ភ្នំពេញ៖ កាកបាទក្រហមកម្ពុជា បានទទួលថវិកាពីក្រុមហ៊ុន ហ្គាឡាក់ស៊ី ណាវាត្រា និង បុរី ឡេង ណាវាត្រា ក្នុងឱកាសខួបទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២២ សម្រាប់បន្តប្រើប្រាស់ក្នុងការជួយសង្គ្រោះដល់ប្រជាពលរដ្ឋដែលរងគ្រោះមហន្តរាយផ្សេងៗ ដោយមិនប្រកាន់និន្នាការអ្វីទាំងអស់ ។
ពិធីប្រគល់-ទទួលជំនួយថវិកានេះ ធ្វើឡើងនាព្រឹកថ្ងៃទី០៥ មេសា ឆ្នាំ២០២២ ក្រោមអធិបតីភាព លោកជំទាវ អាន្នី សុខអាន អនុប្រធានកាកបាទក្រហមកម្ពុជា ដោយមានការចូលរួមពី លោកជំទាវ កិត្តិបណ្ឌិត អ៊ុក ម៉ាលី អគ្គហេរញិកកាកបាទក្រហមកម្ពុជា, លោកជំទាវ ពុំ ចន្ទីនី អគ្គលេខាធិការ, លោកជំទាវ ម៉ែន នារីសោភ័គ អគ្គលេខាធិការរងទី១, ឯកឧត្តម យូ ឡាណា អគ្គលេខាធិការរងទី២ រីឯក្រុមហ៊ុន ហ្គាឡាក់ស៊ី ណាវាត្រា និង បុរី ឡេង ណាវាត្រា រួមមាន៖ អ្នកឧកញ៉ា ឡេង ណាវ៉ាត្រា និង លោកជំទាវ ឈឺន ស្រីម៉ាច, ឧកញ៉ា ឡេង ប្រុស, ឧកញ៉ា ឡេង និមល, លោក ហេង ឡុង និង លោកស្រី ចន ច័ន្ទលក្ខិណា ។
ក្នុងឱកាសនេះ លោកជំទាវ អាន្នី សុខអាន បានមានប្រសាសន៍ថា សម្រាប់សប្បុរសជនគ្រប់មជ្ឈដ្ឋានដែលមានសទ្ធាជ្រះថ្ លាចូលរួមបរិច្ចាគថវិកាជូនកាកបាទក្រហមក្រហមកម្ពុជា ក្នុងឱកាសខួបលើកទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២២ គឺដើម្បីធ្វើឱ្យសមាគមជាតិ មានធនធានបន្តផ្តល់សេវាកម្មមនុស្សធម៌ ដោះស្រាយបញ្ហាប្រឈមនានា បន្តពង្រឹងភាពធន់សហគមន៍ និងជួយសម្រាលទុក្ខលំបាកជូនប្រជាពលរដ្ឋរងគ្រោះ និងងាយរងគ្រោះបំផុត តាមគោលការណ៍គ្រឹះរបស់ចលនាអន្តរជាតិកាកបាទក្រហម និងអឌ្ឍចន្ទក្រហម។ ប្រការនេះ ជាទង្វើមួយជួយដល់សង្គម និងអាចជួយឲ្យប្រជាជនខ្មែរដែលកំពុងជួបការលំបាក ទទួលបាននូវភាពកក់ក្តៅ និងការយកចិត្តទុកដាក់យ៉ាងពេញលេញពីរាជរដ្ឋាភិបាល និងសប្បុរសជនគ្រប់ទិសទីផងដែរ។
ជាមួយគ្នានេះដែរ អ្នកឧកញ៉ា ឡេង ណាវ៉ាត្រា សូមកោតសរសើរចំពោះបេសកកម្មមនុស្សធម៌យ៉ាងសកម្មនានារបស់កាកបាទក្រហមកម្ពុជា បានយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ដែលកំពុងជួបការលំបាកដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ និងសូមបន្តគាំទ្រយ៉ាងពេញទំហឹងក្នុងបេសកកម្មមនុស្សធម៌ជាបន្តបន្ទាប់របស់កាកបាទក្រហមកម្ពុជា ដើម្បីចូលរួមដោះស្រាយបញ្ហាប្រឈម បន្តពង្រឹងភាពធន់សហគមន៍ និងជួយសម្រាលទុក្ខលំបាកប្រជា ពលរដ្ឋរងគ្រោះ និងងាយរងគ្រោះបំផុតនៅក្នុងប្រទេសកម្ពុជា។
អ្នកឧកញ៉ា ឡេង ណាវ៉ាត្រា បានបន្តថា អ្នកឧកញ៉ាផ្ទាល់និងក្រុមគ្រួសារ ក៏ធ្លាប់រស់នៅក្នុងភាពក្រីក្រ និងទទួលបានអំណោយ ដ៏ថ្លៃថ្លាពីកាកបាទក្រហមកម្ពុជាផងដែរ ដូចនេះលោកចងចាំមិនភ្លេចនូវសកម្មភាព និងបេសកកម្មមនុស្សធម៌ដ៏មានតម្លៃរបស់កាកបាទក្រហមកម្ពុជា ។ ក្នុងឱកាសខួបទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២២ ក្រោមប្រធានបទ «ទាំងអស់គ្នារួមជាមួយកាកបាទក្រហមកម្ពុជា ដោះស្រាយបញ្ហាប្រឈមនានា និងបន្តពង្រឹងភាពធន់សហគមន៍» ក្រុមហ៊ុន ហ្គាឡាក់ស៊ី ណាវ៉ាត្រា និង បុរី ឡេង ណាវាត្រា មានកិត្តិយស សូមចូលរួមជាទឹកចិត្តសប្បុរសធម៌ ជាមួយថវិកាសរុប ២លានដុល្លារអាមេរិក និង ៥,០០០ដុល្លារអាមេរិក ពីសំណាក់លោក ហេង ឡុង និងលោកស្រី ចន ច័ន្ទលក្ខិណា ដើម្បីរួមចំណែកដល់បេសកកម្មមនុស្សធម៌ដ៏ថ្លៃថ្លារបស់កាកបាទក្រហមកម្ពុជា ដែលស្របតាមគោលការណ៍គ្រឹះរបស់ចលនាអន្តរជាតិ កាកបាទ ក្រហម និងអឌ្ឍចន្ទក្រហម ។
ឆ្លៀតក្នុងឱកាសនេះ លោកជំទាវ អាន្នី សុខអាន ក៏បានថ្លែងអំណគុណចំពោះក្រុមហ៊ុន ហ្គាឡាក់ស៊ី ណាវ៉ាត្រា និង បុរី ឡេង ណាវាត្រា ដែលមានសទ្ធាជ្រះថ្លាចូលរួមបរិច្ចាគថវិកាជូនកាកបាទក្រហមក្រហមកម្ពុជា ក្នុងឱកាសខួបលើកទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២២ និងសូមជូនពរដល់អ្នកឧកញ៉ា ឡេង ណាវ៉ាត្រា និងក្រុមគ្រួសារ រួមទាំងលោក ហេង ឡុង និងលោកស្រី ចន ច័ន្ទលក្ខិណា ទទួលបានជោគជ័យក្នុងមុខជំនួញបន្តទៀត ។
គួររំលឹកថា កាលពីថ្ងៃទី០៥ មេសា ឆ្នាំ២០២១ ក្រុមហ៊ុន ហ្គាឡាក់ស៊ី ណាវាត្រា និងបុរី ឡេង ណាវាត្រា បានចូលរួមជាមួយកាកបាទក្រហមកម្ពុជា ក្នុងទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ខួបលើកទី១៥៨ ទឹកប្រាក់ ១,៤លានដុល្លារអាមេរិក ។សូមជម្រាបថា ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២២ ខួបទី១៥៩ ប្រារព្ធឡើងក្រោមប្រធានបទ «ទាំងអស់គ្នារួមជាមួយកាកបាទក្រហមកម្ពុជាដោះស្រាយបញ្ហាប្រឈមនានា និងបន្តពង្រឹងភាពធន់សហគមន៍»។
កាកបាទក្រហមកម្ពុជាដែលមានហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយសនិង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន មានកិត្តិយសសូមអំពាវនាវចំពោះសម្តេច ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី អ្នកនាង កញ្ញា សប្បុរសជនគ្រប់មជ្ឈដ្ឋាន និងបង-ប្អូនជនរួមជាតិ សូមចូលរួមបរិច្ចាគថវិកាតាមសទ្ធាជ្រះថ្លា ជូនកាកបាទក្រហមកម្ពុជា ក្នុងឱកាសខួបលើក ទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២២ ដើម្បីសមាគមជាតិ មានធនធានបន្តផ្តល់សេវាកម្មមនុស្សធម៌ ដោះស្រាយបញ្ហាប្រឈមនានា បន្តពង្រឹងភាពធន់សហគមន៍ និងជួយ សម្រាលទុក្ខលំបាកប្រជាពលរដ្ឋរងគ្រោះ និងងាយរងគ្រោះបំផុត តាមគោលការណ៍គ្រឹះរបស់ចលនាអន្តរជាតិ កាកបាទក្រហម និងអឌ្ឍចន្ទក្រហម ។ កាកបាទក្រហមកម្ពុជា សង្ឃឹមយ៉ាងមុតមាំថា សប្បុរសជនគ្រប់មជ្ឈដ្ឋាន នឹងចូលរួមយ៉ាងច្រើនកុះករ ជួយឧបត្ថម្ភជាថវិកា សម្ភារៈ ដល់កាកបាទក្រហមកម្ពុជា ពុំខានឡើយ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
