ផ្លូវល្បឿនលឿន ភ្នំពេញ-ព្រះសីហនុ តម្លៃ២០០០លានដុល្លារ នឹងដំណើរការសាកល្បងប៉ុន្មានខែខាងមុខនេះ

ភ្នំពេញ៖ ក្នុងពេលថ្មីៗនេះ ផ្លូវល្បឿនលឿន (Expressway) ពីរាជធានីភ្នំពេញទៅខេត្តព្រះសីហនុ នឹងត្រូវដាក់ឱ្យប្រើប្រាស់សាកល្បងនៅក្នុង ខែកក្កដា និងដាក់ប្រើប្រាស់ជាផ្លូវការ នាអំឡុងខែកញ្ញា ឆ្នាំ២០២២ខាងមុខនេះហើយ បើយោងតាមការលើកឡើងរបស់លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានលើកឡើងយ៉ាងដូច្នេះ។

ដោយឡែក ចំពោះផ្លូវល្បឿនលឿនដែលមានប្រវែងជិត២០០គីឡូម៉ែត្រ មួយនេះ ក្រោយដំណើរការសាងល្បងបានរយៈពេល២ខែ នឹងត្រូវប្រកាសឱ្យដំណើរការជាផ្លូវការ និងដាក់ប្រើប្រាស់ជាផ្លូវការ នាអំឡុងខែកញ្ញា ឆ្នាំ២០២២ខាងមុខនេះហើយ។ 

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

នាថ្ងៃទី៩កុម្ភៈ ខណៈនៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២១ និងលើកទិសដៅការងារឆ្នាំ២០២២ របស់គណៈកម្មាធិការជាតិសុវត្ថិភាពចរាចរណ៍ផ្លូវគោក លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានមានប្រសាសន៍ថា ​ផ្លូវដែលមានតម្លៃវិនិយោគប្រមាណ ២០០០លានដុល្លារនេះ អាចនឹងដាក់ឱ្យប្រើប្រាស់សាកល្បងនៅក្នុងខែកក្កដា ខាងមុខនេះ។ 

ចំពោះការដាក់ឱ្យប្រើផ្លូវល្បឿនលឿននេះ ក្រសួងសាធារណការ​និងដឹកជញ្ជូននឹងផលិតវីដេអូ ពន្យល់ឬណែនាំដល់ពលរដ្ឋទាំងអស់អំពីការប្រើប្រាស់ផ្លូវនេះ ដើម្បីឱ្យអ្នកដំណើរទាំងអស់ មានងាយស្រួលក្នុងការបើកបរផងដែរ។ បន្ថែមពីលើនេះ សម្រាប់ម៉ូតូ និងរថយន្តដែលបើកបរក្នុងល្បឿនយឺត៣០គីឡូម៉ែត្រ ក្នុងមួយម៉ោង គឺមិនត្រូវអនុញ្ញាត្តិឱ្យប្រើប្រាស់ផ្លូវមួយនេះឡើយ។

យ៉ាងណាមិញ សូមជម្រាបថា ផ្លូវល្បឿនលឿននេះ ត្រូវបានបើកការដ្ឋានសាងសង់ កាលពីថ្ងៃទី២២មីនា ឆ្នាំ២០១៩ ក្រោមទុនវិនិយោគរបស់ក្រុមហ៊ុនសាជីវកម្មស្ពាននិងថ្នល់ចិន (CRBC) ពីប្រទេសចិន តាមរយៈក្រុមហ៊ុន Cambodian PPSHV Expressway Co.,Ltd។ ផ្លូវនេះបានឆ្លងកាត់ រាជធានីភ្នំពេញ ខេត្តកណ្តាល កំពង់ស្ពឺ កោះកុង និងខេត្តព្រះសីហនុ៕

ប្រភព៖ ថ្មីថ្មី

សូមចូលទស្សនារូបភាពខាងក្រោម៖