា សាលី អ៊ូ​មើ​ត បាន​រងរបួស​ប្រេះ​ឆ្អឹងខ្នងក្រោយ​ប៉ះទង្គិច​ជាមួយ​កីឡាករ កៃ វ៉ាន់​ស៊ី​ដែន អំឡុងពេល​ហ្វឹកហាត់ ។ ប៉ុន្ដែ​ភ្លាមៗខ្លួន​មិនបាន​ដឹង​នោះទេ ទើបតែ​ថ្មីៗរូបគេ​បាន​ទៅពិនិត្យ និង​រកឃើញ ហើយ​ត្រូវបាន​វេជ្ជបណ្ឌិត​តម្រូវ​ឲ្យ​ធ្វើការ​វះកាត់​បន្ទាន់ ។ ការណ៍​នេះហើយទើប​ធ្វើ​ឲ្យ​កីឡាករ​ខ្មែរ​-​ឥស្លាម ​រូបនេះបាន​ខកខាន​ចូលរួម​ប្រកួត​ពានរង្វាន់​ពិភពលោក នៅ​ប្រទេស​ថៃកាលពី​សប្ដាហ៍​កន្លងទៅ​៕