ប្រើពាក្យអវិជ្ជមាន ប៉ះពាល់ការលូតលាស់កូនច្រើន​យ៉ាង ម៉ាក់ប៉ាគួរដឹង!

ប៉ាម៉ាក់មួយ​ចំនួន​​តែងប្រើពាក្យអវិជ្ជមានដូចជា «កុំ» «ហាម» «ឈប់» ឬ«ទេ» ដើម្បីប្រាប់​ ឬ ហាមកូន​កុំឱ្យធ្វើនេះ ឬធ្វើនោះ។ តើពាក្យទាំង​នេះ ជះឥទ្ធិពល​​​អ្វីខ្លះដល់កូន​? ប៉ាម៉ាក់គួរ​និយាយ​បែបណាជំនួសវិញ?

តាមការសិក្សាបានឱ្យដឹងថា ពាក្យអវិជ្ជមានដូចជា «កុំ» «ហាម» «ឈប់» ឬ«ទេ» ធ្វើឱ្យកូន​វង្វេង និងមិន​យល់​ពីអត្ថន័យដែលប៉ាម៉ាក់ព្យាយាមប្រាប់​ ឬចង់ឱ្យអាអូនធ្វើអ្វីមួយ ឬ​កូន​​អាច​គិតថាពាក្យទាំងនេះជាការបន្ទោស ដែលកូន​ធ្វើអ្វីក៏ខុស ធ្វើអ្វីក៏មិនត្រូវ ធ្វើអ្វី​ក៏​មិនបាន ឬតែងតែធ្វើខុសជានិច្ច ទើបប៉ាម៉ាក់តែងតែ ហាម ឬបញ្ឈប់កុំឱ្យធ្វើនេះ ឬធ្វើនោះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យូរៗទៅ កូន​នឹងធ្លាក់ទឹកចិត្តដែលអាចបណ្តាលឱ្យខ្វះជំនឿចិត្ត លើខ្លួនឯង និង​មានអារម្មណ៍មិនល្អចំពោះខ្លួនឯង។

លើសពីនេះទៅទៀត ពេលកូន​ឮពាក្យអវិជ្ជមានដូចជា «កុំ» «ហាម» «ឈប់» ឬ«ទេ» គ្រប់​ពេល​វេលា ឬញឹកញាប់ពេក កូនអាចគិតថា មិនចាំបាច់ព្យាយាមធ្វើឱ្យល្អទេ ព្រោះគង់តែប៉ាម៉ាក់ថាឱ្យ ឬ​បន្ទោស ឬហាមដដែល​ហ្នឹង។

ម្យ៉ាងទៀត ពេលអាអូនកំពុងចង់ធ្វើអ្វីមួយ ប៉ាម៉ាក់បែរជាហាមឃាត់ កូន​នឹង​មិន​សុខ​ចិត្តទេ ដូច្នេះប៉ាម៉ាក់គួរប្រាប់ឱ្យធ្វើអ្វីដែលប៉ាម៉ាក់​ចង់ឱ្យកូន​ធ្វើជំនួសឱ្យការ ហាម ឬបញ្ឈប់កូន​ពីការធ្វើអ្វីមួយ។ នេះក៏ជាវិធីដ៏ល្អក្នុង​ការបង្វែរ​អារម្មណ៍​របស់​កូន​​ដែរ។

ពាក្យពេចន៍​ម៉ាក់ៗ​គួរ​ប្រើ៖

• កុំរត់! ឬកុំរត់ប្រយ័ត្នដួលកូន! ប្តូរមកជា ដើរវិញកូនទើបអត់ដួល។
• កុំយកតុក្តតារបស់ប្អូន! ប្តូរមកជា កូនទៅរកអីផ្សេងលេងសិនទៅ ចាំប្អូនឈប់លេង ចាំកូនលេងតុក្តតាហ្នឹង។
• កុំទាត់បាល់ក្នុងផ្ទះបែករបស់របរ! ប្តូរមកជា កូនអាចទាល់​បាល់នៅ​ខាង​ក្រៅ​ផ្ទះ អ៊ឹងចឹងទើប​អត់បែករបស់របរក្នុងផ្ទះ!
• កុំបាចដីខ្សាច់! ប្តូរមកជា កូនអាចចាក់​ខ្សាច់ចូល​ក្នុង​ធុង​នេះ!
• អូនមិនអាចញុំានំពេលនេះបានទេដល់ម៉ោងញុំាបាយហើយ! ប្តូរមកជា អូន​​អាច​ញុំា​នំក្រោយញុំាបាយរួច។
• ឈប់រំខានម៉ាក់! ម៉ាក់កំពុងធ្វើការ។ ប្តូរមកជា ចាំបន្តិច! ម៉ាក់បង្ហើយ​​ការងារសិន ចាំម៉ាក់និយាយជាមួយកូន។
• កុំរំខានប៉ា! ប្តូរមកជា មកលេងជាមួយម៉ាក់ ប៉ាកំពុងធ្វើការ។
• ឈប់យំ! ប្តូរមកជា ប្រាប់ម៉ាក់មើល​ ម៉េចបានកូនយំ!

ពាក្យអវិជ្ជមានដូចជា «កុំ» «ហាម» «ឈប់» ឬ«ទេ» អាចធ្វើឱ្យអាអូនវង្វេង​មិនដឹង​ថាធ្វើម៉េច​ទើប​ត្រូវ ឬត្រូវធ្វើអ្វីបន្ទាប់ទេ ។ ដូច្នេះប៉ាម៉ាក់គួរប្រើភាសាវិជ្ជមាន ដើម្បីប្រាប់អាអូន​ឱ្យ​ធ្វើអ្វីដែលប៉ាម៉ាក់ចង់ឱ្យកូនធ្វើ។ ការធ្វើបែបនេះអាចឱ្យ​កូន​​ធ្វើតាម​តាម​សម្រួល និងបង្កើនទំនាក់ទំនងល្អរវាងប៉ាម៉ាក់ និងកូន​។

ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕ 

អត្ថបទផ្ដល់សិទ្ធិដោយ Hello Krupet