ក្រុមហ៊ុន Ezecom សហការជាមួយក្រុមហ៊ុន AWS ដើម្បីផ្តល់ជូនសេវាខ្លោដសម្រាប់កម្ពុជា

ភ្នំពេញ៖ Ezecom ក្រុមហ៊ុនផ្តល់សេវាអ៊ិនធឺណិត (ISP) លំដាប់ខ្ពស់នៅកម្ពុជា នៅថ្ងៃសុក្រ ទី១១ ខែមិនា ឆ្នាំ២០២២ បានប្រកាសពីចាប់ដៃគ្នាជាមួយក្រុមហ៊ុន Amazon Web Services (AWS) ដើម្បីផ្តល់ជូនអតិថិជនរបស់ខ្លួននូវបច្ចេកវិទ្យាសេវា Cloud ឈានមុខគេ ដូចជាការគណនា (compute), ការរក្សាទុកទិន្នន័យ, មូលដ្ឋានទិន្នន័យ, ការធានាសុវត្ថិភាពនិង ការគ្រប់គ្រងបណ្តាញ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ភ្ជាប់ជាមួយនឹងភាពជាដៃគូរនេះក្រុមហ៊ុន AWS សហការជាមួយនឹងក្រុមហ៊ុន Ezecom បានរៀបចំវេទិការពិភាក្សាស្តីអំពី “ពីការបើកដំណើរការ Cloud ផ្លាស់ប្តូរប្រក្រតីភាពតាមគន្លងថ្មីនៅក្នុងឧស្សាហកម្មហរិញ្ញវត្ថុ” នៅសណ្ឋាគារ សូហ្វីតែលភ្នំពេញភូគីត្រា ដោយមានការអញ្ជើញចូលរួមពីតំណាងក្រសួងប្រៃសណីយ៍ និងទូរគមនាគមន៍ លោក ស៊ុន រ៉ាពីដ អគ្គនាយករង នៃអគ្គនាយកដ្ឋានបច្ចេកវិទ្យាទូរគមនាគមន៍និងព័ត៌មាន, លោក William Mark Hanna, គ្រុបនាយកប្រតិបត្តិហិរញ្ញវត្ថុ ប្រចាំក្រុមហ៊ុន Royal Group The Companies, និងថ្នាក់ដឹកនាំជាន់ខ្ពស់នៃក្រុមហ៊ុនសហគ្រាសជាច្រើនរូបផ្សេងទៀត។

ថ្លែងក្នុងឱកាសនោះ លោកស្រី Yuni Lee Heathcote អគ្គនាយិកាក្រុមហ៊ុន Ezecom មានប្រសាសន៍ថា៖

«ការទទួលបានភាពជាដៃគូរទីមួយប្រចាំប្រទេសកម្ពុជាជាមួយក្រុមហ៊ុន AWS គឺជាសមិទ្ធផលថ្មីមួយផ្សេងទៀតសម្រាប់ក្រុមហ៊ុន Ezecom ខណៈដែលយើងបន្តស្វែងរកសេវាថ្មីៗ ដើម្បីគាំទ្រអតិថិជនដែលមានស្រាប់ និងអតិថិជនថ្មី ក្នុងការធ្វើអោយប្រសើរឡើងនូវអាជីវកម្មរបស់ពួកគេ។ ការប្រើប្រាស់សេវា Cloud ក្នុងប្រទេសកម្ពុជាស្ថិតនៅដំណាក់កាលដំបូងនៅឡើយ ហើយតាមរយៈភាពជាដៃគូជាមួយក្រុមហ៊ុន AWS, ក្រុមហ៊ុន Ezecom ផ្តល់ជូនអតិថិជននូវលទ្ធភាពទទួលបានសេវាល្អបំផុត ដើម្បីពង្រឹងបន្ថែមទៀតនូវអនាគតឌីជីថលរបស់កម្ពុជា។ ក្រៅពីនោះគឺការបង្កើននូវជំនាញផ្នែកឌីជីថល ដែលកំពុងតែត្រូវការជាចំាបាច់ដើម្បីសម្រេចបាននូវគោលដៅនេះ»។

លោកស្រី Yuni Lee Heathcote

លោកស្រី Yuni Lee Heathcote បន្ថែមថា៖

«សេវា Cloud របស់យើងនឹងអាចឱ្យអតិថិជនរក្សាទុក និងប្រើប្រាស់ទិន្នន័យរបស់ពួកគេនៅក្នុងCloud ដែលជាការកាត់បន្ថយចំណាយលើតម្រូវការមជ្ឈមណ្ឌលទិន្នន័យ។ តាមរយៈការប្រើប្រាស់ Cloud ក្រុមហ៊ុនសហគ្រាសនឹងអាចមានលទ្ធភាពប្រតិបត្តិការប្រកបដោយប្រសិទ្ធភាព និងសាកសិទ្ធភាព”។

លោកស្រី Yuni Lee Heathcote

ក្រុមហ៊ុន AWS ផ្តល់ជូននូវហេដ្ឋរចនាសម្ព័ន្ធ Cloud ដែលជាទីទុកចិត្តខ្ពស់ អាចបង្កើនទំហំ និងបន្ថយទំហំប្រើប្រាស់បាន ជាមួយការចំណាយទាប ដែលផ្តល់ថាមពលដល់ក្រុមហ៊ុនចំនួនរាប់សែននៅក្នុងប្រទេសចំនួន១៩០នៅជុំវិញពិភពលោក។ សេវា Cloud របស់ក្រុមហ៊ុន Ezecom ដែលផ្តល់ដោយក្រុមហ៊ុន AWS នូវសេវាចំណាយទាប តម្លៃទៅតាមទំហំនៃការប្រើប្រាស់និងមិនចាំបាច់បង់ថ្លៃជាមុន។ លើសពីនេះទៀត ក្រុមអ្នកជំនាញរបស់ក្រុមហ៊ុន EZECOM នឹងផ្តល់ជូនការប្រឹក្សាយោបល់អំពីសេវាCloud ដល់អតិថិជនមុនពេលចុះឈ្មោះប្រើប្រាស់កញ្ចប់សេវា AWS។

ក្រុមការងាររបស់ក្រុមហ៊ុន EZECOM ក៏នឹងផ្តល់ជូនអតិថិជននូវការប្រឹក្សាអំពីការផ្លាស់ប្តូរ ការអនុវត្ត ព្រមទាំងការគាំទ្រនិងការគ្រប់គ្រងជាបន្តផងដែរក្រោយពេលចុះហត្ថលេខាប្រើប្រាស់សេវា។ សេវា Cloud របស់ក្រុមហ៊ុន Ezecom នឹងផ្តោតលើសហគ្រាសធុនតូច និងធុនមធ្យម (SMEs) និងក្រុមហ៊ុនធំៗ ស្ថាប័នក្នុងវិស័យសាធារណៈ ធនាគារនិងហិរញ្ញវត្ថុ ប្រព័ន្ធផ្សព្វផ្សាយនិងកម្សាន្ត និងឧស្សាហកម្មផលិតកម្ម។ ក្រុមហ៊ុន Ezecom នឹងផ្តល់ជូនសេវាដល់ស្ថាប័នដែលប្រតិបត្តិការក្នុងខេត្តកណ្តាល ព្រះសីហនុ សៀមរាប ក្រុងប៉ោយប៉ែត ក្រុងបាវិត និងរាជធានីភ្នំពេញ ហើយគ្រោងនឹងពង្រីកនៅទូទាំងប្រទេសកម្ពុជានាពេលអនាគត។

ការផ្លាស់ប្តូរមកប្រើសេវា Cloud នៅកម្ពុជា អតិថិជន នឹងទទួលបាននូវអត្ថប្រយោជន៍អំពីការពង្រីក និងបង្កើនកំរិតនៃការបង្កើតថ្មីដែលCloud ផ្តល់អោយ។ សេវា Cloudនឹងផ្តល់លទ្ធភាពឱ្យក្រុមហ៊ុនក្នុងស្រុកធ្វើទំនើបកម្ម និងប្រកួតប្រជែងក្នុងទិដ្ឋភាពសាជីវកម្មពិភពលោក ដែលកំពុងផ្លាស់ប្តូរយ៉ាងឆាប់រហ័ស។ ជំនួសឱ្យការរង់ចាំរយៈពេលជាច្រើនសប្តាហ៍ ឬច្រើនខែ ដើម្បីផ្តល់ហេដ្ឋារចនាសម្ព័ន្ធនៅនឹងកន្លែង ក្រុមហ៊ុនសហគ្រាសនឹងអាចដាក់ដំណើរការកម្មវិធីថ្មីៗដោយរលូន ពង្រីកសេវាបានភ្លាមៗ ខណៈដែលបន្ទុកការងារកើនឡើង ហើយក៏អាចបន្ថយទំហំផ្ទុកមកវិញបានផងដែរ ប្រសិនបើតម្រូវការមានការថយចុះ។

តាមរយៈភាពជាដៃគូជាមួយក្រុមហ៊ុន AWS ក្រុមហ៊ុន Ezecom ចូលរួមជាមួយក្រុមហ៊ុនលំដាប់ថ្នាក់ពិភពលោកផ្សេងទៀតដូចជា Disney, Netflix, Airbnb និង Abode ក្នុងការផ្តល់នូវសេវា Cloud ដែលល្អបំផុតនេះសម្រាប់អត្ថប្រយោជន៍របស់ក្រុមហ៊ុនសហគ្រាសកម្ពុជា៕

អំពីក្រុមហ៊ុន Ezecom

ក្រុមហ៊ុន Ezecom ត្រូវបានបង្កើតឡើងក្នុងឆ្នាំ២០0៧ ដើម្បីបម្រើតម្រូវការទីផ្សារសេវាអ៊ិនធឺណិតសម្រាប់ក្រុមហ៊ុន សហគ្រាស និងតាមលំនៅដ្ឋាន ដែលបាននិងកំពុងរីកចម្រើនយ៉ាងឆាប់រហ័សនៅប្រទេសកម្ពុជា។ ចាប់តាំងពីបានបង្កើតឡើងមក ក្រុមហ៊ុនបានក្លាយជាអ្នកផ្តល់សេវាអ៊ិនធឺណិត និងបច្ចេកវិទ្យាទំនាក់ទំនងដ៏ទូលំទូលាយនិងនាំមុខគេមួយក្នុងព្រះរាជាណាចក្រកម្ពុជា រួមទាំងអ៊ិនធឺណិតខ្សែហ្វាយប៊ើអុបទិក សេវា IPLC, DPLC, MPLS, VPLSព្រមទាំងដំណោះស្រាយនិងសេវាកម្ម VAS ដែលមានមូលដ្ឋានលើអ៊ិនធឺណិតផ្សេងទៀត។ នៅក្រុមហ៊ុន Ezecom យើងផ្តល់អំណាចដល់ប្រជាជន ក្រុមហ៊ុន សហគ្រាស និងប្រទេសជាតិ ដើម្បីរួមគ្នាកសាង និងរៀបចំអនាគតឌីជីថលរបស់អ្នក។ បេសកកម្មរបស់ក្រុមហ៊ុន Ezecom គឺដើម្បី “ក្លាយជាអ្នកផ្តល់ដំណោះស្រាយល្អជាងគេខាងសេវាទំនាក់ទំនងនៅប្រទេសកម្ពុជា តាមរយៈការបង្កើតថ្មី និងការបន្តកែលម្អខ្លួនព្រមទាំងជួយលើកស្ទួយដល់សង្គម”។

ក្រុមហ៊ុនបានប្រេីប្រាស់បណ្តាញខ្សែហ្វាយប៊ើអុបទិកនៅទូទាំងប្រទេសកម្ពុជា ដែលគាំទ្រដោយ MPLS និងសេវាមជ្ឈមណ្ឌលទិន្នន័យកម្រិតពិភពលោកទៀតផង។ យើងដឹងច្បាស់អំពីតម្រូវការគុណភាពខ្ពស់ និងសេវាអ៊ិនធឺណិតដែលគួរឱ្យទុកចិត្តបាន ដូច្នេះ ក្រុមហ៊ុន Ezecom បានវិនិយោគយ៉ាងច្រើនលើបណ្តាញហេដ្ឋារចនាសម្ព័ន្ធឌីជីថល រួមទាំងប្រព័ន្ធខ្សែកាប្លិ៍បាតសមុទ្រ (MCT) ដែលត្រូវបានភ្ជាប់មកកាន់ដីគោកប្រទេសកម្ពុជាក្នុងឆ្នាំ២០១៧ ដោយមានការសហការជាមួយក្រុមហ៊ុន Telekom Malaysia និងក្រុមហ៊ុន Symphony Thailand។ ការវិនិយោគដ៏មានសារៈសំខាន់ទាំងនេះធានាបាននូវកម្រិតសេវាដ៏សាកសមបំផុតចំពោះតម្រូវការរបស់ក្រុមហ៊ុន សហគ្រាស និងអ្នកប្រើប្រាស់តាមគេហដ្ឋាន។ ដំណោះស្រាយដោយភាពច្នៃប្រឌិត និងហេដ្ឋារចនាដ៏រឹងមាំរបស់យើងបានធ្វើឱ្យយើងក្លាយជាក្រុមហ៊ុនឈានមុខគេក្នុងទីផ្សារក្នុងវិស័យរបស់ក្រុមហ៊ុន និងជាកត្តាជំរុញមួយនៃការវិវត្តឌីជីថលរបស់កម្ពុជា។

ទំនាក់ទំនងក្រុមហ៊ុន Ezecom

ផ្ទះលេខ ៧ដេ មហាវិថីសហព័ន្ធរុស្ស៊ី អគារសភាពាណិជ្ជកម្មកម្ពុជា រាជធានីភ្នំពេញ ប្រទេសកម្ពុជា។

ទូរស័ព្ទ៖ (+៨៥៥) ២៣ ២៣ ៨១៨១

គេហទំព័រ៖ www.ezecom.com.kh

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

SPONSORED CONTENT

ក្រុមហ៊ុន Ezecom សហការ​ជាមួ​យ​ក្រុមហ៊ុន AWS ដើម្បីផ្តល់ជូន​សេវា​ខ្លោដ​សម្រាប់​កម្ពុជា

In Case You Missed It

ក្រុមហ៊ុន Ezecom សហការជាមួយក្រុមហ៊ុន AWS ដើម្បីផ្តល់ជូនសេវាខ្លោដសម្រាប់កម្ពុជា