ហេតុ​អ្វីត្រូវ​ចាប់ផ្ដើមវាស់សម្ពាធឈាម? អានលទ្ធផលបែបណា?

ការវាស់សម្ពាធឈាមខ្លួនឯងជួយឱ្យយើងដឹងពីស្ថានភាពសម្ពាធឈាមរបស់យើងថា ល្អ លើស ខ្វះ ឡើង ឬចុះ ជាពិសេសអ្នកលើសសម្ពាធឈាមដែលត្រូវតាមដានសម្ពាធឈាមជាប្រចាំដើម្បីគ្រប់គ្រង​ជំងឺ។ តើ​សម្ពាធ​ឈាមជាអ្វី? មានឥទ្ធិពលយ៉ាងណាចំពោះសុខភាពយើង? យើងគួរវាស់​ឈាម​យ៉ាងម៉េច​ទើបត្រឹមត្រូវ? គួរវាស់សម្ពាធឈាមចាប់ពីអាយុប៉ុន្មាន?

វេជ្ជបណ្ឌិត ស្រេង ឌីណា ឯកទេសជំងឺបេះដូង សរសៃឈាម និងជំងឺវេជ្ជសាស្រ្តទូទៅនៅមន្ទីរពេទ្យ​កាល់ម៉ែត និងគ្លីនិកឯកទេសបេះដូងរុងរឿងបានឱ្យដឹងថា សម្ពាធឈាមជាកម្លាំងដែលចរន្តឈាម​រត់ក្នុងសរសៃ​ឈាម​​​របស់យើង ហើយកម្លាំងនេះមានឥទ្ធិពលទៅលើជញ្ជាំង​ខាងក្នុងនៃ​សរសៃឈាម​​ដែល​បណ្តាល​មកចង្វាក់បេះដូង (ពេលបេះដូងកន្រ្តាក់ និង​រលា)។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ពេលបេះដូងកន្រា្តក់​បង្កើត​បានកម្លាំងមួយហៅថាសម្ពាធឈាម​ស៊ីស្តូលិក និងពេលបេះដូងរលា​បង្កើត​បានជាកម្លាំងហៅថា​សម្ពាធ​ឈាម​ដ៉្យាស្តូលិក។

១. វិធីវាស់សម្ពាធឈាមត្រឹមត្រូវ

• មុនវាស់សម្ពាធឈាមយើងចាំបាច់ត្រូវសម្រាកឱ្យបានយ៉ាងតិច ៥ ទៅ ១០ នាទី​ដើម្បី​ឱ្យ​បាត់​ហត់
• ចៀសវាងជក់បារី ញុំាកាហ្វេ ឬហាត់ប្រាណយ៉ាងហោចកន្លះម៉ោងមុនវាស់​សម្ពាធឈាម
• ពេលវាស់សម្ពាធឈាមយើងត្រូវសម្រួលអារម្មណ៍ កុំគិតច្រើន កុំភ័យ ឬខឹង ព្រោះបណ្តាលឱ្យសម្ពាធ​​​ឈាម​​​យើង​​ឡើង
• ពេលវាស់សម្ពាធឈាមយើងត្រូវសម្រាកឱ្យស្រួលដោយអាចអង្គុយ​ឱ្យត្រង់ខ្លួន ឬគេង ហើយ​ដាក់​ដៃឱ្យស្មើនឹងកម្រិតបេះដូង រួចចុចម៉ាស៊ីនវាស់សម្ពាធឈាម
• យើងគួរវាស់ឱ្យបានពីរដង បានន័យថា វាស់ម្តងហើយ ពីរបីនាទីទៀតយើងវាស់ម្តងទៀត ហើយ​សម្ពាស​ឈាមនៃការវាស់ទំាងពីរលើកអាចខុសគ្នាតិចតួច តែយើងយកលទ្ធផល​ទីពីរជាលទ្ធផល​ផ្លូវការ។

២. របៀបអានលេខនៅលើម៉ាស៊ីនវាស់សម្ពាធឈាម

ជាទូទៅលេខលើម៉ាស៊ីនវាស់សម្ពាធឈាមមានបីជួរ៖

• លេខខាងជួរទី ១ ហៅថាស៊ីស្តូលិក៖ កម្រិតសម្ពាធឈាមពេល​បេះដូង​ច្របាច់ ឬកម្រិត​សម្ពាធ​អតិបរមា
• លេខខាងជួរទី ២ ហៅថាដ៉្យាស្តូលិក៖ កម្រិតសម្ពាធឈាមពេល​បេះដូង​រលា ឬកម្រិតសម្ពាធ​ឈាម​អប្បបរមា
• លេខខាងជួរទី ៣ ហៅថាផាល៖ ចង្វាក់បេះដូងក្នុងមួយនាទី​ (ចំនួន​​បេះដូងលោតក្នុងមួយនាទី)

ពេលវាស់សម្ពាធឈាម យើងមើលទាំងស៊ីស្តូលិក និងដ៉្យាស្តូលិក។ សម្ពាធ​ឈាម​ចែកចេញ​ជាបី​ប្រភេទ​គឺ៖– សម្ពាធឈាមធម្មតា (ល្អ)៖ សម្ពាធឈាមស៊ីស្តូលិកនៅចន្លោះពី ១១០ ទៅ ១៣០ មិល្លីម៉ែត្រ​បារត ហើយសម្ពាធឈាមដ៉្យាស្តូលិកអាចចន្លោះពី ៧០ ទៅ ៩០ មិលីម៉ែត្របារត– លើសសម្ពាធឈាម (មានជំងឺលើសសម្ពាធឈាម)៖ សម្ពាធឈាម​ស៊ីស្តូលិក​លើសពី ១៤០ មិល្លីម៉ែត្របារតឡើង ឬសម្ពាធឈាមដ៉្យាស្តូលិក​លើស​ពី ៩០ មិល្លីម៉ែត្របារតឡើង– សម្ពាធឈាមចុះទាប (វិលមុខ ស្រវាំងភ្នែក ខ្សោយ)៖ សម្ពាធឈាម​ស៊ីស្តូលិកទាបជាង ៩០ មិល្លីម៉ែត្របារត ហើយសម្ពាធឈាមដ៉្យាស្តូលិកទាប​ជាង ៦០ មិល្លីម៉ែត្របារត។

យើងទម្លាប់ហៅខ្នាតមួយទៀតហៅថា សង់ទីម៉ែត្របារត។ ឧទាហរណ៍ សម្ពាធឈាម ៨ (សង់ទីម៉ែត្របារត) មានន័យ​ថា ៨០ មិលីម៉ែត្របារត ហើយភាគច្រើនយើងចាប់អារម្មណ៍តែលេខខាងលើទេ តែមែនទែនទៅ យើង​ត្រូវមើលទាំង​បី​លេខ ជាពិសេសលេខជួរទី ១ និងទី ២។ ម្យ៉ាងទៀត​សម្ពាធឈាមជាក់ស្តែង​​មិនមែនគត់ៗទេ អាច ៨២ ៩៣ ឬ១២២ ជាដើម។

៣. វ័យគួរវាស់សម្ពាធឈាម

ជាទូទៅចំពោះមនុស្សពេញវ័យគួរតាមដានសម្ពាធឈាមនៅអាយុ ១៨ ឆ្នាំឡើងទៅ ហើយចំពោះ​អ្នក​ដែលមិនដែរមានបញ្ហាសុខភាព ឬកត្តាប្រឈមមានជំងឺសរសៃឈាមបេះដូង​គួរវាស់សម្ពាធ​ឈាម​រៀងរាល់ឆ្នាំ ឬពីរឆ្នាំម្តង។

ដោយឡែកអ្នកមានអាយុចាប់ពី ៤០ ឆ្នាំឡើងដែលមានន័យថា ចាប់ផ្តើមមានកត្តាប្រឈម​នឹង​ជំងឺ​បេះដូង ឬសរសៃ​ឈាមបេះដូងហើយ ឬអ្នកដែលអាយុក្រោម ៤០ ឆ្នាំដែលធាត់ ជក់បារី ឬមានបញ្ហា​លើសជាតិខ្លាញ់​ក្នុងឈាមគួរតាម​ដានសម្ពាធឈាមឱ្យបានញឹកញាប់ អាចមួយឆ្នាំម្តង ឬតាមការ​កំណត់​របស់គ្រូពេទ្យ។

យើងគួរវាស់ និងតាមដានសម្ពាធឈាមជាប្រចាំទៅតាមការណែនាំរបស់គ្រូពេទ្យដើម្បីតាមដានសុខភាព ព្រោះការព្យាបាលជំងឺនៅដំណាក់កាលស្រាលមានការងាយស្រួល និងចំណាយតិច។

ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕ 

អត្ថបទផ្ដល់សិទ្ធិដោយ Hello Krupet