ដល់ក អូមីក្រុង និងដែលតា រួមគ្នា បង្កើតបានជាវីរុសកូនកាត់ ពេលនេះ រកឃើញនៅអង់គ្លេស​

អង់គ្លេស៖ ក្រុមអ្នកជំនាញសុខាភិបាលអង់គ្លេស បានបញ្ជាក់ពីការរកឃើញជាផ្លូវការលើមេរោគបម្លែងថ្មីកូវីដ១៩ ដែលជាកូនកាត់នៃការរួមគ្នារវាងវីរុសអូមីក្រុង និង ដែលតា នៅក្នុងចក្រភពអង់គ្លេស។

វីរុសកូនកាត់ប្រភេទនេះ មានឈ្មោះថា Deltacron ត្រូវបានគេគិតថា មានការវិវត្តនៅក្នុងអ្នកជំងឺដែលឆ្លងមេរោគពីរ ក្នុងពេលតែមួយ ប៉ុន្តែវាមិនទាន់ដឹងច្បាស់នៅឡើយទេ ថាតើវាត្រូវបាននាំចូល ឬមានប្រភពមកពីប្រទេសអង់គ្លេសនោះទេ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

មន្ត្រីទីភ្នាក់ងារសន្តិសុខសុខភាពរបស់ចក្រភពអង់គ្លេសក៏មិនដឹងថា មេរោគដែលទើបនឹងវិវត្តន៍ថ្មីនេះឆ្លង ឬមានសភាពធ្ងន់ធ្ងរកម្រិតណា ឬថាតើវានឹងប៉ះពាល់ដល់ដំណើរការវ៉ាក់សាំងដែរកម្រិតណានោះទេ។

ប្រភពមួយនៅ UKHSA បានបញ្ជាក់ថា មន្ត្រីមិនមានការព្រួយបារម្ភចំពោះវីរុសកូនកាត់នេះ នោះទេ ព្រោះចំនួនករណីឆ្លងមាន «ទាប»។

ជាមួយគ្នានេះ លោកសាស្ត្រាចារ្យ Paul Hunter អ្នកជំនាញខាងជំងឺឆ្លងនៅសាកលវិទ្យាល័យ East Anglia បានគូសបញ្ជាក់ដូច្នេះថា៖ វីរុសកូនកាត់ប្រភេទនេះ'មិនគួរបង្កការគម្រាមកំហែងខ្លាំងពេកទេ' ពីព្រោះ ចក្រភពអង់គ្លេសមានកម្រិតភាពស៊ាំដ៏ធំប្រឆាំងនឹងប្រភេទមេរោគដែលតា និង អូមីក្រុងដើម រួចមកហើយ។

ការរកឃើញនេះកើតឡើងនៅពេលដែលការផ្ទុះឡើងនៃករណីឆ្លងកូវីដ១៩ក្នុងចក្រភពអង់គ្លេស បានធ្លាក់ចុះម្តងទៀតជាមួយនឹងករណីប្រចាំថ្ងៃ ការស្លាប់ និងការសម្រាកព្យាបាលនៅមន្ទីរពេទ្យបានធ្លាក់ចុះក្នុងរយៈពេលមួយសប្តាហ៍៕

ប្រភព៖ Daily Mail