ទីបំផុតភាពយន្តខ្មែររឿង «ប៊ូឌីញស» ដែលបានឈ្នះពានអន្តរជាតិ បានបង្ហាញខ្លួននៅក្នុងរោងកុនជាផ្លូវការហើយ! (មានវីដេអូ)

ភ្នំពេញ៖ ភាពយន្តខ្មែរដែលត្រូវបានផលិតឡើងដោយអ្នកជំនាញកម្រិតបរទេស គឺរឿង «ប៊ូឌីញស»  បានបើកសម្ពោធដាក់បញ្ចាំងជាផ្លូវការហើយ កាលពីថ្ងៃទី៥ មេសា ឆ្នាំ២០២២ កន្លងទៅនេះ នៅរោងកុនក្នុងផ្សារទំនើប Midtown។ ការសម្រេចដាក់បញ្ចាំងលក់សំបុត្រនេះ គឺបន្ទាប់ពីរឿងនេះបានដំណើរដាក់ផ្សាយនៅតាមបណ្ដាប្រទេសជាច្រើន និងបានចូលរួមនៅក្នុងមហោស្រពភាពយន្តនៅក្រៅប្រទេសរហូតដល់ជាង ២០លើកហើយបានឈ្នះពានរង្វាន់លំដាប់អន្តរជាតិចំនួន២។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោក នាង កាវិច ជាអ្នកនិពន្ធ និងជាអ្នកដឹកនាំសម្ដែង បានលើកឡើងដូច្នេះថា រឿង «ប៊ូឌីញស» នេះ គឺជារឿងដែលស្ដែងពីជីវិតរបស់គ្រួសារជាច្រើន ដែលរស់នៅក្នុងអាគារប៊ូឌីង មុននឹងត្រូវបានវាយកំទេច ហើយសាច់រឿងចម្បងនៅក្នុងរឿងនោះ គឺស្ដែងពីប្រវត្តិពិតប្រាកដរបស់លោក និងគ្រួសារ ដែលធ្លាប់រស់នៅប៊ូឌីង។

លោកថា រំភើបចិត្តដែលប្រែក្លាយពីក្មេងរស់នៅក្នុងអាគារចំណាស់ប៊ូឌីង ហើយអាចក្លាយជាអ្នកផលិតភាពយន្តខ្នាតធំ ហើយជាភាពយន្តដែលរៀបរាប់ពីប្រវត្តិរបស់ខ្លួន។ យ៉ាងណាមិញលោកបានបញ្ជាក់ទៀតថា សាច់រឿងទាំងមូល ក៏មានការប្រឌិតខ្លះៗផងដែរ ដើម្បីអោយមានឈុតឆាកប្រទាក់ក្រឡាគ្នា។ ភាពយន្តនេះបានផលិតរួចរាល់តាំងពីមុនកូវីតផ្ទុះខ្លាំង ហើយដោយសារតែបញ្ហារោងកុននៅមិនទាន់បើកទូលំទូលាយ ទើបលោកបានយកភាពយន្តនេះ ទៅបង្ហាញនៅក្នុងមហោស្រពភាពយន្ត ដោយមុនដាក់បញ្ចាំងនៅកម្ពុជា គឺបានចូលរួមមហោស្រពអន្តរជាតិ ជាង ២០លើកមកហើយ។

អ្វីដែលលោកសប្បាយចិត្ត គឺភាពយន្តនេះបានទទួលពានចំនួន២ ពីមហោស្រពអន្តរជាតិ ក្នុងចំណោមជាង ២០លើក ដែលបានចូលរួម។ ក្នុងពិធីសម្ពោធនោះ ក៏មានវត្តមានតំណាងអគ្គរដ្ឋទូតសហរដ្ឋអាមេរិកអញ្ជើញចូលរួមជាភ្ញៀវកិត្តិយសផងដែរ ក្រៅពីតារាសិល្បៈ ភ្ញៀវកិត្តិយស ផលិតករខ្មែរ និងបរទេស និងអ្នកឌីហ្សាញល្បីៗជាច្រើនរូបទៀត។ នេះក៏ចាត់ទុកថា គឺជាវីដេអូឯកសារពីអាគារប៊ូឌិញ និងអ្នកធ្លាប់រស់នៅទីនោះ ក្រោយពេលអាគារមួយនេះ ត្រូវបាត់រូបរាងពីកណ្ដាលរាជធានីផងដែរ។ ភាពយន្តនេះជាការផលិតដោយផលិតកម្ម KongChak Picture ដែលចម្រុះដោយផលិតករខ្មែរ និងបរទេស អមដោយការបំពាក់ឧបករណ៍ទំនើបៗ ទើបធ្វើអោយភាពយន្តនេះមានស្ដង់ដារដូចរឿងក្រៅប្រទេស ហើយឈានដល់ការឈ្នះពានដល់ទៅ២ លើឆាកអន្តរជាតិ។

លោក ឈួន ពិសិដ្ឋ តួអង្គឯក ដែលបានសម្ដែងតំណាងអោយលោក នាង កាវិច បានបង្ហាញនូវអារម្មណ៍រីករាយយ៉ាងខ្លាំង ដែលមានឱកាសបានសម្ដែងក្នុងភាពយន្តនេះ និងចាត់ទុកថា គឺជាមោទនភាពយ៉ាងខ្លាំងដែលភាពយន្តដែលខ្លួនសម្ដែង ត្រូវបានដាក់ផ្សាយនៅក្នុងស្រុក នៅអំឡុងពេលចូលឆ្នាំមកដល់។

លោកថា ភាពយន្តនេះដំណើរការលក់សំបុត្រចាប់ពីថ្ងៃទី៧ មេសា ឆ្នាំ២០២២ នេះតទៅ នៅគ្រប់រោងកុនទំនើប ហើយក៏រំពឹងផងដែរថា នឹងទទួលបានការគាំទ្រខ្លាំង ព្រោះអ្នកនៅភ្នំពេញហើយមិនទៅលេងស្រុកកំណើត គឺពិតជានិយមដើរផ្សារទំនើប និងទស្សនាភាពយន្ត។ លោកក៏ទទូចអោយចូលរួមគាំទ្រស្នាដៃមួយនេះផងដែរ ដោយសារតែរឿង «ប៊ូឌីញស» ស្ដែងឡើងពីអាគារដ៏ចំណាស់មួយនៅភ្នំពេញ ដែលទើបតែត្រូវបានគេវាយចោល ដែលពិតជាកូនខ្មែរមួយចំនួននឹងមិនបានដឹង ហើយឮតែឈ្មោះ។ លោកថាភាពយន្តនេះ គឺជាវីដេអូឯកសារដ៏សំខាន់របស់អាគារប៊ូឌិញស ហើយក៏បានបន្យល់នូវអនុស្សាវរីយ៍ច្រើនណាស់ក្រោយពេលសម្ដែងចប់។

គួបញ្ជាក់ផងដែរថា រឿង «ប៊ូឌីញស» បានផលិតឡើងតាំងពីឆ្នាំ២០១៦ តែតួអង្គដែលបានសម្ដែងនៅក្នុងរឿងនេះគឺពិតជាសម្ថភាពខ្លាំងក្លា និងបានធ្វើឱ្យរឿងនេះមានភាពប្រទាក់ក្រឡាគួរឱ្យចង់តាមដានទស្សនា។ ចង់ដឹងថា តើរឿង «ប៊ូឌីញស» បានបង្ហាញអំពីអ្វីខ្លះ សូមកុំភ្លេចទៅទស្សនាទាំងអស់គ្នាណា៎៕

ទស្សនាវីដេអូ Trailer ដូចខាងក្រោមនេះ៖

• ភាពយន្ត
• វីដេអូ