អង្គែជារោគសើស្បែកដែលបណ្តាលមកពីក្រពេញលើស្បែកក្បាលយើងធ្វើការហួសកំណត់ ហើយបង្កទៅជាការរបកស្បែកក្បាលដែលមានសណ្ឋានជាកម្ទេចតូចៗរួមជាមួយអាការៈរមាស់។ តើអង្គែធ្វើឱ្យយើងជ្រុះសក់ដែរឬទេ? ហើយអាចចម្លងពីមនុស្សម្នាក់ទៅមនុស្សម្នាក់ទៀតទេ? និងអាចការពារតាមវិធីណាខ្លះ?
វេជ្ជបណ្ឌិត ហុង លីដា ឯកទេសជំងឺសើស្បែកទូទៅនៅពេទ្យសើស្បែកអាដាម៉ាបានឱ្យដឹងថា ជាធម្មតាអង្គែមិនចម្លងពីមនុស្សម្នាក់ទៅមនុស្សម្នាក់ទៀតទេ ព្រោះជាកត្តាសើស្បែករៀងៗខ្លួន ហើយក៏មិនបណ្តាលឱ្យយើងជ្រុះសក់ដែរ ប៉ុន្តែយើងតែងតែសង្កេតឃើញ មានការជ្រុះសក់ពេលយើងកើតអង្គែ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សមូលហេតុដែលបណ្តាលឱ្យយើងជ្រុះសក់ពេលមានអាការៈកើតអង្គែអាចបណ្តាលមកពី៖
១. ការអេះស្បែកក្បាល
អង្គែធ្វើឱ្យយើងរមាស់ ហើយនៅពេលយើងអេះស្បែកក្បាលយើងអាចដាច់រលាត់ដែលធ្វើឱ្យខូចក្រពេញគល់សក់ ហើយបណ្តាលឱ្យជ្រុះសក់។
២. ការផ្លាស់ប្តូរសាប៊ូកក់សក់ញឹកញាប់
នៅពេលយើងកើតអង្គែ យើងអាចផ្លាស់ប្តូរសាប៊ូកក់សក់ញឹកញាប់ដើម្បីស្វែងរកសាប៊ូដែលអាចកម្ចាត់អង្គែបាន ហើយក្នុងសាប៊ូកក់សក់នីមួយៗមានធាតុផ្សំច្រើន ហើយខុសៗគ្នាដែលបណ្តាលឱ្យខូចក្រពេញគល់សក់របស់យើង។
យើងក៏អាចជ្រុះសក់ដោយសារឆ្លងមេរោគសើស្បែកណាមួយដែលបណ្តាលមកពីមេរោគផ្សិតដែរ តែអាការៈដែលកើតឡើងដំបូងស្រដៀងនឹងការកើតអង្គែធម្មតាដែលធ្វើឱ្យយើងមានការយល់ច្រឡំថាកើតអង្គែធ្វើឱ្យជ្រុះសក់។
អង្គែបង្កឡើងដោយកត្តាជាច្រើន តែមូលហេតុចម្បងមានដូចជា៖
- ក្រពេញស្បែកឡើងប្រេងគួបផ្សំនឹងរោគផ្សិត Malassezia (មេរោគឱកាសនិយម) ដែលមាននៅលើស្បែករបស់យើង
- ស្រ្តេស ឬគិតច្រើន
- ការគេងមិនគ្រប់គ្រាន់
- ការញុំាចំណីអាហារដែលមានជាតិសាច់ច្រើន វេចខ្ចប់ស្រាប់ ឬអាហារកំប៉ុង
- ការញុំាគ្រឿងស្រវឹងដែលធ្វើឱ្យប្រព័ន្ធភាពសុំាយើងចុះខ្សោយ
- ការកក់សក់សម្អាតក្បាលមិនស្អាត
ខាងក្រោមនេះជាវិធីសាស្រ្តមួយចំនួនដែលអាចការពារយើងពីការកើតអង្គែ៖
- កក់សក់ជាប្រចាំឱ្យបានស្អាតល្អ
- បើស្បែកក្បាលឡើងប្រេង យើងគួរជ្រើសរើសសាប៊ូកក់សក់សម្រាប់ស្បែកក្បាលឡើងប្រេង
- ញុំាអាហារសម្បូរដោយជីវជាតិល្អៗ ចៀសវាងអាហារបំពង ឬមានជាតិខ្លាញ់ខ្ពស់ដូចជា ហ្វាសហ្វូត
- លេងកីឡា ឬហាត់ប្រាណ
- កាត់បន្ថយស្រេ្តស
- គេងឱ្យបានគ្រប់គ្រាន់
ជាទូទៅអង្គែដែលមានលក្ខណៈស្រាលអាចព្យាបាលជាដោយសាប៊ូព្យាបាលអង្គែរបស់ពេទ្យ តែបើអង្គែដែលមានលក្ខណៈធ្ងន់ធ្ងរត្រូវការជួបគ្រូពេទ្យដើម្បីទទួលយកការព្យាបាលឱ្យបានត្រឹមត្រូវ ដោយក្នុងនោះមានការលាបថ្នាំបន្ថែម ឬឈានទៅដល់ការញុំាថ្នាំជាដើមដើម្បីព្យាបាលឱ្យអាការៈអង្គែបានប្រសើរឡើង និងបន្ថយអាការៈរមាស់។
ចំណុចសំខាន់
អង្គែមិនចម្លងពីមនុស្សម្នាក់ទៅមនុស្សម្នាក់ទេ ហើយក៏មិនបណ្តាលឱ្យយើងជ្រុះសក់ដែរ។ មូលហេតុដែលបណ្តាលឱ្យយើងជ្រុះសក់ពេលមានអាការៈកើតអង្គែអាចបណ្តាលមកពី៖
- ការអេះស្បែកក្បាល
- ការផ្លាស់ប្តូរសាប៊ូកក់សក់ញឹកញាប់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
