ទីបំផុត! បណ្ឌិត គីម ហ៊ាង ធ្វើការសុំទោសជាសាធារណៈ ក្រោយជ្រុលមាត់រិះគន់រឿងកំណត់កម្ពស់អគារ នៅខេត្តសៀមរាប

រាជធានីភ្នំពេញ៖ នៅថ្ងៃទី១៧ ខែកុម្ភៈ ឆ្នាំ២០២២នេះ លោកឧកញ៉ាបណ្ឌិត គឹម ហ៊ាង បានចេញលិខិតធ្វើការសុំទោសជាសាធារណៈ ក្រោយពីលោក ត្រូវបានមហាជនរិះគន់មិនស្ទើរ ពីសំណាក់បងប្អូនប្រជាពលរដ្ឋខ្មែរ ជាពិសេស ក្នុងនោះ ក៏មានឯកឧត្តម ហ៊ុន ម៉ានី និងលោកបណ្ឌិត សុខ ទូច សុទ្ធតែបានចេញមុខប្រតិកម្មខ្លាំងៗទៅលើរឿងនេះផងដែរ។

សូមរំលឹកផងដែរ តាមរយៈវីដេអូឃ្លីបដែលល្បីថ្មីៗនេះ លើបណ្តាញសង្គម លោកបណ្ឌិត គឹម ហ៊ាង​ បានធ្វើការរិះគន់ចំៗថា មិនសូវមានការរីកចម្រើនទេ ដោយសារតែគ្មានការកសាងអគារខ្ពស់ៗ នៅក្នុងខេត្តសៀមរាប ដោយសារតែលោក​ថា មានវប្បធម៍អភិរក្សច្រើនជ្រុលពេក តាមអង្គការយូណេស្កូ ដែលធ្វើឱ្យខេត្តមួយនេះ ពិបាកដើរទៅមុខណាស់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ដោយឡែក ក្នុងនោះដែរ នាថ្ងៃនេះ លោកបណ្ឌិត គឹម ហ៊ាង បានចេញមុខធ្វើការសុំទោសជាសាធារណៈ ដូច្នេះថា៖ ខ្ញុំបាទឈ្មោះ គីម ហ៊ាង ភេទប្រុស ថ្ងៃខែឆ្នាំកំណើត ២៤ សីហា ១៩៨០ ជាវាគ្មិនម្នាក់ នៅក្នុងសិក្ខាសាលាអចលនទ្រព្យ ឆ្នាំ២០២២ ស្តីអំពី អនាគតនៃវិស័យអចលនទ្រព្យខេត្តសៀមរាប ក្រោយជំងឺរាតត្បាតកូវីដ-១៩ ធូរស្រាល កាលពីថ្ងៃសៅរ៍ ទី១២ ខែកុម្ភៈ ឆ្នាំ២០២២ នៅសណ្ឋាគារ អង្គរផារ៉ាឌី ក្រុងសៀមរាប ខេត្តសៀមរាប។

នៅក្នុងបទបង្ហាញ និងការវិភាគរបស់ខ្ញុំបាទ មានរយៈពេលជាង ២ម៉ោង ខ្ញុំបាទបានបកស្រាយពីចំណុចខ្សោយ ចំណុចខ្លាំង ឱកាស ព្រមទាំងការគំរាមកំហែង ដល់ការវិនិយោគ និងអភិឌ្ឍន៍វិស័យអចលនទ្រព្យ នៅខេត្តសៀមរាប ហើយការបកស្រាយរបស់ខ្ញុំបាទពិតជាមានការប៉ះពាល់ដល់វប្បធម៌ជាតិ ដែលជាកំហុសដ៏ធំមួយ ដែលខ្ញុំបាទបានបង្កើតឡើងដោយអចេតនា។

ខ្ញុំបាទសូមលំឱនកាយ លើកដៃម្រាមដប់ ដើម្បីសូមទោសជាសាធារណៈ ដល់ប្រជាជនកម្ពុជា អាជ្ញាធរមានសមត្ថកិច្ចគ្រប់លំដាប់ថ្នាក់ ពិសេសដល់ថ្នាក់ដឹកនាំប្រទេស ចំពោះកំហុស ដែលខ្ញុំបាទបានបង្កើតឡើងកាលពីថ្ងៃសៅរ៍ ទី១២ ខែកុម្ភៈ ឆ្នាំ២០២២ នៅទីរួមខេត្តសៀមរាប៕