ចំនួនអ្នកឆ្លងកូវីដ១៩ថយចុះ! ចុងសប្ដាហ៍ទី១ខែនេះ កម្ពុជាទទួលបានភ្ញៀវជិត២០ម៉ឺននាក់

ភ្នំពេញ៖ ចុងសប្ដាហ៍ទី១ខែមីនានេះ កម្ពុជាទទួលបានភ្ញៀវជិត២០ម៉ឺននាក់ ដែលចំនួនអ្នកទេសចរបានកើនឡើងវិញ បន្ទាប់ពីចំនួនអ្នកឆ្លងកូវីដ១៩ ត្រូវបានថយចុះ។

ជាក់ស្តែង ឯកឧត្ដមរដ្ឋមន្ត្រី ថោង ខុន បានមានប្រសាសន៍ថា កម្ពុជាមានសន្ទុះវិជ្ជមាននៃភ្ញៀវទេសចរឡើងវិញហើយ ដោយស្ថានភាពភ្ញៀវទេសចរផ្ទៃក្នុងនាចុងសប្តាហ៍ ថ្ងៃទី៥-៦ ខែមីនា ឆ្នាំ២០២២ មានសន្ទុះល្អឡើងវិញបន្ទាប់ពីមានការថមថយ៣សប្តាហ៍ជាប់គ្នា ដោយភ្ញៀវសរុបមានចំនួន១៩៩,៤២៩នាក់ ក្នុងនោះភ្ញៀវជាតិ១៨៨,៣៣៨នាក់ និងភ្ញៀវបរទេសផ្ទៃក្នុង១១,០៩១នាក់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គោលដៅទេសចរណ៍សំខាន់ៗ រួមមាន៖

* ខេត្តព្រះសីហនុ ៤០,០១២នាក់

* រាជធានីភ្នំពេញ ២៤,១០១នាក់

* ខេត្តពោធិ៍សាត់ ២៣,៥១៨នាក់

* ខេត្តបាត់ដំបង ២០,៥៩០នាក់

* ខេត្តកំពត ១៩,៣៦១នាក់

* ខេត្តសៀមរាប ១៨,៦០៩នាក់

* ខេត្តកែប ៦.៣១៦នាក់

* ខេត្តកំពង់ស្ពឺ ៥,៨៧៧នាក់

* ខេត្តមណ្ឌលគិរី ៥,០៣១នាក់។

យ៉ាងណាមិញ ឯកឧត្ដម ថោង ខុន បានអះអាងថា ចរន្តភ្ញៀវទេសចរក្នុងសប្តាហ៍នេះ មានសន្ទុះវិជ្ជមានឡើងវិញបន្ទាប់ពីមានការថមថយ៣សប្តាហ៍ជាប់គ្នា។ ជាក់ស្តែង តួលេខខាងលើមានការកើនឡើងប្រមាណ២០.៨៣% ធៀបនឹងចុងសប្តាហ៍កន្លងមក។

ជាចុងក្រោយ សូមប្រជាជនដែល ធ្វើដំណើរកម្សាន្តសូមកុំភ្លេចអនុវត្តវិធាន៣កុំ៣ការពារ ដើម្បីរួមចំណែកទប់ស្កាត់ការឆ្លងវីរុសកូវីដ១៩នៅក្នុងប្រទេសកម្ពុជា៕

ប្រភព៖ ក្រសួងទេសចរណ៍

សូមចូលអានសេចក្តីលម្អិតខាងក្រោម៖