ចាប់ពីថ្ងៃទី២៧ ដល់ ថ្ងៃទី៣០ ខែកញ្ញា សម្រាប់ខេត្តទាំងនេះ ភ្លៀងធ្លាក់ខ្លាំង អាចបង្កជាជំនន់ទឹកភ្លៀង

ភ្នំពេញ៖ យោងតាមការវិវត្តជាក់ស្តែង ជាបន្តបន្ទាប់នៃស្ថានភាពអាកាសធាតុ បានបង្ហាញឲ្យឃើញថា កម្លាំងស្របនៃឥទ្ធិពលព្យុះទី ១៦ ឈ្មោះ ណូរុ «NORU» ដែលកើតនៅភាគខាងកើតប្រទេស ហ្វីលីពីន នឹងធ្វើឲ្យប្រព័ន្ធសម្ពាធទាប (ITCZ) ដែលអូសបន្លាយលើភាគខាងជើងកម្ពុជា បានចុះ ថមថយឥទ្ធិពលជាលំដាប់ នេះយោងតាមការចុះផ្សាយរបស់ ក្រសួងធនធានទឹក និងឧតុនិយម នៅថ្ងៃទី២៧ ខែកញ្ញា ឆ្នាំ២០២២។

តាមប្រភពដដែល បានធ្វើការព្យាករទៀតថា នៅថ្ងៃទី ២៧ ខែកញ្ញា ឆ្នាំ ២០២២ ព្យុះណូរុនឹងវិវត្តទៅ ជាព្យុះទីហ្វុង «TY» នៅពេលបក់ចូលកៀកឆ្នេរភាគកណ្តាលប្រទេសវៀតណាម ដែលព្យុះនេះ នឹងឆ្លងកាត់ប្រទេសវៀតណាម និងអាងទន្លេមេគង្គប្រទេសឡាវ និងថៃ នៅថ្ងៃទី២៨ ដល់ថ្ងៃទី ៣០ ខែកញ្ញា ឆ្នាំ ២០២២។ 

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាមួយគ្នានោះ ចាប់ពីថ្ងៃទី ២៧ ដល់ថ្ងៃទី ២៩ ខែកញ្ញា ឆ្នាំ ២០២២ ខ្យល់មូសុងនិរតី នឹងបង្កើន ល្បឿនបក់ក្នុងកម្រិតពីបង្គួរទៅខ្លាំងមកលើតំបន់មាត់សមុទ្រ ដោយលក្ខណបែបនេះ នឹងធ្វើឲ្យព្រះរាជាណាចក្រកម្ពុជា ចាប់ពីថ្ងៃទី ២៧ ដល់ថ្ងៃទី ៣០ ខែកញ្ញា ឆ្នាំ ២០២២ បណ្តាខេត្តនៅភាគពាយព្យ មានជាអាទិ៍ ខេត្តឧត្តរមានជ័យ ព្រះវិហារ រតនគិរី សៀមរាប បន្ទាយមានជ័យ ប៉ៃលិន បាត់ដំបង និងខេត្តពោធិ៍សាត់ នឹងអាចមានភ្លៀងធ្លាក់ក្នុងកម្រិតពីបង្គួរទៅ ច្រើន បូកផ្សំនឹងបរិមាណទឹកភ្លៀងដែលហូរមកពីប្រទេសថៃបន្ថែមទៀត អាចបង្កឲ្យទីទំនាបជាប់ ផ្លូវទឹក និងផ្លូវទឹកនៅក្នុងភូមិសាស្ត្រនៃបណ្តាខេត្តទាំងនោះ ប្រឈមនឹងជំនន់ទឹកភ្លៀង។

ចំណែកបណ្ដាខេត្តដទៃទៀត និងរាជធានី ភ្នំពេញ មានភ្លៀងធ្លាក់ក្នុងកម្រិតពីតិចទៅបង្គួរ លើកលែងតែបណ្តាខេត្តជាប់មាត់សមុទ្រ មានខេត្ត កោះកុង និងខេត្តព្រះសីហនុ ដែលអាចមានភ្លៀងធ្លាក់ច្រើន ។ នៅលើផ្ទៃសមុទ្រនឹងមានភ្លៀងច្រើន ខ្យល់បោកបក់ខ្លាំង និងរលកសមុទ្រខ្ពស់ ។ ទន្ទឹមនេះ ភ្លៀងនឹងបន្តធ្លាក់ច្រើននៅតំបន់ផ្ទៃរងទឹកភ្លៀងនៃអាងទន្លេមេគង្គ ដែលអាចធ្វើឲ្យ ទឹកទន្លេមេគង្គ មានការងើបកើនឡើងវិញជាបន្តបន្ទាប់ ហេតុដូច្នេះ សូមឲ្យប្រជាពលរដ្ឋ ដែលរស់នៅតាមតំបន់នោះ សូមបន្តប្រុងប្រយ័ត្នចំពោះបាតុភូធម្មជាតិ៕

ប្រភព៖ ក្រសួងធនធានទឹក និងឧតុនិយម

សូមទស្សនារូបភាពខាងក្រោម៖