លោកពូ សុខចិត្តផ្អាករត់ម៉ូតូឌុប ដើម្បីជួយសម្រួលចរា.ច.រ.ណ៍ ពេលនេះបាន ធ្វើមន្ត្រីជាប់កិច្ចសន្យានៅខណ្ឌ

ភ្នំពេញ៖ បើយោងតាមគណនីផេកជាផ្លូវការ ថ្ងៃទី១២​ ខែតុលា​ ឆ្នាំ២០២២​ ឯកឧត្តម​ ជា​ ពិសី​ អភិបាលខណ្ឌទួលគោក បានជួបសំណេះសំណាលជាមួយ​ លោក ឃ្លោក​ វណ្ណ:​ ជាប្រជាពលរដ្ឋ រស់នៅក្នុងសង្កាត់បឹងកក់ទី១​ ខណ្ឌទួលគោក​ និងមានមុខរបរជាអ្នកម៉ូតូឌុប ។

តាមប្រភពដែលបានបង្ហោះ ជារៀងរាល់ព្រឹក លោកតែងតែចុះជួយសម្រួលចរាចរណ៍ នៅចំណុចកែងផ្លូវលេខ៣១៧និងផ្លូវលេខ៥៦៦​ (ក្រោយអតីតសាលាហ្សាម៉ាន់អន្តរជាតិ)​ ដែលនេះជាការបង្ហាញពីកាយវិការដ៏ល្អ ក្នុងការងារជួយដល់សង្គមជាតិ​ ដោយការស្ម័គ្រចិត្ត។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាក់ស្តែង ដោយបានមេីលឃេីញពីចំណុចទាំងអស់នេះ​ ឯកឧត្តមអភិបាលខណ្ឌ បានស្នេីសុំមតិដឹកនាំពីថ្នាក់លេី បញ្ចូលសមាសភាព​ លោក ឃ្លោក​ វណ្ណ:​ ជាមន្រ្តីជាប់កិច្ចសន្យា​ ផ្នែកសណ្តាប់ធ្នាប់​ខណ្ឌ​ទួលគោក។

មិនត្រឹមតែនាឱកាសនេះ ឯកឧត្តមអភិបាលខណ្ឌ បានឧបត្ថម្ភថវិកាចំនួន ៤០០,០០០រៀល​ ព្រមទាំងសម្ភារៈមួយចំនួន​ ដល់លោកផងដែរ។ ការផ្តល់ឱកាសដល់រូបលោក ជាមន្ត្រីជាប់កិច្ចសន្យារបស់សាលាខណ្ឌ ស្របទៅតាមគោលបំណងដែលលោកកំពុងតែអនុវត្តជាប្រចាំ និងអាចជួយសម្រាលជីវភាពរស់នៅ របស់លោកប្រចាំថ្ងៃផងដែរ៕

សូមទស្សនារូបភាពខាងក្រោម៖

ប្រភព៖ រដ្ឋបាលខណ្ឌទួលគោក