ខេត្តរតនគិរី មានភ្ញៀវទេសចរកើនឡើង១៧.១៦% នៃពិធីបុណ្យចូលឆ្នាំចិនចំនួន៣ថ្ងៃ

រតនគិរី៖ នៅក្នុងឆ្នាំ២០២២ ភ្ញៀវទេសចរដែលធ្វើដំណើរកម្សាន្ត នៅខេត្តរតនគិរី កើនឡើង១៧,១៦% នៃពិធីបុណ្យចូលឆ្នាំចិន-វៀតណាម រយៈពេល៣ថ្ងៃពេញ។

ដោយឡែក យោងតាមប្រធានមន្ទីរទេសចរណ៍ខេត្តរតនគិរី លោក ង៉ែត ពិទូ មាន ប្រសាសន៍អោយដឹងនៅរសៀលថ្ងៃទី០២ ខែកុម្ភៈឆ្នាំ២០២២នេះថា ពិធីបុណ្យចូលឆ្នាំចិន-វៀតណាមរយៈពេល៣ថ្ងៃ (៣១មករា ១-២កុម្ភៈ ឆ្នាំ២០២២ ) ខេត្តរតនគិរីទទួលភ្ញៀវទេសចរចំនួន ១២,៤៥១នាក់។ ក្នុងនោះភ្ញៀវអន្តរជាតិ មានចំនួន៥១នាក់ ភ្ញៀវជាតិ១២,៤០១ នាក់។ លោកថាចំនួននេះគឺមានការកើនឡើង១៧.១៦% ភ្ញៀវជាតិកើនឡើង ១៦.៩៩% និងភ្ញៀវអន្តរជាតិកើនឡើង ៨២.១៤% បើប្រៀបធៀបនឹងបុណ្យ ចូលឆ្នាំចិន-វៀតណាម ឆ្នាំ២០២១ កន្លងមក មានចំនួន ១០,៦២៨នាក់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ចំពោះទស្សនៈរបស់ លោក ង៉ែត ពិទូ បានសម្តែងនូវសុទិដ្ឋិនិយមចំពោះកំណើនភ្ញៀវទេសចរដែលមានការហក់ឡើងគួរអោយកត់សម្គាល់បើទោះបីចំនួនហក់ឡើងមិនច្រើនតាមការរំពឹងទុក តែនេះគឺជាសញ្ញាល្អបង្ហាញថាខេត្តរតនគិរី ចាប់ផ្តើមមានភ្ញៀវទេសចរមកលេងកំសាន្តវិញហើយ បន្ទាប់ពីរាជរដ្ឋាភិបាលបើកប្រទេសឡើងវិញក្រោយវិបត្តិកូវីដ១៩ រយៈពេលជិត២ឆ្នាំ។ លោកបានបន្ថែមថា ចំនួនភ្ញៀវដែលមានការកើនឡើងនេះក៏បានបង្ហាញអោយឃើញពីការខិតខំប្រឹងប្រែងរបស់រាជរដ្ឋាភិបាលដែលមានសម្តេចតេជោ ហ៊ុន សែន ជាប្រមុខដែលបានធ្វើអោយប្រទេសជាតិមានសុខសន្តិភាព, ហេដ្ឋារចនាសម្ព័ន្ធមានការតភ្ជាប់បានល្អ គួបផ្សំនឹងសេដ្ឋកិច្ចប្រជាពលរដ្ឋផងដែរ។ ជាពិសេសនោះគឺវ៉ាក់សាំងការពារជំងឺកូវីដ១៩ បានស្រោចលើប្រជាពលរដ្ឋស្ទើរ១០០% ដូច្នេះពួកគាត់មានទំនុកចិត្តមិនសូវព្រួយបារម្មណ៍ ក្នុងការដើរលេងកំសាន្តប៉ុន្មាននោះទេ។

យ៉ាងណាមិញ ប្រធានមន្ទីរទេសចរណ៍រូបនេះក៏បានលើកឡើងផងដែរពីសក្តានុពល វិស័យទេសចរណ៍ដែលបច្ចុប្បន្ននេះមន្ទីរបានធ្វើបច្ចប្បន្នភាពរមណីយដ្ឋានទេសចរណ៍រហូតដល់៣០កន្លែង សុទ្ធសឹងជារមណីយដ្ឋាន ធម្មជាតិ។ ហើយនៅថ្ងៃខាងមុខជាពិសេសបុណ្យចូលឆ្នាំខ្មែរ យើងនឹងបង្វែទិសដៅភ្ញៀវទេសចរអោយទៅលេងតំបន់វាលខ្សាច់ និងទឹកជួរនៅស្រុកតាវែង និងស្រុកវើនសៃ៕

ប្រភព៖ ទូរទស្សន៍ជាតិកម្ពុជា ទទក

សូមចូលទស្សនារូបភាពខាងក្រោម៖