មិនធម្មតាទេ បវរកញ្ញា៥រូបនឹងលេចវត្តមានរួមគ្នា ក្នុងភាពយន្តខ្នាតធំរបស់ផលិតកម្មហង្សមាស

រាជធានីភ្នំពេញ ៖ ពិតណាស់ មហាជននាំគ្នាទន្ទឹងរងចាំអ៊ុតមើល ថាតើបវរកញ្ញាទាំង៥រូប ដែលនឹងលេចវត្តមានរួមគ្នា ក្នុងភាពយន្តខ្នាតធំ «អប្សារាមហានគរ» របស់ផលិតកម្មហង្សមាស ជាបវរកញ្ញារូបណាខ្លះ នេះបើតាមការបង្ហើបឲ្យដឹងរបស់ ឯកឧត្តម ហ្វៃ សំអាង អ្នកដឹកនាំរឿងល្បីឈ្មោះរបស់កម្ពុជា កាលពីប៉ុន្មានថ្ងៃមុននេះ។

យ៉ាងណាមិញ ឯកឧត្តម បានបន្តទម្លាយមុខមាត់របស់បវរកញ្ញាទាំង៥រូបនេះ ម្តងម្នាក់ៗរហូតមកទល់នឹងពេលនេះ តួសម្តែងជាបវរកញ្ញាកម្ពុជានោះ គឺបានលាតត្រដាងដោយរួមមាន កញ្ញា សេង រដ្ឋា កញ្ញា រឿន ណាត កញ្ញា ប៉ូគឹមថេង សុតធីតា កញ្ញា ប៊ី សុធារី និងកញ្ញា ពេជ្រ វត្តីសារ៉ាវឌ្ឍី។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

តួយ៉ាង ក្រោយបើកបង្ហាញវត្តមានតួសម្តែងទាំង៥រូបនេះ សុទ្ធតែជាលំដាប់បវរកញ្ញាល្បីៗហើយនោះ មហាជនកាន់តែអន្ទះសារចង់មើលភាពយន្តនេះជាខ្លាំង ជាមួយគ្នានេះ ឯកឧត្តម ហ្វៃ សំអាង ក៏បានទម្លាយពីតួសម្តែងរបស់បវរកញ្ញាម្នាក់ៗ ដោយ កញ្ញា ពេជ្រ​ វត្តី​សារ៉ា​វឌ្ឍី ​ជាតួអង្គ​នាង​ ឆោម​ ឆវី​ និងតួនាង​ ឆោម​ ឆផ្កា។ ចំណែក កញ្ញា ប៉ូគឹមថេង សុតធីតា ជាតួអង្គនាម​ថា​ កែវ​ មណី​ ជា​ព្រះ​ជាយា​ទី​១​ដែល​ជាអង្គ​ក្សត្រិយមាន​ព្រះ​ហទយ:ធំទូលាយប្រៀបបាននឹងលំហមេឃ​ មាន​ព្រះ​រូប​ឆោម​លោម​ពណ៌ល្អ​ល្អះ រីឯកញ្ញា សេង រដ្ឋា ត្រូវសម្តែងជាតួ​អង្គ​ពីរដែលមានព្រះរាជចរិយា​ខុសគ្នាដូចមេឃហេីយនិងដី​ ជារាជបុត្រីដែលមានព្រះនាមថា​ ព្រះ​ធីតា​ វរនន្ទ​ អម្ពរ​ពេជ្រ​និង ព្រះ​ធីតា​ វរនន្ទ​ អម្ពរ​មាស។​ ឯកញ្ញា រឿន ណាត តួ​​កំពូល​អង្គ​ក្សត្រិយ​ នៅសម័យ​កាល​ដ៏រុង​រឿង​នៃ​ចក្រភព​ខ្មែរ​ ព្រះ​នាង​មាន​ព្រះ​ទ័យ​ ​ព្រះ​វិសារទ:បូជា​ព្រះ​ជន្មដេីម្បីព្រះនគរ​។ និងចុងក្រោយ កញ្ញា ប៊ី​ សុធារី​ ជាតួ​អង្គ​នាងខ្មុក​ និងអ្នកម្នាង​ ប្រ​ភា មានអត្តចរិត​ក្រមិចក្រមើម​ បង្កប់​ភាព​ច្រណែន​និន្ទា​ ឈ្នានីស​ ញញឹម​ចាប់​ដៃ​ សម្លក់​ជាន់ជេីង​ មាន​មហិច្ឆតា​ឥតស្កប់ស្កល់។

គួរបញ្ជាក់ផងដែរថា ភាពយន្តមួយនេះ ក៏មានការចូលរួមសម្តែងពីបវរកញ្ញាដទៃទៀតផងដែរ ជាពិសេសក៏មានតួអង្គស្រីជាច្រើនដួងទៀត ដែលជាតារាដ៏ល្បី ជាSuper starចំនួន៣ជំនាន់ តារាខ្លះទៀតមកពីទ្វីបឆ្ងាយថែមទៀតផង ប៉ុន្តែជំហានដំបូងនេះ ឯកឧត្តម ហ្វៃ សំអាង បង្ហើបត្រឹមបវរកញ្ញាទាំង៥ដួងនេះសិន៕

បើចង់ដឹងឲ្យកាន់តែច្បាស់ថែមទៀតនោះ តោះទៅមើលរូបភាពខាងក្រោម ៖

• ការងារ
• ជីវិត
• រូបភាព
• តារាខ្មែរ