អំឡុងពេលចូលឆ្នាំចិននេះ ពលរដ្ឋខ្មែរកាត់ចិនជាច្រើន សំរុកនាំគ្នាធ្វើរឿងនេះ ដើម្បីសុំលាភសំណាងឆ្នាំថ្មី

រាជធានីភ្នំពេញ៖ ក្នុងអំឡុងពេលចូលឆ្នាំថ្មីប្រពៃណីចិន វៀតណាម នៅក្នុងប្រទេសកម្ពុជា ប្រជាពលរដ្ឋខ្មែរកាត់ខ្សែចិន វៀតណាម ជាច្រើន បានចាប់ផ្ដើមទៅយកអំពៅខ្មៅ និងធូបពីព្រះវិហារចិន មួយកន្លែងនៅក្រុងតាខ្មៅ ខេត្តកណ្ដាល។ ជំនឿទៅយកអំពៅខ្មៅពីព្រះវិហារនេះ ត្រូវបានធ្វើឡើងជារៀងរាល់ឆ្នាំ ដោយពួកគាត់មានជំនឿថា ការយកអំពៅខ្មៅ និងធូបដែលដុតពីព្រះវិហារទៅគេហដ្ឋានវិញ នាំមកនូវជ័យលាភសំណាង ជាពិសេសគឺភាពរីកចំរើនសម្រាប់មុខរបរ។ នេះបើតាមការចុះផ្សាយរបស់ BTV News។

សូមជម្រាបផងដែរថា ការយកអំពៅខ្មៅ និងធូបដែលដុតពីព្រះវិហារចិន ទៅកាន់គេហដ្ឋាន ជាជំនឿសំខាន់មួយរបស់​ប្រជាពលរដ្ឋ​ខ្មែរកាត់ចិន។ ការទៅយកអំពៅនេះ ជារៀងរាល់ឆ្នាំតែងមានមនុស្សជាច្រើនរយនាក់ ទោះបីក្នុងស្ថានភាពមានវត្តមានកូវីដ-១៩ក្ដី។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ការយកអំពៅខ្មៅ និងធូបដែលដុតពីព្រះវិហារទៅគេហដ្ឋាននេះ គឺចាប់ផ្ដើមពីម៉ោង ១២.០០ យប់ នៃថ្ងែសែន ដោយនឹងបន្តរហូតដល់ថ្ងៃបញ្ចប់នៃពិធីបុណ្យចូលឆ្នាំចិន។

សម្រាប់ប្រជាពលរដ្ឋដែលទៅយកអំពៅខ្មៅ និងធូបពីព្រះវិហារចិន នៅថ្ងៃនេះ លើកឡើងថា ពួកគាត់មកយកជារៀងរាល់ឆ្នាំ ដោយមានជំនឿថា វាអាចនាំ​មកនូវភាពសុខសប្បាយ​សម្រាប់​គ្រួសារ ជាពិសេសគឺធ្វើឱ្យការប្រកបរបរអាជីវកម្មរបស់ពួកគាត់រីកចំរើន ​លូតលាស់ដូចអំពៅ។

ចំពោះអំពៅខ្មៅក្នុងកំឡុងពេលនេះ គឺមានការដាក់លក់ជាច្រើននៅតាមដងផ្លូវ នៅពីមុខ​ព្រះវិហារតែម្ដង។ តម្លៃចាប់ពី ២ម៉ឺនរៀល ដល់៤ម៉ឺនរៀល ក្នុង១គូ ទៅតាមទំហំ កម្ពស់​នៃ​ដើម​អំពៅ។ ប្រជាពលរដ្ឋ ដែលមកយកអំពៅនិងធូប គឺត្រូវទិញអំពៅខ្មៅរួចយកចូលទៅ​ក្នុងព្រះវិហារ ដើម្បីឱ្យម៉ុងសាយធ្វើពិធីកិច្ចជូន ចំពោះធូបវិញ ត្រូវចូលទៅដុតក្នុងព្រះវិហាររួចយកត្រឡប់​ទៅ​គេហដ្ឋាន។

ក្នុងកំឡុងពេលនៃពិធីជំនឿ ដែលមានការជួបជុំមនុស្សជាច្រើននេះ ក៏មានការដាក់ទឹកអាល់កុល​សម្រាប់លាងសម្អាតដៃ និងមានការពាក់ម៉ាសការពារបានល្អប្រសើរផងដែរ។ ក៏ប៉ុន្តែការរក្សាគម្លាត​សុវត្ថិភាពវិញពុំទាន់អនុវត្តបានល្អប្រសើរនោះទេ៕

ប្រភព៖ BTV News